الموضوع: هل تؤيد الدعوة لمظاهرة مليونية يوم الثلاثاء القادم ؟

المشاركة الأصلية كتبت بواسطة moustafa_kamel

لا اؤيد يوم التلات و اؤيد و بشده انها تبقى مليونيه و فى جميع المحافظات كل يوم جمعه و ده لعده اسباب
اولا ان الناس البسيطه تقدر تشوف اشغالها طوال الاسبوع و تطلع يوم الاجازه(و اقصد بالبسيطه اللى بتجرى على رزقها و لا تهتم الا بلقمه العيش) و بالطريقه دى نتقى شر عداوتهم و يا سلام لو جم فى صفنا

ثانيا فرصه التجمع بعد صلاة الجمعه تبقى اكبر بكتير
و اقصد بالمظاهرات التذكير بالن الشعب قائم وراء مطالبه و لن ينام عنها

ثالثا ان الابطاء فى تنفيذ مطالب الثوره ليس كله سيئ بل رب ضره نافعه

رابعا اعطاء فرصه للمجلس العسكري بتنفيذ الطلبات و لكن فى نفس الوقت تحت ضغط الشارع عليه

و اخيرا اتمنى عدم توقف المظاهرات الى ان تنتقل السلطه الى حكومه مدنيه برلمانيه يرضى عنها الشعب

+1111111111111

ولا يوم الثلاثاء ولا الجمعة ولا اي يوم بعد كدا
المظاهرات دلوقتي بقت فسحة اللي عايز ينزل يتفسح يروح المظاهرات
ربنا خلق الدنيا في 6 ايام واستوى على العرش في اليوم السابع واحنا بقالنا 30 سنة ضايعين والمطلوب في خلال اقل من شهر الدنيا تبقى حلوة وكل اللي عايزينه اتعمل والحياة رجعت احسن من الاول
يا جماعة حرام فكروا بعقلكم شوية بقى بجد حرام الخراب اللي بقت الدنيا فيه والله اعرف ناس شغالين في السياحة الشركات قفلت وقاعدين في البيت. سيبوا العجلة تدور ونشوف ايه اللي هيحصل
وانا مستبشر خير باحمد شفيق (ودا وجهة نظري)
وبجد لو فضل الحال كدا يبقى نفسي الجيش يطبق الاحكام العرفية علشان البلد تبدأ تتعدل بدل الفوضى كل جمعة.

انا مش مع المظاهرات اليومين دول خالص لأن لازم يكون في حكومة تمشي البلد و تبقي تتغير بعد كده لكن لازم يبقي في نظام...يعني الشرطة لازم تنزل الشارع فورا و بعدين نحاسب و نستبعد الفاسدين...مش نقول الشرطة ما تنزلش الشارع غير لم حاكمت فلان الفلاني

النقطة التانية...لو الناس عايزة تضغط علي المجلس العسكري للاسراع في الاصلاحات يبقي تعمل مظاهرات يوم الجمعة كنوع من استعراض القوة للشارع المصري عشان الحكومة تعرف ان الشعب صاحي لكن ننزل في وسط الاسبوع بالملايين ليه؟؟!!! هي الناس ماعدش وراها شغل؟؟ ايه البلد اللي ينفع تمشي لما كل الناس تعمل اضرابات و تتظاهر ولا هو كل واحد فاكر انه مش محتاج يشتغل و نصيبه في ال70 مليار هيكفيه بقيت العمر من غير ما يشتغل

تصدقو يا جماعة لو الجيش قال أنة حا يتم القبض على أى متظاهر و التعامل معة بموجب القانون مش حا تشوفو لا مليونية و لا ألفية حتى و الله لو الجيش ذاع بيان زى كدة مش حا ينزل نفر يتظاهر . دة كلام و ساعت الجد مش حا ينزل حد بس الجيش ينزل بيان زى كدة و شوفو مين الى حا ينزل . الناس متحامية فى الجيش بصورة غير مباشرة بلاش أستفزاز للجيش حتى لا تقطع شعرة معاوية. الجيش بس ينزل بيان و تحذير و بعدين نشوف الكلام عن المظاهرة حا يبقى حقيقى و لا كلام بس

انا شخصيا موافق على الاستمرار
بس مش موافق على يوم الثلاثاء
ايه المشكلة لما نستمر فى المليونيات كل يوم جمعة وبكدة نبقى ضاغطين لحد ما جميع مطالبنا تتحقق وكمان نضمن استمرار الثورة ( اللى هو اصعب من بدءها )
وكمان نكون مسكنا العصاية من النص
وعجلة الانتاج تستمر ......... والثورة تستمر