الموضوع: نوارة نجم: مليونية الثلاثاء... شفيق يا راجل لازم يرحل

المشاركة الأصلية كتبت بواسطة mmamdouh

i don't really care
انا مش بعتمد الناس بتقول ايه... انا بعتمد على اللى انا شايفة قدامى... و حتى الان انا مش شايف الراجل عمل حاجة وحشة... و الجيش - الذى اثق فيه تمام الثقة - ابقى علية
اذا رؤيتى الشخصية و استراتيجية المؤسسة التى اثق فيها تقول ان الرجل حتى الان لا غبار علية... يطلع بقى ناس تقول دة كويس او تقول دة وحش... ولا يفرق معايا بتعريفة كل كلامهم... المهم انا شايف ايه
و قصة انه "اول ما طلع على الساحة" الناس قالت علية كويس (او حتى مش كويس) دى طبيعية جدا لان الرجل بقى رئيس الوزراء و اصبح حديث البلد كلها فا طبيعى ان مع ظهورة تظهر اراء عنة بغض النظر هى كويسة ولا وحشة نتيجة ظهور تساؤلات من ناس كتير هل الراجل دة حلو ولا وحش
كل واحد فينا ماشى و معاه سمعتة.... مدى انتشار سمعتة مرتبط ارتباط وثيق بوضعة فى المجتمع
mmamdouh

طب جميل يا عم ممدوح , هانركن موضوع ان الناس قالوا انه كويس , و هانركن الناس اللي بتقول انه مش كويس كمان
و تعال نمشيها واحدة واحدة , ايه شفناه منه كويس لحد دلوقت ؟

المشاركة الأصلية كتبت بواسطة mmamdouh

طيب لما نزلت (ايا كان ميعاد نزولك) لقيت جنبك مليون واحد عايزين شفيق يمشى ولا كنت واقف وجنبك 3 انفار؟؟؟
لو كان جنبك مليون يبقى فيه فعلا اجماع على الراى و اكيد انتوا شايفين حاجة احنا مش شايفنها
اما لو كنت واقف لوحدك يبقى القضية اصلا غير مقنعة...
Mmamdouh

هي دي الديمقراطية بالمعني اللى فهمه البعض بعد 25 يناير ان لو ليهم راي لازم كل الشعب يسمع كلامهم
كل واحد من اللى خرجوا او مخرجوش في الثورة معتقد ان من غيره الثورة كانت ماتت وبالتالي
يجب علي الجميع ان يطيعوه
ولو قال مظاهرة يبقي مظاهرة
شفيق يمشي يبقي لازم يمشي
الجيش مش عاجبه وبيقول خلونا نركز في ادارة الشئون الفترة الانتقالية ونعدل الدستور ونعمل الانتخابات ونرجع ثكناتنا ونحمي حدودنا مش مهم يضرب الجيش راسه في الحيط الجيش مستمد شعبيته مننا احنا ولو مش عاجبه يروح يبقي جيش بلد تانية
ايه كم الغرور اللى الناس اصبحت فيه ده كل واحد فيهم فاهم انه هو مصر وان الباقيين مجرد رعايا عليهم الطاعة وبنعايب على القذافي
الديمقراطية معناها ان الاقلية تطيع راي الاغلبية مش الاقلية تعمل اللى هي عايزاه

وبعد ده كله لو سالت حد منهم طيب موافقين هانمشي شفيق نعين مين مكانه كل واحد منهم هايقولك على اسم ويتخانقوا مع بعض ولو اتعين واحد من اللى مجموعة منهم عايزاه بقية المجموعات هاتقولك احنا نازلين التحرير وهلم جرا في دائرة من الفوضي مصرين على ادخال البلد فيها

المشاركة الأصلية كتبت بواسطة tlrsiap

يادي معاد نزولي
:)))
انا شايف في كلامك انك مبسوط ان مظاهرات التلات اللي فات كانت قليلة , بس خليني افكرك ان كان فيه تخبط في المواعيد و ناس كتير جدا طلعت ترتب قوافل المساعدات بتاعة ليبيا
و خليني افرض معاك ان اللي اعترضوا على شفيق في المظاهرات مش ملايين ولا حاجة , و ده عشان نناقش الفرض , احنا مش هانعمل زي بتوع التليفزيون لما كانوا بيشوفوا المظاهرة و يقولوا فيها مليون و باقي ال80 مليون بيأيدوا مبارك
انا عايز اقول لك حاجة كمان , انا مش هاكسب مال الدنيا لو شفيق اتشال ولا بيني و بينه تار شخصي , لكن انا فعلا شايف انه ما ينفعش لمرحلتنا دي

جملتك ان لو مفيش حد نزل في مصر المظاهرة يوم الثلاثاء يقول انك هاتبيت في الميدان من يوم الاثنين مش نازل الساعة 8 وتقول مظاهرة
هي المظاهرة كانت سواريه ولا حفلة تسعة ولا ايه ؟
وتخبط مواعيد ايه اذا كانت الدعوة ليها اطلقتها الزعيمة الثورية المفداة نوارة نجم من يوم السبت ومعها احمد ماهر وناتشرت كالنار في الهشيم على الفيس ومواقع النت يعني لو ليها مؤيدين كانت على الاقل اصبحت بعشرات الالاف
وهي قوافل ليبيا اشترك فيها كام الف علشان يبقي ده سبب العدد الهزيل اللي شارك في مظاهرة الثلاثاء ؟
وبلاش اسقاط دايما على الماضي احنا بنتكلم عن الحاضر
وانت هاتكسب او تخسر لو شفيق اتشال الله اعلم ممكن مكسب معنوي ان الناس اللى عايزة شفيق يتشال لما الجيش يستجيب لهم يحسوا انهم هما اللى بيحركوا البلد او ان لهم تأثير الان
واللى شايف حاجة لوحده والاغلبية غير متفقة معاه ينصاع للاغلبية زي ما الديمقراطية بتقول والا تبقي ديكتاتورية وفي الحالة دي ميزعلوش لو نزل الفين يعملوا مظاهرة في التحرير ويوقفوا البلد ويطلع لهم 10 الاف مش موافقين على المظاهرة ويطردوهم من الميدان ماهو شغل عافية بقة
اللى بيطالب بالديمقراطية يلتزم بها اولا وبعد كدة يطالب الاخرين بالالتزام بها


واللى لسة بيدرسوالاجازة اتمدت له اسبوع كمان او خالي شغل ومش فارقة معاه يعرف ان فيه ناس تانية عندها شغل عايزة تشتغل علشان تساعد نفسها وتساعد اقتصاد بلدها انه يقوم تاني بدل ما هم عايزين يخربوها