الموضوع: عايز اجيب لانسر - عجبانى اوى بصراحه

السلام عليكم ورحمة الله وبركاته
انا كان معايا جولف 2 وبيعتها وكنت خلاص ناوى اجيب هيونداى نيو اكسنت لمجرد انها معروفه والناس بتشكر فيها بس انا مش عاجبنى انى اجيب حاجه لمجرد ان صيانتها سهله واسمها فى الآخر كورى والموضوع جه من عند ربنا وحصلت الاحداث الاخيره فاقولت يمكن ربنا بيدينى فرصه أعيد تفكير فى الموضوع ده...

طبعا بما ان اليابانى مفيش اخوه (ده بعد الاوروبى طبعا) انا فكرت جديا انى اجيب لانسر خصوصا ان شكلها كمان عاجبنى اوى بس للاسف انا خبرتى فيها محدوده اوى
انا بسمع ناس بتتكلم عن الاشكال بـ (كريستاله-بومه-شارك-.....) بس بصراحه معرفش شكل كل واحده فيهم ايه
واذا كانت كويسه ولا لا انا عارف اشكال مختلفه منها بس بصراحه معرفش كل واحده فيهم اسمها ايه
ان محتاج خبير من خبراء المنتدى يقولى ببساطه كل اسم من دول :
موديله من سنة كام لكام ؟
ومين احسن واحده فيهم ؟
يقولى مكان الاقى فيه صوره بس لكل شكل عشان اعرف اساميهم ؟

ده بالنسبه للجزء الاول........ الجزء التانى متعلق بالاسعار
طبعا انا اتمرمطت فى المستعمل لانى كنت راكب جولف موديل 1988 ومش عايز حاجه تتعبنى وراها عشان كده بسأل هل الموديل الى بينزل زيرو دلوقتى (الى هو 2011 ابو 119 الف-اللى على كونتاكت كارز) هو الموديل الوحيد الى بينزل زيرو فى مصر ؟

واذا كان هو ده الوحيد الى بينزل زيرو للاسف مش هقدر اجيبها زيرو .. فى الحاله دى عايز حد ينصحنى بلانسر كويسه بس تكون كسر زيرو (يعنى 2006 فيما فوق) ويكون سعر المستعمل بتاعها فى حدود ال 60 الف

انا عارف ان اسالتى كتير بس انا عارف ان فى ناس ربنا سخرهم لقضاء حوائج الناس عشان كده انا بتمنى على الله انى الاقى حد باله طويل ويقدر يفيدنى