الموضوع: اتحداكم انكم تقولولى على شخصية واحدة فى البلد تتفقوا عليها

المشاركة الأصلية كتبت بواسطة col. Eng. Khaled

يا باشمهندس طارق أحيانا الرد المقتضب يخلّي أكتر من فكرة تيجي في البال

و على قد المحبة تلاقي الواحد بيتاخد

و أنا يا هندس إللي آجي لمعاليك زاحف

هات راسك بقى أبوسها

لا لا لا
ما اقدرش على كده
انا اللى اجى ابوس راسك طبعا من الوضح زاحفا
حضرتك اخويا الكبير و انا اللى اكيد غلطان طالما حضرتك فهمت الكلام غلط

جزاك الله خيرا و ردك ده و الله يزيد المحبه اضعاف

و كما قال الشاعر الجيش و الشعب ايد واحده :)

هتنزل التحرير يوم الجمعه الجايه ولا لأ؟

المشاركة الأصلية كتبت بواسطة dr-mohamed

دي مقدرش اقولها لانى مش وسط المجلس الاعلى ولا بقعد في اجتماعاتهم واي حاجة تتقال عن مواقف الجيش هي مجرد تكهنات
والمشكلة مقدرش افقد الثقة في الجيش والا اخر مؤسسة فيها ثقة هاتنهار ويبقي فعلا دخلنا الفوضي الكاملة

يعنى يا دكتور عاوز تقول انك وكل الناس الى كانت بتنادى باسقاط النظام كانت عاوزه تسقط حسنى والوزراء وتسيب رئيس الوزرا مكانه عشان لسه مبنش انه فاسد ولا لأ
والسبب فى ده أنه لو سقط النظام هنخش فى فوضى
طيب ما هو كل الوزرا اتغيروا ما عدا 2 تقريبا
فين بقى الفوضى الى حصلت بعد التعديل الوزراى الى تقريبا شمل 3/4 الوزراه
انهى فوضى هتحصل لما تشيل رؤساء مجلس إدراه صحف فاشله خاسره للملايين
حصل ايه لما رئيس اتحاد الاذاعه والتليفزيون اتغير
الرئيس السابق نفسه كان بيقول البلد هتبقى فوضى لو مشيت وكتير كانوا بيقولوا الكلام ده
ايه الفرق بين مصر يوم 10/2 قبل تنحى الرئيس ومصر يوم 12/2 بعد تنحى الرئيس .... مشفناش تغير فى اتجاه الفوضى.... تقريبا نفس الوضع اذا ما كنش احسن

ليه الاصرار على شخضيات موصومه ومفضوحه وتشبه - من مشبوه - اى حكومه

شفيق صديق صدوق للرئيس السابق
وبفرض انه كويس ووفى
يبقى لازم يوفى لصديقه
ازاى هيبقى وفى لصديقه وابوه الروحى مع ان فيه تعارض مصالح بين الرئيس السابق

المشاركة الأصلية كتبت بواسطة dr-mohamed

هو ده اللى هايحصل يا طارق لو مشينا حالا شفيق
اعمل استفتاء هنا وضع فيه الاسماء اللى انت شايف انها الافضل وممكن نحطها مكان شفيق وهاتلاقي فيه اختلاف كبير ولو واحد منهم كان له الاغلبية تضمن ان اللى اختاروا الباقيين مينزلوش التحرير ويقولوا شيلوا ابو سكسوكة وحطوا ابو دوجلاس ؟

امرى لله ...

الديموقراطيه تمارس و تعلم بالممارسه و اخطائها بالممارسه و الديموقراطيه لا تعطى و لا تهب و لكن تنتزع مثل الحريه

احنا عايزين الحريه و الديموقراطيه

لو شفيق ده نازل من السما و الناس بتقول و بتنزل و بتضيع من وقتها عشان تقول لا مش عايزينه يبقى هنزل معاهم و اقول مش عازينه ده تحدى لقوة الشعب لو ماقدرناش نعمل ده يبقى مش هثق فى اى مرحله قادمه

الناس اللى موجوده و بتقول اراء ممكن تتفق على اشخاص اسوأ من شفيق بس يبقى كان فيه اجماع عليه او مايبقاش قادم من سكه تنرفز و تستفز الناس مش عايزين حد يفرض علينا

لو كانوا عينوا الدكتور الجمل مكانش فيه حد اعترض اطلاقا حتى معارضينه

احنا عايزين نشوف مجلس و لو حتى تسيير اعمال مايكنش فيه ناس مستفزه كلنا عارفين عملوا ايه قبل كده و كلنا شايفين بيعملوا ايه دلوقتى

شاركى كان سأل ليه مش بنطالب بتغيير طنطاوى رغم انه نفس المبدأ اجدنى هنا فى حيره من امرى فيه حاجه مثلا مش واضحه فى اسس اللعبه؟؟ اسس اللعبه واضحه جدا
الجيش مؤسسه ماينفعش تغير الوزير بتاعها بالطريقه ديه و خصوصا انه اللى بيدير البلد

فيه ناس كتير مس بتحب ولا تعجب بوزير الدفاع و لكن لان المجلس يدار باكثر من واحد فده بيدى نوع من الهدوء لان اكيد فيه افكار تتصارع عشان تشكل الصالح
و ده امر واقع لا يمكن تغييره فى الظرف الراهن

و اكاد اجزم و الايام هتثبت (انا بحترم طنطاوى جدا ) انه هيمسى من نفسه بعد اختيار الرئيس لانه يعلم انه لا يستطيع الاستمرار و سيسبب حرجا للرئيس من خلفه الا لو قواعد اللعبه تغيرت لسبب او لاخر و سيدخل التاريخ من اوسع ابوبه هو و المجلس

مثل سؤال شاركى هو مثال دقيق لعدم الالمام بالمطالب و عدم الالمام فعليا بطريقه تفكير الناس اللى بتطالب بالتغيير
اكننا قاعدين فى فسحه و بنقول هاتوا ده و مشوا ده من غير مانكون فاهمين الابعاد

الكلام اللى بقوله ده تقريبا كل الناس اللى بتطالب بالتغيير فى اللحظه ديه محفور جواها من غير حتى ماتفكر فيه

يعنى مسلمات مش حاجه بنفكر فيها و ده ممكن ناتج من مناقشات كتير و قرايات كتير او ممكن من العشره فى الميدان

شفيق يا راجل رحيله حتى لو عند هو ضرورى جدا لنجاح الثورة و درس قاس جدا ان اى حد الشعب مش راضى عليه يبقى لازم يمشى

و ارجوكم ماحدش يقول مش هما دول الشعب عشان الكلام ده اتقال لما كنا عايزين نخلع الرئيس المخلوع و اهو اتخلع

النظام لم يسقط و لكن اعتقدنا لوهله انه سقط و لكن لم يسقط

انا عايز اشوف تحقيق مع جمال و صفوت الشريف و فتحى سرور و ذكريا عزمى حتى لو تحقيق عن مسئوليه سياسيه لازم كل واحد ياخد نصيبه

ماينفعش يبقى المحريكن للاحداث نايمين فى بيتهم و احنا بنقول ثورة نجحت

فيه التفاف على المطالب و بقينا بنخش فى مشاكل فرعيه اكتر تتوهنا و الاسلوب ده شفناه كتير قبل كده

و بالنسبه للثقه فى الجيش

انا مش هثق فى حد بيقول حاجه و يعمل عكسها
و مش بقول صراحه انى مش واثق فى الجيس و لكن بقول انى اللى بيدهولى مش فاهمه

المشاركة الأصلية كتبت بواسطة sharky

ليه هو مش طنطاوى و مجلس القوات المسلحة هما المسؤلين عن الوزراء الجدد و هما المسئؤلين عن احمد شفيق !!

فين بقى انضمامهم للثورة و هما لحد دلوقتى :
1-سايبين احمد شفيق رئيس وزراء رغم اعتراض الثورة :)
2- سايبين مرعى و ابو الغيط رغم التغيرات الوزراية !!!
3- فى نفس الوقت موافقين على وزير البترول الجديد و و على منير فخرى اللى المتظاهرين مش عاجبينهم !!
4- سايبين وزير الداخلية رغم ان المتظاهريين مش عايزينه !!!
5- اعلنوا انه سيتم تعديل بنود فى الدستور فقط و لن يتم عمل دستور جديد كما تطالب الثورة !!!
6- لن يتم الغاء قانون الطوارئ حاليا كما تطالب الثورة !!

كل الكلام دا يثبت بوضوح انضمامهم للثورة و متوافقين مع أراءها !!!!!

مش بقول لك الكلام متناقض :)

عارف حضرتك لي الناس مش حتقدر تعمل حاجة مع الجيش حتى لو لم ينفذ طلباتهم و مش حيقدروا يشيلوا وزير الدفاع
لإنه ببساطة السلطة الوحيدة اللى معاه القوة فى مصر :)
و دا يثبت الكلام اللى كنت بقوله ان لو مبارك مشى قبل انتقال السلطة لرئيس اخر
اللى حيحكم مصر الأقوى :)
او كما قال طارق هيومان
فعلا تدار من اكتر من واحد لكن بينفذوا الصالح الذى يرونه من وجهة نظرهم الصح و ليس من وجهة نظر الثورة :)
يعنى من الاخر الجيش خد السلطة بدون ما الثورة تقول و لن تستطيع الثورة جعل الجيش يترك السلطة مهما فعلوا و هو سيفعل ما يراه خيرا للبلد سواء كانت بتحقيق بعض طلبات الثورة او عدم تحقيقها كلها
اتمنى ان رأيك يحصل رغم شكى الكبير فيه :)



سؤال بالمرة هو معنى الشعب يريد اسقاط النظام
ان الشعب عايز يشيل الوزراء اللى كانوا فى النظام القديم و لا فيه ناس تانية ؟؟؟ و هما مين كلهم ؟؟؟

مش عشان الجيش بيقول شفيق يقعد يبقى ضد الثوره
مش كل الى بيقول شفيق يقعد يبقى ضد الثوره
حضرتك ودكتور محمد ضد الثوره ؟؟؟؟؟
طيب ما انتم بتقولوا يقعد
والجيش فيه بعض التصرفات الغامضه الى مش مفسره الى بيعملها والى باعتبرها فوازير مش مفهومه
بس مش ده مكانها
لكن مقدرش اقول غير انه لولاه ما نجحت الثوره هذا النجاح فى هذه الفتره


اما عن اسقاط النظام فالمقصود بيه (من وجهه نظرى ) اسقاط الرئيس واسقاط القله التى تحكمت فى النظام السياسى فى مصر وحكمتها فافسدت الدوله كلها
اسقاط السلطه التنفيذيه والتشريعيه اللذان تم الدمج بينهم بصوره شبه تامه عشان تبقى السطله التنفيذيه هى الى بتراقب على نفسها يعنى لاعب وحكم فى نفس الوقت وهى نفسها التى منعت استقلال السلطه القضائيه
اسقاط الدستور الذى اعطى صلاحيات مطلقه للسلطه التنفيذيه ثم جمعا كلها فى يد رئيس الدوله بصفته رأس السلطه التنفيذيه
وده مش هيتم غير لو كل السائرين على درب الرئيس السابق والموالين له يتم التخلص منهم