نوارة نجم تكتب : شيل كفنك واحفر قبرك وانزل التحرير

**epnmasr** · 26-02-2011 02:52 PM

مسامحينك من قبل ما تعتذر... الخناقة مش معاك.. احنا عارفين طريقنا كويس، وعارفين عدونا كويس، وعشان كده كنا بنطلب منك تسمع كلامنا... كله خير ان شاء الله

مبارك بيتناصح علينا؟

ما عاش ولا كان اللي يفتكر نفسه بيضحك علينا... ده احنا المصريين، نودي اتخن تخين البحر ونرجعة عطشان، احنا طيبين اه، عبط لا، ومش عشان كل اللي حواليه اغبيا افتكر نفسه نبيه

ها؟ اخر حلقات الثورة المضادة ان تحصل مواجهة بين الجيش والشعب؟ ها؟ ده اخر ما جادت عليك بيه المنوفية يا مبارك؟ طب احنا عندنا منايفة انبه منك كتير، ده انت عريت المنايفة

احنا شايلين اكفانا وحافرين قبورنا

وآدي رسالة للجيش المصري باسم الشعب المصري، وايوة باتكلم باسم الشعب لاول مرة في حياتي، وانا ضامنة برقبتي، باسم الخمسة وتمانين مليون بني ادم:

مش حنرفع ايدنا على الجيش المصري، ولا حيطلع من بقنا له غير كل خير، وكل بر، وكل طيبة... واذا احنا هُنّا عليه وقرر يموتنا، احنا بنوعده اننا رافعين ايدينا لفوق، ايادي عزل، وحننام له كمان تحت الدبابة عشان ما نتعبوش في الجري

لئن بسطت يدك إلي لتقتلني ما أنا بباسط يدي إليك لأقتلك... ولا أزقك، ولا حتى أمنعك إنك تقتلني

مش احنا... مش احنا ابدا، ومافيش حد، مهما يعمل، حيعرف يلتف على ثورتنا، واللي احنا عايزينه هو اللي حيحصل، احنا اصحاب الثورة، واحنا اصحاب التضحية، واحنا اصحاب الفلاح... واللي عايزينه هو اللي حيحصل إن شاء الله

يا ريتك بقى يا مبارك تلم تعابينك عشان ما تتعبش قلبك.. سنك ما يستحملش

احنا قلبنا ما بيتعبش، ما عادش خلاص، قلبنا تعب لحد ما نحس، وبعد ما شفنا الجيش بيضربنا مش باقيين على الدنيا دي

اللي عايز يموتنا يموتنا... ويبقى كسب فينا جميلة، واحنا مش حنمنعه يقتلنا، ولا حنمد ايدنا بالسوء، ولا حنلطخ صوابعنا بالشر

مبارك كان دايما يقول للامريكان: انتوا اصلكم ما تعرفوش الشعب المصري

وانت يا مبارك ما تعرفش الشعب المصري

مصر ام الخير... واحنا الخير

والخير له الكلمة الاخيرة .
هذا الخبر منقول للأمانه من موقع أخبار لايف

**mazagngi2010** · 26-02-2011 02:55 PM

قابل تريقه عليها للصبح

**omaroof** · 26-02-2011 03:12 PM

تمام واحلى كلام

**zkralla** · 26-02-2011 03:12 PM

انا موافق على الكلام ده جدا

**tito17182** · 26-02-2011 03:20 PM

تريقة ليه بصراحة كلمها جميل وفهمة فعلاً محدش ضرب الجيش غير الكلاب مين يصدق الناس إلي اعدت 18 يوم وبعد كدة مصر كلها احتفلت على أفاهم يعملو كدة

**تامر.محمد** · 26-02-2011 03:32 PM

توقع دخول حزب (لا للتظاهر من اول يوم) لمهاجمتها و تسفيهها و سبابها و كل ما يخطر ببالك
:)))))))

انا البوست بتاعها ده لحد دلوقت مش قادر استوعبه و اظن انها مطالبة بالتوضيح اكتر

اتمنى ان الناس كمان تشوف الفيديو ده , ده كان امبارح بالليل
[youtube]http://www.youtube.com/watch?v=jP-9--htq_Y[/youtube]

**eman_2404** · 26-02-2011 03:38 PM

احترامى الشديد لكلامها بس هو سؤال واحد
مادام الجيش ليه كل المعزة والتقدير والاحترام فى قلوب الـ85 مليون مصرى ليه لما بيقول انه هو الذى وافق على استمرار شفيق فى السلطة وانه ضامن لهذه الوزارة المؤقتة والتى لن تستمر حتى انتخابات مجلس الشعب وانها حكومة مؤقتة ليه مانحترمش كلام الجيش وليه المظاهرات مستمرة وتطالب بسقوط حكومة شفيق ؟؟!!
مع ان الجيش اللى الكل بيحترمه موافق على الوزارة دى ؟!!!