انا اتصلت بمديري اول ما روحت و قلتله اني مش رايح الشغل النهاردة
لقيته بيقولي ولا هوة كمانو طلع مضرب بس مش عايز يقولي:d
يا ترى مين راح و مين رمى الجتة في البيت اعتراضا على البلاوي اللي احنا فيها؟
و هل كان فيه حد ميعرفش عن الاضراب النهاردة؟
فضفض معانا
عرض للطباعة
انا اتصلت بمديري اول ما روحت و قلتله اني مش رايح الشغل النهاردة
لقيته بيقولي ولا هوة كمانو طلع مضرب بس مش عايز يقولي:d
يا ترى مين راح و مين رمى الجتة في البيت اعتراضا على البلاوي اللي احنا فيها؟
و هل كان فيه حد ميعرفش عن الاضراب النهاردة؟
فضفض معانا
انا في الشغل النهارده..ماقدرش اتخلى عن مسؤلياتي ببساطة كده وإلا أبقى زي الحكومة..وبعدين شغلي مش تكراري وفي مكان مهم (من وجهة نظري) ولو الدنيا وقعت هايجبوني من بيتي علشان اتصرف....وربنا يستر
انا ذهبت الى عملى لأن عملائى اللى شغلهم هيتعطل لا علاقة لهم بمشكلة الغلاء، لكنى تضامنا مع رافضى الغلاء مش هشترى حاجة النهارة ، لا ساندويتشات ولا شاى ولا قهوة ولا بقالة ولا حتى بنزين
واضح ان كل الناس فى الشغل .......... لاتعليق
انا كمان في الشغل
لاني شغلي قطاع خاص واللي هايتاثر العملاء مش الحكومة
بس برضه قررت ماشتريش اي حاجة النهاردة
ولو غبت هايخصموا يوم وخلاص مش فارقة معاهم
فارقة معايا انا
انا برضة روحت النهاردة...
وبرضة علشان طبيعه عملي....خصوصا الفترة دي...لاني حاليا شغال في قطاع حيوي ...وصعب اي حد يتخلف...والا ممكن تحصل بلاوي اكثر ايزاءا من ارتفاع الاسعار...
بس وانا رايح شغلي...
مش هاتصدقوا.....
البلد فاضية....فعلا ...منظر رهيب...وكانة يوم جمعه...او حتي اجازة ....مافيش ناس في الشارع مافيش مواصللات زحمة....مافيش عربيات علي الطريق...
زيك تمام
غير اني غير مقتنع بالاضراب ده نهائي .
عايزين تضربوا - امسكوا حاجة حاجة ... مش نضرب علشان البلد وحشة و الجو برد و الدلع ده ..
اضراب ؟
- عدم شراء لحمة لمدة اسبوع او شهر
- عدم شراء سلعة معينة عليها اعتراض
--
انما ماروحش الشغل علشان الدنيا غالية و البطالة .. و مش عارف ايه بصراحة ده لعب عيال .
انا روحت الشغل النهارده عشان شغال في قطاع خاص وغير كده مش حتفيد الاضراب في حاجه بس فكره حلوه مشتريش حاجه النهارده بس اليزه الوحيده ان مافيش حد في الشارع البلد فاضيه
فعلا .؟ يبقى كده فيه امل .
اعتقد النسبة كالآتي
50% من الناس في الشغل للأسباب السابق ذكرها (أنا منهم)
20% مراحوش الشغل (اضراب)
30% مراحوش الشغل خوفا ليحصل حاجه فآثروا السلامة
انا كمان في الشغل
مش خوف منهم في الشغل والكلام ده
بس انا محتاج الاجازات بتاعتي
انا شفت كميات من عربيات الامن المركزي متجهة الى وسط البلد
فربنا يستر
رامي (ابو احمد)
انا كمان رحت الشغل النهاردة عشان برضو ماعطلش حد من العملاء عشان الناس مالهاش ذنب في زياذة الاسعار
وربنا يهدي الحكومة النظيفة ( :
انا رحت الشغل لأني عل قناعة انه مش هيعمل حاجة ,
الحكومة بتعمل اللي هي عايزاه و اللي بيصب في مصلحة القائمين على الحكم قبل مصلحة أي حد تاني ,
و كل حاجة مطبخة و مسبكة كويس ,
و أي حل الحكومة ممكن تعمله فده مسكن و ليه هدف بالنسبة ليهم ,
بس الملاحظ ان البلد فاضية شوية النهاردة و انا جاي الشغل يعني فيه ناس مخرجتش و عاملة إضراب فعلاً .
أنا عن نفسي طالب جامعي والنهارده أجازتي فقعدت في البيت بس بصراخة قلقان لا يحصل تخريب في البلد ويكون الهبل ده إضراب غير سلمي ..
أنا بقول هبل عشان مش معقول واحد بيشتغل يأذي نفسه وأولاده لما مرتبه يلاقيه مخصوم منه بسبب تغيبه وكمان سمعت أن أي عمل حكومي حيعمل للمضربين تحقيق وكده ....
ـــــــــــــــــــــــــ ـــــــــــــــــــــــــ ـــــــــــــــــــ
أنا من ساكني الأسكندرية وكان عندي إمبارح كورس المهم كانت الدنيا زحمة بطريقة غريبة كله كان نازل يشتري شكلهم كده ... المواصلات كانت متعبه كده .. فسألت سواق المايكروباص لاقيته بيقولي أن في بعض لجان الشرطه بتسحب من السواقين الرخص النهارده(إمبارح يعني ) عشان تدهلهم النهارده عشان يضمنوا أنهم ما يضربوش ... فعشان كده في سواقين خافوا ومنازلوش شغلهم إمبارح ...
يعنـــــــــــــي بصراحة خراب مستعجل بس الناس بتموت حيعملوا إيه بس ...
هو ده الكلام يارجالة ... اضراب ايه وكلام فارغ
واللى راحو الشغل عشان مصلحة العملاء والناس.. سؤال بقى؟؟:confused: االعملاء والناس دى راحت عشان تخلصلهم مصالحهم؟؟ ونسبتهم كام بالنسبة للشغل اليومى؟؟
عشان نغير نظام فاسد لازم يبقى فى تضحيات ولو بسيطة
ايه يعنى يوم من اجازتى يضيع.. ولا مصلحة تتعوض لعميل بكرة ..ولا يوم يتخصم منى.. انت هتفكر فى نفر واللى قاعدين فى البيت بيفكروا فى المجتمع كله..
وفكرة الاضراب عن انواع معينه من السلع عشان( سعرها) فكرة كويسة ومعمول بيها من ناس كتير واناا منهم من رمضان اللى فات ياريت تتعمم الفكرة دى وتنجح زى فكرة الاضراب النهاردة
والمهم فى الموضوع ان المصريين قالوا لأ:):):)
دأنا كونت فاكر أن الموضوع بجد وفى ناس هتضرب فعلا
لكن يخساره محدش أعد فى بيتو غيرى أنا
يا جماعه اللي أنا قصدته بأن اللي حيتغيب بيأذي نفسه وأولاده لأن اليوم حيتخصم عالــــــــــــــــــــفا ضي
لأن كالعاده مفيش حاجه حتتغير ...
أنا عارف أنها نظرة سوداويه لكن ده الواقع في رأيي للأسف..
بعد إذنكوا بس يا جماعة اللي مضرب النهاردة عن قناعة ربنا يوفقه و اللي مش مضرب عن قناعة برضه دي قناعاته و هو حر فيها.. كل واحد ممكن يكون معترض بطريقته، عشان كده ما ينفعش نفرض طريقة معينة للاعتراض.. و للناس فيما يعترضون مذاهبُ :rolleyes:
طبعا جميل اننا كلنا نبقى يد واحدة و موقف واحد ضد اللي بيحصل في البلد من غلاء و استغلال و استهانة بالناس.. انما مش ضروري نتفق كلنا على الطريقة و مدى فاعليتها.
هو تقريبا كل الناس اللى في المنتدي هنا في وظائف حساسه وفي مواقع مهمه والبلد ماتقدرش تمشي من غيرهم مش عارف ليه انا حاسس ان المنتدى منفد على الداخليه
الداخليه اجدع ناس
انا برضه برغم ان الاحد اجازه في امريكا بس رايح الشغل (anti اضراب) عشان برضه زي الباشوات ماقالوا الزباين مالهومش لازمه اقصد مالهوم ذنب
وعلى رأي نجاح الموجى (في دور اسماعيل الحلوف) ياكش تولع
يا اخوان ان الله لايغير مابقوم حتى يغيروا ما بأنفسهم
انا مش معاك يا عزو اظاهر انت بتسمع اخبار التلفزيون المصرى ومش بتبص م ن البلكونة فى انس خرجت صحيح مش بننكر لكن كام فى المية
عشان يبقى كلامنا موضوعى لازم يبقى بالارقام فى ناس فى شارعنا خرجت والعربيات دارت الصبح
لكن برضه جنب ده انا بعينى شايفه برضه ان فى اختلاف والارقام هتتكلم بس متسمعهاش من مصر وللاسف عشان معندناش لا شفافية ولا مصداقية وافتكروا وكسة 67 والاخبار اللى كانت بتتقال
اثبتوا يا مصريين
:):):)
انا كمان في الشغل عشان انا بشتغل في قطاع خاص
و الشركة مالهاش دعوة بالحكومة
وكمان انا كنت متأكد ان مافيش حاجة حتحصل لان الموضوع مش منطقي ان مصر كلها تعمل اضراب
بلاش النظرة السودا دلوقتى
اللى شايف انه مافيش فايدة يبقى اضعف الايمان يسكت احسن
من كان يؤمن بالله واليوم الاخر فليقل خيرا او ليصمت:)
(علا عثمان )غلط ان كل واحد( يعمل اللى شايفه صح عشان الهدف واحد )ده اكبر غلطة لان كده بيبقى سهل الفشل والاختراق طالما هدفنا واحد من البديهى اننا نتفق ع الطريقه :)
كفايه يا جماعه ان الحكومه اتهزت حتي قبل بدايه الإضراب.. ومن النتائج الإيجابيه
1- رفعوا الجمارك علي مجموعه سلع (اظن 100 سلعه تقريبا)
2-كان فيه اجتماع وزاري موسع وكان الحوار فيه قاسي وعنيف
3-التلفزيون المصري كل شويه بيان (الحكومه خايفه)
4-الناس البسطاء حسوا ان ممكن يكون ليهم كلمه لها تأثير
5-فيه كلام ان الحكومه هترحل في خلال اسابيع
احنا من كتر ما احنا مغيبين بقت الأوضاع الغلط عاديه و نسينا يعني ايه نعترض عليها.. مجرد ان يبقي واضح في اذهان الناس ان حاجه اسمها اضراب دي خطوه للأمام وزي ما المثل قال "العيار اللي ما يصيبش يدوش"
وبرده الحكومه هاتعمل في حسابها في اي قرارات جايه ان فيه ناس ممكن تقول لأ
طبعا احنا نفسنا اكتر من كده .. بس بدايه الغيث قطره.. وده أول الطريق مش اخره ..
ويارب الموضوع ده ينتهي علي خير نهايه سلميه بدون اراقه دماء ويجيب نتائج ايجابيه اكبر من كده كمان ..
يا اخى الكريم ليست العبره فى الاضراب وانما العبره فى الاجتماع على رأى واحد و التعبير عنه بحيث ان من يقول انها فئة منحرفة او قلة مندسة يكون فى عداد المجانين وان يكون لنا كشعب صوت مؤثر فى بلدنا الحبيبه مصر
و أضعف الايمان ان اقول أأأأأأأأأأأأأأأأأه من هذا الغلاء و انى معترض على ما يؤول له حالنا
وانا مع الأخت ضيفو احنا بنقول لأ مش موافقين
و بلاش حكاية لعب عيال دى عارض الفكره زى ما انت عاوز لكن لا تسىء للاشخاص المقتنعين بها
و كلنا اخوة
انا مضرب النهاردة وعلشان كده ماطلبتش حاجة من البوفية في الشغل
حتى الساعى قالي اجبلك شاي قوتله لأ انا ممتنع عن الاكل وشرب ودفع اي
مليم النهاردة
:):)
كان معاكم من مقر عمله : باورت :D
طبعا عملا بان لكل شخص رأيه الخاص انا طبعا حاقول وجهة نظرى الشخصية
انا شايف اننا لما كلنا نساهم فى اضراب عام و ننتظر من الجميع المشاركة فيه بدءا من طالب الجامعة نهاية بالدكتور و الموظفين و الى ذلك ده يبقى ( عصيان عام ) ، يعنى تعطيل لمصالح البشر خصوصا لما يبقى فيه ناس ايضا تطالب بعمل مظاهرات و يتطور الموضوع للقيام بطلب ما يشبه الثورة على النظام الحاكم كما قرأت من تعليقات على المواقع المختلفة فى الانترنت و سمعت فى الاخبار ،
انا رأيي انه من الافضل التركيز على شىء معين و تبنى قضية معينة مثل اللحمة الحديد السلع - الخدمات و ما الى ذلك و الدعوة الى مقاطعتها مثلا مثل ما نفعل مع المنتجات الدنماركية و هذا ما له تأثير فعلى و محسوب لكن ان نكون عايزين حال البلد ينعدل و خلاص و نطلب من الناس انها لا تذهب للعمل علشان حال البلد ينعدل يبقى انا شايف انه تأثيره لن يكون ايجابيا لان ببساطة حال البلد لا يعجب احد صحيح و هذا ليس بسبب شخص بعينه او وزارة بعينها هى التى تسبب الحال الاقتصادى المتردى اللى احنا فيه او حتى غلاء الاسعار ، لكن كلنا مساهمون بشكل او باخر فيما يحدث ، و اطراف كثيرة مساهمة فى الوضع الحالى يبقى نبدا بنفسنا اولا و بعد كدة نشوف البلد هل سوف تنصلح و لا لأ ، و اللى يعتقد ان الحكومة هى السبب الرئيسى فى ما نحن فيه حتى نضغط عليها يبقى لازم يعيد تفكيره و يفكر بمنطقية اكثر ،
انا رحت العمل اليوم ليس بسبب اننى باشتغل فى الداخلية و لا حتى باشتغل فى رئاسة الوزرا او باشتغل فى جهاز هام و ليس هام ، لكن بسبب انى عندى عمل اؤديه ، العمل الذى باعمل به لم يضرنى فى شىء حتى اغيب و اضره بانقطاعى فى يوم من المفترض انه سوف يكون هناك ازمه متوقعه فيه بسبب الاضراب بشكل عام .
انا عن نفسى حددت ما اعانى منه فى هذا البلد و هو الاتى :
انا اعانى من ارتفاع حاد فى اسعار سلع غذائية بشكل غير عادى
انا اعانى من تدنى مستوى و جودة سلع اعتمد عليها بشكل يومى
انا اعانى بسبب سلوك يومى لبعض قائدى السيارات غير مسؤل اطلاقا
انا اعانى بسبب ترضى حالة الطرق فى بعض شوارع القاهرة لدرجة سيئة جدا
انا اعانى لان الرقابة على بعض التجار ليس لها تاثير فعلى
و ارى ان انقطاع كل الشعب المصرى عن العمل اليوم لن يحل هذه المشاكل السابقة و لهذا لم اشارك في الاضراب او المظاهرات التى من المفترض انها تحل هذه المشكلة
اما من يرى ان الاضراب و الانقطاع عن العمل سوف يكون له تأثير فعال فى حل هذه المشاكل أو حل المشاكل العامة فى الدولة او حل مشاكله التى يواجهها فى ظل النظام السائد حاليا فاربنا يوفقه و لكلاَ منا وجهة نظره الشخصية وواجب على انا احترام وجهات نظر الاخرين طبعا فى حال انهم يتعاملون معها على اساس انها وجهات نظر و ليس هى الحل او ما يجب اتباعه كلنا .
تحياتى
تمام يا ابو ذياد الله ينور , هى الفكرة ان الحكومة تعرف ان الناس تقدر تتحرك وقت ما تحب , مش الموضوع زيادة اسعار او غلاء او غيرة الموضوع انا صوتنا يكون مسموع بما ان مجلس الشعب بقى مالوش لازمة , لما الحكومة تشوف ان لاء الناس ممكن تتفق على موقف مهما كان بسيط زى اضراب النهردا يبقى ممكن تتفق على مواقف اكبر , و دة مش تحزير للحكومة اد مهوة رسالة من الناس ان احنا موجودين و كفاية تخبط و فساد و الحقو اعملو حاجة قبل ما تخرب خالص , لاننا الان للاسف فى اوضع اسوء من اللى قامت عليها الثورة المجيدة اساسا .
اتمنى ان الرسالة تصل الحكومة و تتعامل مع الموقف بحكمة بدل نبرة التهديد و الوعيد اللى حتخلى الوضع يزداد سؤء , لما الامر يوصل ان البسطاء مش لاقيين رغيف العيش , يبقى فى مشكلة و كبيرة , الشعب المصرى طيب و مسالم فى معظم الاوقات انما الموضوع لما يوصل للاسباب الاساسية للمعيشة يبقى دة خط احمر مكانش يجب اننا نصل لة اساسا .
الكرة الان فى ملعب الحكومة اللى عليها تثبت انها حسنة النية قعلا و يهمها مصلحة الغاليبة العظمى من هذا الشعب , اما انهم يستخفو بموقف الناس و تتم المواجهة على انها تجاوز امنى و خلاص ,فدى اكبر غلطة ممكن تعملها اى حكومة .
أحلى حاجة ان النهاردة الشوارع فاضية
يا سيدي الفاضل انا اؤيد الاضراب .. ولكن مش كدة .. مش علشان اسباب عشوائية و عامة .. الي بيضرب بيضرب لحاجة واحدة في وقت واحد - ذي مشرحت في فكرتي السابقة .
انا اسف معاك حق عيب اقول لعب عيال . بس قصدي كان نتيجته تبقى افضل بكتير لو قاطعتوا اللحمة - الزيت - العيش - السيارات نفسها
او حتى نعمل يومين كل اسبوع بدون سيارات و بنزين ! لما البنزين يغلي قدام ... ده قصدي ..