خير ما عملت!! و أكيد معاك...
خير ما عملت!! و أكيد معاك...
ممكن سؤال يعنى هو المطلوب فقط حل وزراه شفيق وحل امن دوله يعنى مش هيظهر مطالب تانيه مثلا زى اقاله المحافظين حل المجالس المحليه ,واقاله رؤساء الصحف القوميه , تعيين مجلس رئاسى , ايقاف العمل بقانون الطوارئ هل حضرتك هى دى مطالبكوا بس ولا القايمه ممكن لم تلاقيوها بتتحقق ترفعوا سقف مطالبكتكم ولا تنتهى الطلبات الى الابد .
ياجماعة اللى قاعدين ماسكين الغاء قانون الطوارىء ده - دلوقتى الغولى قنون البلطجية اللى موجود دلوقتى
انا بنت كنت بعرف امشى فى الشارع واروح اقضى طلباتى دلوقتى مش قادرة انزل من كتر اللى بسمعه من اللى بيحصل من البلطجية
قبل ما نطلب الغاء حاجة نشوف وضع البلد الاول ايه حاليا
والمجلس الاعلى قال حيتغلى لما الامور تهدى - هو انتم دلوقتى شايفين اى قانون شغال علشان نطلب الغاء قانون الطوارىء
شغلوا القوانين الاول اللى بتحمى البنى ادمين الشرفاء و بعدين نلغى اللى احنا عايزينه
لو تعرفوا توفروا الامان فى الشوارع دلوقتى ابقى اطلبوا الغاء كل القوانين اللى انتم عايزانها
ثانيا بقى بما اننا بنتكلم فى ديمقراطية وكلنا عايزانها يبقى اى حاجة تتعمل باستفتاء واللى عايزينه راى الاغلبية يمشى اى كان عايزين ايه
الاغلبية عايزين اقالة حكومة شفيق يبقى تتلغى -
واى جهاز لو استخدم صح ولسبب يحمى البلد يبقى ايه مشكلة وجوده هو مش الغاء وخلاص
مشكلتنا مكنتش فى وجود اسماء اجهزة معنية علشان نقول نشلها مشكلتنا كانت فى ان الاجهزة استخدمت استخدام خاطىء ضد الشعب
ماهو ممكن نلغى الاجهزة ديه كلها ونخلى جهاز واحد بس يعمل اللى بيعملوا كل الاجهزة ديه حلنا اننا ندعى ان كل جهاز يستخدم لوظيفه
جهاز امن الدولة مفروض يحمى البلد من اى ارهاب داخلى وده اللى مفروض يعمله مش يستخدم ناحية المواطنين وامنهم - فالحل مش انى اقول الغيه - الحل انى اقول اخليه يعمل وظيفته بس
والا لووحنمشى بالمنطق ده يبقى نلغى الشرطة كانت بترهب الناس و بتتعامل معاهم اسؤء معاملة ونلغى الخارجية مكنتش بتجيب حقوق اى حد مسافر بره ونلغى كل الوزارات اللى اتعملت مع المواطن كأنه بيشحت منها ونست ان وظيفته الاساسية هى خدمته
الحل مش فى الالغاء يا جماعة الحل انى احدد وظيفة الحاجة واراقب دايما انها بتعمل وظيفتها صح بناء على اراء المواطنين اللى بتتعامل معاهم
الاخ الكريم tlrsiap
المسئلة مش فرض راي و مش صاحب اخر رد هو الصح و لا صاحب الاقتباسات و الردود الطويلة
الفكرة كلها في المنطق في الرد
فلو الرد خالي من اي منطق تقدر تفهمه .. ماتتعبش نفسك و ترد عليه اصلا و اعتبر انه مش مكتوب في الصفحة
اترك كل شخص يطرح وجه نظره من غير ما تدخل معاه في جدال عقيم ، فلو المعارض لك طرح نقطة كويسة اتناقش معاه و كل المتابعين للحوار مستفيدين و لو لم تصلوا الي اتفاق قم بانهاء الحوار و قوله اتفقنا علي الا نتفق :)
خصوصا و ان المنتدي هنا لا يشكل الا شريحة صغيرة من المجتمع المصري و شريحة غير فاعلة بشكل كبير و هي جزء من الطبقة المتوسطة لان السواد الاعظم من الشعب هما الغلبانين و المطحونين و علي الناحية التانية تلاقي صناع القرار و دول حفنة صغيرة ملهاش علاقة بالمنتدي برضوا ، فكل ما يجري من حوارات هنا هو دردشة و ليست معركة راي
المواضيع المفيدة بشكل حقيقي هي المواضيع اللي من نوعية احذروا من سرقات و اعتداء بشكل معين او من نوعية كيف تدافع عن نفسك و اي موضوعات بتفيد اعضاء المنتدي في حياتهم بشكل مباشر
يؤكد ذلك ان فترة ماقبل تنحي مبارك كانت الاغلبية في المنتدي ضد الثورة و في حالة من التشائم و نجحت الثورة و كذلك في موضوع الاحكام العسكرية و صعوبة الحياة في ظل حكم العسكر و لم يتحقق اي شئ من ذلك و الفوضي و غيرها من الافكار التي طرحت و لم تتحقق
لذلك لو نظرت علي الصورة العامة تجد ان كثير من المداخلات هنا برغم من قوتها و كثرة مناصريها الا انها لا تتحقق في الواقع
الخلاصة ان ارتفاع الصوت او كثرة الردود و طولها و تكوين فرق تتبني افكار و تدافع عن بعضها و تسخر من المخالفين مش معناها انهم علي حق
و العنصر الايجابي باذن الله هو ان الكل يريد مستقبل افضل للجميع لكن بطريقته و فكره الشخصي
و الله اعلم بالنوايا و احسب جميع الاعضاء علي خير ان شاء الله
نقطة اخيرة: البعض يعتقد ان ما نمر به الان هو ظرف استثنائي و انقلاب في موازين الحياة و تغيرات جزرية في المجتمع و طريقة الحياة
لكن للاسف الحقيقة هي ان ما نمر به حركة تصحيح بسيطة جدا و ان اللي بيحصل ده مش اكتر من زغزغة للمجتمع
فلا اري داعي للخوف الشديد و المبالغة في ردود الفعل و كأن السرعة في محاسبة الفاسدين و التخلص منهم و رفع الظلم عن المظلومين فورا ستذهب بالمجتمع الي جنهم و بأس المصير
ياجماعه الراجل زي مايكون عايز يعرف اللي نازل مظاهره بكره يدخل يقول انه نازل ومش طالب من اللي رافضين انهم يدخلوا يقولوا احنا مش نازلين
كلام حضرتك حلو بس أنا ليا تعليق على موضوع قانون الطوارئ, فى حياتى كلها ما شفتيش قانون الطوارئ بيستخدم غير لاصحاب الرأى و السياسين.. و بعدين ما قانون الطوارئ لحد دلوقتى شغال و البلطجية أعدين براحتهم جدا... البلطجية موجودة بسبب الشرطة اللى مش عايزة تنزل و لا كأنهم بينتقموا مننا !! دا رأى و طبعا مش لازم نتفق فيه ... تقبلى تحياتى
شفيق لا زم ينزل
شفيق لازم يرحل
معاك تماما ...... وفاهم كويس قصدك ايه
تعالوا نكلم عن نفسنا ...... عن الناس الى لسه بتأيد الثورة و استمرار التظاهر
ايه اللى المفروض ( من وجهة نظرى المتواضعة) الى نعمله دلوقتى
بس نقول الى لينا والى علينا
هى المظاهرة يوم الجمعة بتوقف حال البلد ازاى ؟؟؟؟!!!!!
هى المظاهرة يوم الجمعة بتدمر اقتصاد البلد ازاى ؟؟؟؟!!!!
هى المظاهرة يوم الجمعة بتعرض البلاد للضياع ازاى ؟؟؟؟؟!!!!
انا اعرف ناس كتير ..... بتشتغل طول الأسبوع و تنزل المظاهرة يوم الجمعة و بعد كده تروح
ايه المشكلة فى ده
من اول الثورة و ناس كتير للأسف ..... محملة الثورة مسئولية وقف حال البلد
كأننا احنا الى قولنا للشرطة اضربونا و موتونا و بعد كدة انسحبوا
و مافيش حاجة اسمها السياحة اضربت و السياح بيهربوا من بسبب المظاهرات
ثورة مصر ضربت اروع مثل قدام العالم فى الحضارة و الرقى
اللى خلى السياح و الخواجات يهربوا ...... انعدام الأمان بسبب هروب الشرطة
ده اللى لينا
ايه بقى اللى علينا و ده الأهم
طريقة خطاب الثورة لازم يتغير .......
ماينفعش ندخل فى معارك جدلية تخسرنا جزء من الناس ...... اتفاق الناس و وحدتهم و رغبتهم فى الأصلاح و التغيير اللى بيأدى انهم ينزلوا الشارع ...... هو ده سلاحنا الوحيد
فى اختلافات كبيرة على شفيق ....... خلاص ماشى بلاش شفيق يمشى ..... فى سبيل وحدة الصف
بس اكيد مش حنلاقى اختلافات كبيرة على ممدوح مرعى ..... على ابو الغيط .... على صفوت الشريف ..... على زكريا عزمى ..... على حبيب العادلى ..... على جمال مبارك
و اكيد اكتر مش حنلاقى اختلافات كبيرة على سرعة اجراء التحقيقات و محاسبة المتورطين فى موقعة الجمل .... فى ضرب المتظاهرين بالرصاص الحى ...... فى انسحاب الشرطة .....
ممكن مثلا تبقى الجمعة الجاية عنوانها اقالة مرعى و ابو الغيط و محاسبة بقيت الشلة الزبالة
ممكن يبقى عنوانها تطهير الداخلية ...... محاسبة القتلة و الجناة و الفاسدين
ممكن يبقى عنوانها بناء مصر و دعم الجيش فى مهمته الوطنية و هى محاربة الفساد و اصلاح البلد
لو الناس مختلفين على شفيق ....... بلاش نعمق الخلاف و نزود الشرخ
نقصقص ريشه ...... وهو كده كده ماشى
و بلاش موضوع البيات فى التحرير و الأعتصامات و الكلام ده
كفاية المظاهرات المليونية ايام الجمع ...... مع تكثيف المجهودات طول الأسبوع لحشد أكبر عدد ممكن من الناس
و بلاش بلاش بلاش نخاطر بعلاقتنا بالجيش
لأن لازم نصدق ان الجيش مع الثورة حتى لو شكينا شوية ...... مش عايزين مصر تبق ليبيا تانية
احنا ببساطة محتاجين الجيش جدا
ههههههههههههههههههههههههه
انا حسيت ان الموضوع عامل زي المظاهرة في وسط المنتدى
شفته و كنت عامل بيه موضوع قبل كده بس للأسف ما لاقاش اهتمام كبير , لو تحب نناقشه نناقشه , لو تقدر تفهمني ايه الميزة من نقطة دستور جديد دي يقى الله يكرمك لأني مش فاهمها
ما تنساش وزير العدل مهندس تزوير الانتخابات و وزير البترول بتاع تصدير الغاز لاسرائيل و وزير الداخلية الكذاب و وزيرين النقل و الطيران اصحابه اللي ساحبهم وراه في كل حتة
انا نفسي اعرف ماحدش فكر في نقطة حل الحزب الوطني دي , سيبك من حل الحزب , الأشخاص اللي فيه مفروض عليهم قضايا فساد , مفروض قضايا الفساد اللي عليهم زائد الحزب اللي أفسد مصر , تؤدي لمنعهم من العمل السياسي خالص
سيبك من اي حد بقى , تخيل اننا في منتدى مكون من موضوع واحد و بنتكلم هنا , فيه موضوعين مطروحين دلوقت , اولا مسألة الدستور انا عايز حد يفهمها لي , و ثانية مسألة امن الدولة
انا قلت على الأقل , المطالب التانية دي موجودة من الاول , هل استأذنك تفتح موضوع بعنوان مثلا ماذا نريد من مصر , و نتكلم فيه مع بعض ؟
لا أملك الا ان أحييك بصراحة , بس انا شايف ان فيه ناس كتير فاهمين غلط و حاسس ان الواجب تجاه مصر و تجاههم نفسهم ان الواحد يحاول يساعدهم على الفهم , ايه رأيك ؟
بص خلينا الاول نفرق بين حاجتين قانون الطوارىء وحالة الطوارىء - لازم فى اى بلد يكون فيه قانون للطوارىء لكن اللى كان غلط ان حالة الطوارىء كانت شغالة طول الفترة اللى فاتت لحد قبل 25 يناير وده اللى مكنتش فيه البلد وكمان الغلط انه كان بستخدم غلط ضد الموطنين بالنسبة لاراء ومفيش حد بيحاسب على ده
فيبقى الاولى انى اصلح الغلط بمعنى انى الغى الحالة ديه لما الامور تستقر ده اولا وكمان يوم ما يستخدم يبقى يستخدم فى موضعه الصح علشان يحمى بلد
والمجلس الاعلى قال انه الحالة حتترفع لما الامور اللى فى البلد تهدى وحدودها ان قبل الانتخابات حيكون الحالة اترفعت وتعديلات الدستور اتعملت فى حقنا فى الموضوع ده
وبالنسبة للشرطة تفتكر دلوقتى الاهم انى الغى قانون ولا انى اطالب بوجود القانون فى الشارع احنا دلوقتى مفيش قوانين مفعلة غير قانون البلطجية وده لازم ينتهى بمعنى ان الشرطة تنزل وتشوف شغلها بما يعمل صالح المواطنين من غير اى اتجاوز منها
ولو حصل تجاوز يبقى يتحاسب
احنا لازم نطالب بوجود الشرطة ونحاسب ليه هى مش موجودة ده حقنا اصلا