المشاركة الأصلية كتبت بواسطة amahmed
التحية واجبة لحضرتك و لكثير من اعضاء المنتدي المحترمين اللي مش شرط نكون صح في كل مشاركتنا لاننا بنجتهد و بندردش و بنستفيد من خبرات بعض
المهم هو ان المشاركات تكون عقلانية و محايدة و ليست علي شاكله نقول ثور يقولوا احلبوه
رغبتك في التوعية مشكورة لكن مش كل شخص ينفع معاه نفس اسلوب النقاش
زي اللي مش بيعرف يعوم في وسط البحر و شخص نازل ينقذه
في شخص لطيف هادي حيلقط بسرعة ان الشخص اللي نازل ده جاي يساعده و ينقذه
و في شخص الخوف سيطر عليه و عمال يضرب حتي الشخص اللي بيحاول ينقذه و ده له حل من اتنين ياتزعق فيه جامد علشان يركز و يهدي او تضربه علي دماغه و يفقد الوعي و تنقذه و دول الاغلبية
و ده يترجم في المنتدي انك تفحمه بالدليل اللي ما يختلفش عليه اتنين و بالخبر الرسمي و الفيديو و الاوديو
الصنف الاخير ده مفيش منه امل حيخدك معاه و يغرقك و يوجع لك دماغك ده الافضل تسيبه في حاله و لا تلق له بال و محدش يقدر يقنع كل الناس و لا حتي الانبياء
و لعلمك محاولتك لاقناع الصنف الاخير ما هي الا وقود ليستمروا في المجادلة لمجرد اثبات التفوق في المناقشة بنظام الصوت العالي و التثبيت بالكلمة و السخرية مش علشان نوصل لترضية لجميع الاطراف و نوصل لحل لمشاكلنا في اسرع وقت
لان ببساطة اللي عاجبه شفيق و وجدي هو بيدفع بدون وعي لاستمرار غياب الشرطة و انتشار البلطجة و تهريب فلوس و حرق مستندات و .. و ...
في حين لو واجهته بكده حيتهرب و ينفي و يفتح معاك اي سكة تانية زي ان مهما اتعمل الثورجية مش حتبطل تظاهرات و اعتصامات و المواطن البسيط ابو يومية و شعارات من النوع ده ن في حين ان كل ردوده و النظريات اللي بيطرحها لا تحققها و لا تسعي لها و لا هي في مصلحة حد الا في مصلحة الفاسدين باعطائهم فرصة لتوفيق اوضاعهم