الموضوع: ثوار نايل موتورز - أنا أييد د/ عصام شرف رئيس وزراء مصر - من معي؟

ثوار نايل موتورز .. من كنتم تطالبون باقالة أحمد شفيق، كان دعاة "الاستقرار" بيتهمونا اننا مش بيعجبنا العجب واننا بنعترض والسلام واننا بنخربها وان سقف مطالبنا بيرتفع واننا عمرنا ما هنرضا.

شفيق مشي وجاء عصام شرف.
الراجل معروف عنه عدم رضاءه عن النظام البائد، على عكس شفيق ... أكبر مدافع عن مبارك قبل خلعه ورمز لاستمرار النظام بعد الخلع.

الراجل شارك في الثورة في مسيرة أساتذة الجامعات من جامعة القاهرة لميدان التحرير مطالبا باسقاط النظام.
اضافة على انه مشهود له بالكفاءة زي ما أنصار شفيق كانوا بيقولو عليه.
اسمه كان مطروح من بعض رموز المعارضة كمرشح مقبول لديهم لرئاسة الوزراء.

أعتقد ان معظم زملائي من أعضاء نايل موتورز المطالبين باستمرار المظاهرات راضيين عن دكتور عصام شرف.

أرجو منكم (واحنا عارفين أسامي عضويات بعض تقريبا) المشاركة واثبات تاييد دكتور عصام. ده طبعا لو انت مؤيده.

عايزين نكسب الناس ... عايزين نقول لهم اننا ممكن ارضاءنا ومش بنعترض والسلام. ان مطالبنا معقولة وفي مصلحة البلد على المدى البعيد. اننا مش مع الفوضة ومش عايزين نخرب البلد. ان كل ما المطالب بتتحقق كل مصر بتكسب و المظاهرات هتقل والدنيا هتهدى. لكن ما تتطلبوش نهدى والمطالب ماتحققتش.

اقالة شفيق وتعيين عصام شرف خطوة رائعة في الاتجاه الصحيح.
لو مكانش شفيق مشي كانت مظاهرة بكرة هتقى ضخمة.
بكرة كانت هتبقى مسيرات من الجوامع واعتصام قدام مجلس الوزراء وكانت هتبقى ليله.
بس مجرد اقالة شفيق حولت المظاهرة الغضابة الى حفلة. مع التأكييد طبعا على بقية المطالب.

وصدقوني كل لما المطالب هتتحقق السقف مش هيزيد ولا حاجة والدنيا مش هتولع أكتر، بالعكس هتهدى.

ولو في ناس مش عاجبهم عصام شرف فهم أقل بكتيييييير من اللي مش عاجبهم شفيق.

حققوا مطالب الناس لغاية لما معظم اللي في التحرير يمشوا ولو فضل 50 واحد مش عاجبهم العجب هما حريين. ساعتها فعلا مش هيكون ليهم أي تأثيير ومش هيزعزعوا الأمن والكلام ده كله.

معاً لاثبات حسن النية واننا مش شوية ناس واخدين الثورة لعبة وميدان التحرير فسحة عشان نقرف البلد كلها.

المشاركة الأصلية كتبت بواسطة atef_rashad

هاتوا الجروب علشان انضم معاكم
وياريت صاحب الموضوع يحط استفتاء

مشاركة أبو نضال نفسها وصلة للجروب.

وموضوع الاستفتاء ... هشوف كده.