السلام عليكم و رحمة الله و بركاته
يا جماعة, هو احنا كل مايجيلنا مسؤول من أى نوع و يقعد شوية و يمشى, هنعمله مبادرة تأييد و تكريم و تأبين و الكلام اللى من القرع ده, ده احنا كده مش هنخلص, ده احنا داخلين على أيام بيضا, هتتكشف فيها حاجات كتير و مسؤولين كتير هتطير .
أحمد شفيق كان راجل OK و 100 100 , ماشى , على دماغى, بس مش معنى أننا طالبنا باقالته, أننا نبقى بنشتمه, الراجل أحمد شفيق ده زى العربية الMERCEDES S class و عصام شرف زى العربية الBMW 7 series , تمام, مش معنى أننا سبنا المرسيدس و ركبنا البى ام, أن المرسيدس دى عربية وحشة,اطلاقا, الشعب من حقه التغيير لمجرد التغيير و لا يسأل عن أسباب التغيير, طالما أن الأغلبية و الجماهير أجمعت عليها, بس كده و خلاص.
الراجل اشتغل شهر و احنا كناس , منا اللى بيفهم و منا اللى مابيفهمش, شوفنا, أن أداؤه غير مناسب خالص للفترة اللى احنا فيها و أنه به شبه ولاء للنظام القديم, أيا كانت أسباب الولاء ده, هل هو لأنه ليه مصالح معاهم و لا لأنه راجل ابن أصول, أيا كان السبب, خلاص, هو مش مناسب و خلاص و أى مسؤول ييجى البلد دى بعد كده, لازم يبقى عارف أنه هيقعد شوية و يمشى و أن لا يوجد من ولدته أمه, عشان يفرض رأى ما أو مسؤول ما على الشعب و المسؤول اللى عاوز ييجى للمنصب و مايسيبهوش, أمامه حل من اتنين, يا اما يستشهد و هو فى المنصب, يا اما مايجيش المنصب خالص.
لكن نظرية تأليه المسؤول, دى مرفوضة تماما, أنا عارف أن الشعب المصرى شعب عاطفى, بس بالتعود و مع كتر تغيير و حساب المسؤولين بصرامة, العواطف دى هتهدى شوية.
عالله بس, ماحدش يقول نعمله مسيرة الجمعة الجاية فى ميدان مصطفى محمود هو راخر .