صباح الخير !

انا لسة راجع من توكيل فيات .. كنت بشتري مرايا بدل الي اتكسرت و رحت اسلم علي مهندس هناك طلع كان معايا في الجامعة !

بدون الدخول في تفاصيل !

لفيت Fiat Linea واقفة هناك نفس اللون ده بالظبط :


كان نفسي اركبها من زمان و كنت بطلع ساعات مع المهندس اجرب معاه السيارات ! فقلت فرصة !

رحت ! و ياريتني مارحت !
السيارة للوهلة الاولي زيرو ! من غير نمر ! بكياس الفرش .. كله كله ..
تلف من الناحية التانية .. و تلاقي العجب !
من اول الفانوس الامامي لحد الفانوس الخلفي مفيش حاجة !

مفيش حاجة مفيش حاجة !

الفانوس متشال و الرفرف متشال و الجنط مكسور و البابين متشاليين و مرميين جنبها و الرفرف الخلفي متشال و الفانوس الخلفي بقى لمبة داخلية للناس جوا :)

جالي حالة هلع ! لآنكم مش حتصدقوا العربية جميلة ازاي ( اساسا ) .

سألت المهندس قالي انها كانت طالعة من التوكيل في الصحراوي ,, و في واحد طالع من توكيل مرسيدس بسيارة C-class الجديدة .. لف غلط و دخل في جنب اللينيا .

والاتنين كانو زيرو ! ( يا ساتر يا رب )
المهم الحمد الله السياراتين ادغدغوا من غير اي اصابات بشرية .. فقط اصابات محفظية !

المهم برده طنشت كل ده ورحت راكب السيارة من جهة السواق السليمة ! و قعدت في التابلوه الجديد ! و لفيت المفتاح فيها !
قلت اكيد يعني مش حتمشي .. ركب المهندس جنبي .. قالي متغير بقى و تجيبلك لينيا .. المهم .. قعدنا نرغي شوية علي توكيل فيات و فيات عامة ... جاه عامل يبفك حاجة من وش السيارة ...

و سبحان الله ! و انا بتكلم ... شعرت بحاجة غلط ! شبيت بجسمي شوية اشوف العامل فين ! و ياريتني ماشبيت !!!

انفجـــــــــــــــــــــ ــــــــــــــــار مدوي في وشي !!!! كا حد رزعك بوكس حاطط فيه قالب طوب من التقال الحلوين دول !
حسيت ان وشي اتعوج ! لحد دلوفتي !!

المهم مكنتش مدرك ايه الي حصل اصلا !
اتاري الاخت " Airbag " ضربت في وشي !

طب ليه ؟؟ معرفش العامل لعب في ايه في وش السيارة عملت كدة و بما انها طالعة من حادثة ! حمدت ربنا انها معملتش Self-Destruct ولا حاجة !

الناس اتلمت كلها .. و مدير المهندس صاحبي لعن المهندس بكل ماطاب و رق من الشتائم !
انا كنت فاكر انه كان خايف عليا !

بس طلع خايف علشان حيغيرو كدا Airbag و دركسيون علي حسابهم ! ابن ال !!

ربنا ميوريكم ... الاAirbags مفيدة فعلا .. بس مش وانت واقف !!

اه يا وشي !
فيات ضربتني علي وشي !!! عيب والله !