عربيتك مشيت قد ايه قبل ما تفتح موتورها.. احكيلنا تجربتك..

**Ahmad Allawy** · 07-04-2008 10:07 PM

السلام عليكم..
الموضوع اللي انا باسأل عنه ده لما كل واحد فينا يقولنا عن تجربته الشخصية في عربيته .. هنعرف منه متوسط عمر الموتور الافتراضي للعربيات بانواعها و موديلاتها المختلفة.. واكيد الرقم مش هيبقي دقيق قوي لكن اهو هيدي فكرة كويسة..
يفضل مين يشارك يقولنا نوع عربيته ايه..
ولو عمل طقم شنبر مثلا عمله علي كام كيلو و عمرة علي كام الف..

**Ahmad Allawy** · 07-04-2008 10:16 PM

انا عن نفسي هافتتح الموضوع ,,
العربية اللي معايا حاليا الحمد لله موتورها ماتفتحش قبل كده .. هي كورسا 1200 هاتش باك موديل 97.. ماشية 133 الف كم..
انا شاريها مستعملة عاملة 130 الف الا كام كيلو.. من 3 شهور.. يعني مشيت بيها حوالي 3 الاف كيلو بس.. ساعة ما اشتريتها كان كبس موتورها في التوكيل لما قيسته 175/200 بمقياسهم..
العربية اللي كانت معايا قبل دي كانت فيات 125 بولندي موديل 83 1500 سي سي ..
عملت عمرة موتور كاملة علي 50الف كم.. انا شاريها كانت ماشية خوالي 20 الف.. و كان معمول فيها شنبر قبل كده بس مش عارف بصراحة علي كام كيلو..
بس هي مشيت معايا 30 الف و اكيد كانت ماشية قبلها كتير..
اكيد الرقم اللي انا كاتبه ده مش طبيعي.. بس هي العربيات الفيات بتقلب عداد علي 100 الف..
وبالتالي انامش عارف العربية كانت ماشية 120 الف لما اشتريتها ولا 220 ولا حتي 20 الف بس..
بس المنطقي انها في 20 سنة لما اخدتها مش هتكون مشيت اقل من 120 الف.. ولو انها انا متوقع انها كانت 220 مش 120..

سمعت كلام من قريبي كان شغال في توكيل اوبل عن افضل و اسوأ حالات للكورسا الهاتش باك اخت بتاعتي دي..
اسوأ حالة كانت بيتفتح موتورها كانت عربية شركة يعني متبهدلة و اللي بيسوق بيحرت بيها و بيفتري عليها.. كانت عاملة 300 الف كم لما اتفتحت..
وافضل حالة كانت علي 800 الف و لسة ماتفتحتش.. بس برضه كانت عربية شركة. بس طول ال13 سنة اللي العربية ماشية فيهم نفس السواق.. وراجل كبير و سواقته هادية و بيحافظ علي العربية جدا..
من الحالتين دول انا باقول لو حدنا متوسط.. هنلاقي ان الكورسا دي مثلا.. بنتكلم في 500 الف كم من غير ما الموتور يتفتح..

**Mzeid** · 07-04-2008 10:20 PM

بص يا سيدي إحنا عربيتنا الهامفي - 128 :D - موديل 1978 إيطالي أصلي موديل السنة و إترفعت لحد 1988 و عاملة 140.000 كلم لسة و الله رايح للميكانيكي النهاردة و فتحها قبل كدة كانت حاجات بسيطة يعني ( بطارية - سير - كبالن السنة اللي فاتت بس - .......) الحاجات البسيطة دي و ما غيرتش صاج خالص ها إيه رأيك فبها ؟! ;);)

**Ahmad Allawy** · 07-04-2008 10:32 PM

انا باتكلم عن الموتور و فتح الموتور المقصود بيه شنبر او عمرة..
بس ما شاء الله.. كده يعتبر كويس قوي.. و لسة كمان..
يعني انت لو سواقتك مش بتهين العربية و بتقرص عليها كتير.. ممكن تكمل معاك 170 ولا 180 الف من غير ما تفتح الموتور..
واكيد الايطالي موتورها هيبقي معمر اكتر من اليوجوسلافي ولا المصري اللي بعد كده..