أنا شخصيا بكره بشدة الصوت العالي و دايما بشوف أن صاحب الصوت العالي بيفقد حقه حتى لو ليه حق. أنما أحقاقا للحق أنا شايفة أن الناس ماسكة في الأسواني و متجاهلين تماما كمية الجليطة و قلة الأحترام اللي شفيق أتعامل بيها لحد ما وصل الأسواني لانفعاله ده.

أولا أنا لو بكلم واحد و كل شوية يقول لي انت مش فاهم و مصر يكررها بالشكل المستفز ده أكيد أنا حتنرفز. ده شفيق في مرة وسط كلام الأسواني قال له باللفظ "انت مش فاهم حاجة" و شوح بوشه الناحية التانية بمنتهى الجليطة اللي في الدنيا. و فضل طول الحوار بتكلم بطريقة مستفزة جدا. ثانيا اللي يسمع الحوار بتركيز حيلاقي شفيق نفسه كان معلي صوته و بيزعق انما الفرق ان الأسواني بطبيعته صوته جهوري و فيه حدة انما شفيق راجل رقيق و بتاع بنبوني, فحتى لما على صوته و زعق طبقة صوته أوطى من طبقة صوت الأسواني انما هو برضه كان بيزعق و منفعل. مش فاهمة الناس بتقول على شفيق محترم و زوق ازاي؟؟ و الخناقة اللي في الأخر اللي تعدت الحدود طبعا من الطرفين مش من الأسواني بس, كان شفيق هو السبب فيها لما قال بانفعال للأسواني "متلبسليش ثوب الوطنية يا علاء أنا وطني أكتر منك"!!!!!!!!!!!!!! بالذمة دي طريقة كلام محترمة؟؟ يعني أي حد منا مكان الأسواني مش حينفعل, كل واحد حسب أسلوبه بقى؟