الموضوع: أسألتى كتير شويه عشان العربيه لسه جايبها معلش استحملونى :(

يا باشا مبروك على العربيه الاول وربنا يكفيك شرها يا رب ويستر طريقك
اما بالنسبه للاسئله الى انتا بتتكلم فيها فكلها منطقيه للى اول مره يجيب ابيزا بص بقى يا سيدى
1 - المارشدير هوا بيبقى سوسته لتحت حته صغيره قوى وبعد الغيار الاول على الشمال يعنى تسحب ااخر الشمال وانتا بتجيبو وهتتعود عليه
2- الكساحات اولا هيا بتترش عند البوهيجى بماده زى البلاك محببه شويه ولو فيها اى كسور بتتلحم ولو فيها اى اعوجاج بتتعدل ولما بتترش مش بتبان علشان المحبب ده بيدارى العيوب وبيبقى قوى شويه بالنسبه للبارومه والحاكات
3- هوا الماتور الى فى عربيتك كام cc وعموما انا عن نفسى مشوفتش ابيزا صوت الماتور بتاعها مش عالى ومتهيئلى انها لذيذه مش وحشه
4- فرش العربيه حضرتك بالنسبه للتوفيقيه بيعمل حوالى 100 جنيه ولو هتفصل بيكلف من 600 الى 1000 جنيه لو هتعملو جلد بس التوفيقيه مش وحش وشكلو كويس جدا بالنسبه لسعرو
5 - التوفيقيه لو مش عارف مكانها تعرف دار القضاء العالى لو وصلت هناك خلى دارى القضاء العالى على يمينك وامشى تالت شارع تقريبا على الشمال ومعروف قوى ــ اما الحرفيين فمش هعرف اوصفهالك الا لما اعرف انتا ساكن فين علشان اقولك هتروحها ازاى
6- قطع الغيار مينفعش اقولك هاتها استيراد او جديده علشان فى حاجات لازم تجيبها جديده وحاجات تانيه استيراد فيها بيبقى احسن وخصوصا فى قطع الغيار الجديد احسن فى معظم الحالات
7 - دواسة البنزين طبيعى جدا فى الابيزا وفى كتير من العربيات انها بتبقى نازله شويه عن الفرامل والدبرياج والصراحه انا مش فاهم انتا عاوز ترفعها ليه

انت راجل تمام والله والف شكر وبالنسبه ل أستفساراتك:
1- انا عارف اه ان المارش سوسته لتحت ولفوق زى الاول كده بس طبيعى انه ييجى معايا من رابع مره مثلا؟ يعنى هى مسأله تعود؟
3- الموتور 1300 والصوت لزيز اه بس أنا كنت عايز اعرف ده طبيعى ولا لا وانت قلتلى طبيعى الف شكر
4- اه 100ج فعلا قليل انا اتوقعت اكتر من كده بكتير
5- التوفيقيه تقريبا عرفتها من وصفك اللى زى الفل :d وانا ساكن ف فيصل
6- بالنسبه ل قطع الغيار بقى لما احتاج حاجه هبقى أسأل هنا ف نفس الموضوع وانت تقولى بقى :)
7- انا مش عايز ارفعها عادى مش مشكله بس هى كده طبيعيه؟ وحكايه انها ساعات بتسقط منى وكده ... بيتهيألى ده مش طبيعى صح؟

بس انا وديت العربيه ل واحد متخصص ف الفتيسات :d
يعنى اكيد عايز يشتغل وقالى مافيهوش حاجه حتى بص وجابه من اول مره ورجعه تانى وجابه تانى من اول مره برضه وانا بدأت اجيبه من اول او تانى مره بالكتير بس المشكله بيبقى فى صوت كده غريب كأنه بيحك ف حاجه ف انا مش عارف الصوت ده غلط ولا عادى؟