لانسر 2006 هاف سبورت مستعملة ولا صنى اى اكس جديدة

**hanyyacot** · 09-03-2011 02:00 PM

السلام عليكم ,
يا جماعة ارجو الافادة , قدامى لانسر بومة 2006 اوتو هاف سبورت وفتحة سقف وكل حاجة وحالتها ممتازة لانها بتاعة واحدة قريبتنا ومحافظة عليها كويس وعلى ايدى الكلام ده , ده غير انها فى محافظة صغيرة ومش بتهلكها ولا بتخرج بيها كتير وسعرها تقريبا فى حدود 80000 , ولا اجيب نيسان صنى جديدة اوتوماتيك ب اوبشنز اقل من الصنى فى حدود 90000 بس زيرو وانا اللى قلبى معلق بالزيرو , هل اتغاضى عن عيوب الصنى انها تقفيل مصرى وسعرها اللى هايبقى اعلى من اللانسر ب 10000 , ولا اجيب اللانسر العربية اللى مفهاش غلطة وحالتها كويسة بس مستعملة وسعرها اقل من الصنى وانا اولى بالفلوس دى , ارجو الافادة ضرورى لانى مفروض اخد قرار قريب , وعايز حد يفتح عينى على حاجات ممكن ماكونش واخد بالى منها وانا باخد القرار , وشكرا مقدما لاهتمامكم

**hanyyacot** · 09-03-2011 04:23 PM

ايه يا جماعة 26 مشاهدة ومحدش بل ريقى بحاجة , محدش ناوى يستفتح ولا ايه , وعمال اقول مفروض اخد قرار بسرعة وكده , ليه محسسنى انى نكرة كده

**bero0o0o0** · 09-03-2011 04:41 PM

حضرتك اللانسر دي غالية كده شوية
لو نزلت ل 75 خدها احسنلك من الصني
لو فضلت على كده يبقى الصني احسن عشان زيرو

**osama_ruan** · 09-03-2011 07:39 PM

لو ب 70 تبقا تمام

**hanyyacot** · 10-03-2011 10:11 AM

يعنى واضح من ردود السادة الافاضل ان فى موافقة على مبدأ اللانسر المستعملة احسن من الصنى الجديدة , وبالنسبة للسعر احتمال كبير انزله ل 77000 وكمان هادفع النص مقدم والنص التانى على 6 شهور انشاءالله , انا بس عايز اتأكد من موضوع المبدأ , ان لانسر مستعملة وبحالة نضيفو اوى تبقى احسن من صنى جديدة

**bero0o0o0** · 10-03-2011 12:24 PM

هو من غير نقاش اللانسر زيرو احسن من الصني زيرو
و حضرتك بتقول انها نضيفة اوي يعني قريبة من الزيرو
بس هو بصراحة 77 بردو كتير عليها

**SonaSteel** · 10-03-2011 03:17 PM

السلام عليكم
والله أنا رأي ان الزيرو زيرو ... والمستعمل مستعمل
اللانسر نضيفة .... روح اكشف عليها في التوكيل حلو اووووي وتوكل علي الله بس متنساش انها برده بقالها 5 سنين يعني كتير
ومتنساش الاستخارة وربنا ييسرلك الحال ان شاء الله
وبالنسبة لقطع لاغيار وديه المفاجأءه .... انزل اسال علي قطع الغيار الاتنين وشوف اي واحده اللي معمرة اكتر وايه الاعتمادية بتاعها اكتر
وربنا ييسرلك الحال
اقعد بالعافية :)))