الموضوع: شكوي مش للأدارة

أولا أنا معاك فى انتقادك لكل اللى اتكتب و فى أى نوع من الإهانة لأى رمز مسيحى و لو حتى بالإيحاء و فى نفس الوقت بجد أنا بشكرك على كلامك الجميل و بحترم رأيك اللى قلته بمنتهى الصراحة فى أول الموضوع على تعطيل الطريق و الشغب اللى حصل و اللى يدل على إنك إنسان محترم فعلا و احنا بنرفض الأسلوب ده لإثارة الانتباه سواء كان من مسيحى أو مسلم و عموما أنا مش هقول نوعية الكلام اللى ممكن حد يتهمنى فيه إنى بقول شعارات زى أنا أعز أصحابى مسيحيين و طول عمرنا عايشين مع بعض فى مكان واحد و بايتين فى بيوت بعض لأن ده حتى لو ما كانش حاصل لشخص حد فينا فهو حاصل مع حد يعرفه و ماحدش يقدر ينكره أصلا لكن نفسى الناس تفهم إن برده فيه نوع من الاحتقان بين المسيحيين و المسلمين زرعه النظام السابق فى بعض مواقف نزاع بينهم لا داعى لذكرها لأننى هنا مش بثير فتنة جديدة و إن كل المواقف دى و الاحتقان ده اتنسى وقت الثورة و أنا كنت فى ميدان التحرير بنفسى على الأقل الأسبوع الأخير بالكامل و شفت مسيحيين كتير و كنت بفرقهم عن المسلمين بالعافية بالسلسلة اللى عليها الصليب أو الصليب اللى فى إيديهم لو شفته بالصدفة أما تصرفات الناس كانت واحدة و موقفهم كان واحد و شكلهم ككيان كان واحد و اللى الناس ما تعرفوش إن أمن الدولة و بعض رموز النظام السابق لقوا إن دى المنطقى الخصبة الوحيدة اللى ما فكروش فيها و اللى قدروا دلوقتى يثيروها حتى إن بدأت معلومات تتداول عن إن حرق كنيسة أطفيح كان فيه عناصر من خارج القرية أثارت و استفزت بعض المسلمين اللى ما عندهمش الوعى الكافى و ساعدتهم على العمل الغير دينى و لا أخللاقى الى عملوه و هى نفسها كانت بتمثل أغلب الناس اللى منعوا المسيحيين من الرجوع للقرية مرة تانية فياريت يا جماعة زى ما بندعو الناس تنسى الاحتقان اللى بين الشعب و الشرطة ننسى الاحتقان اللى بين المسلمين و المسيحيين و اللى زرعه النظام السابق بس عشان يكون ليه فرصة يدخل بيننا و يوقع بيننا تانى لأنه مش لاقى أى حتة ضعيفة يدخل منها غير المشاعر الدينية. أرجوكم فكروا و انتم بتكتبوا و فكروا فى الاضطهاد اللى بتعرضلوا المسلمين فى دول مسيحية و إنكم ما بتقبلوش بده فماحدش يقول دى أقلية و احنا أغلبية مادام رافض المبدأ و إلا ما تعترضوش على اللى بيحصل للمسلمين فى الخارج مادمتم قابلين تتعاملوا مع إخواتكم المصريين بنفس المبدأ و يا رب نفهم عشان نعرف نتجاوز الوضع ده

المشاركة الأصلية كتبت بواسطة seiffoz

دور الـ 32 .. الشعب × الشرطة..

دور الـ 16 .. الشعب × مبارك ..
دور الـ 8 .. الشعب × حكومة شفيق ..

دور الـ 4 .. الشعب × أمن الدولة

الدور النهائي.. الشعب × الفتنة الطائفية..



هنكسب إن شاء الله

خد بالك بنلعب علي أرضنا
يعني الجون بجونين
يا مسهل
بس ميجيش حد من بعيد يقولك بشجع اللعبة الحلوة :))))

المشاركة الأصلية كتبت بواسطة aly_hosny

انا شايف ان الموقف بدا يتحل بعد الندوة ال اتعملت انهاردة في قرية اطفيح و الواحد بدا يرجع يسمع كلام جميل من الطرفين

المشكلة دلوقتي يا جو فعلا ان فيه ناس غاوية خراب
من اول يوم و الجيش وعد ببناء الكنيسة و بقى يامن القرية بنفسه بس انا عايزك تقرا و تسمع كلام واحد زي مايكل منير
قمة السفه و التخلف و قيادات الجيش تقوله عايز ايه تاني تلاقي بيقول كلام غريب و حجج هبلة زيه
المفروض يبقى في وعي ان واحد زي دا جاي يخربها
والازمة بدات بوصوله مصر

وانا عن نفسي الراجل دا قال ال انا عايز اقوله
youtube - ‫ظƒظ„ظ…ط© ظ„ط§ط® ظ…ط³ظ„ظ… ظپط§ط¶ظ„ ظپظ‰ ظ…ط§ط³ط¨ظٹط±ظˆ‬‎

سيبك من مايكل منير
سياسة بعض أقباط المهجر غير سياسة الأقباط في مصر .. ده بأعتراف البابا شنودة شخصيا
ليه مصلحة
من فضلك ماتسمعلوش
الفيديو كان هيخليني أعيط والله
هي ده الناس اللي أعرفها
مش شعارات والله
ماليش مصلحة
ربنا يديم المحبة

المشاركة الأصلية كتبت بواسطة zalpany2000

جووووووووووووووووووو

تصدق يا جدع انا حاسس اني عايز احضنك واقولك ما تزعلش يا عم الحج (انا باقول عم الحج لكل صحابي المسيحيين)
عمري ما هتدايق منها .. مش أهانة :)
انا مش زعلان خلاص :)
انت صح .. ومعاك حق طبعا ومتفق معاااك قلبا وقالبا

وانا مستعد ابوس راس اي حد مسيحي حس انه اتضر من حد مسلم ....
الله يكرمك
حضرتك علي راسي من فوق
حصل خير :)
مش دي الازمة ... الازمة يا جو فينا كمصريين الانسياااااااق ، مش عايز اكرر نقط قالها اخوننا من الاعضاء ... يعني ما تزعلش مني ... انا بالمناسبة كان ليا امبارح في ماسبيرو مجموعة صحابي، منهم اساتذة جامعة ...بيقولي بعد ما رحنا ... واتكلمنا مع الناس ... لاقينا الناس مش عارفة هي عايزة ايه ... ده بجد ... مش عارفين ايه مطالبهم ... لدرجة استاذ صديقي بيقولهم ما الراجل بتاع المنطقة العسكرية قال خلاص انا اتكفل ببناء الكنيسة وكان مقنع وصادق ... قالوا احنا هنا مش علشان الكنيسة .. احنا هنا علشان نعرفهم اننا مش هفية ولا شوية .. احنا ناخد كل حقوقنا دلوقتي... الراجل بيقولي انا ماحبيتش افضل موجود و مشيت
بالنسبة للناس اللي مش عارفة .. سياسة قطيع بس بالمعني الحرفي
الضمانات ..
من قبل ما يمشي مبارك والجيش كان بيقول ضامن كل التعديلات الدستورية ورحيل مبارك ومحاسبة المخطئين
شوف كام واحد صدق الجيش وسكت !
قليل ..
نفس الحال حصل للأسف
انا مصدق الجيش .. غير طبعا كلام عصام شرف .. بحترم الراجل ده جداااا
يبقي دلوقتي المفروض بعد تصريحات الجيش .. الناس تمشي
وده كان كلام الأنبا بسنتي علي قناة المحور أمبارح
للأسف البابا شنودة في فترة علاج
برضو دي وجهة نظره .. وانا مازلت مع ان لو ليك حق تظاهر وهد الدنيا عليه
لكن هاديلك مثال تاني ابسط واقل تعقيدا

هيئة التدريس في الجامعات طالع عينهم ومراتباتهم اخاف اقولك كام احسن تفتكرني باكدب عليك ... ومن الفئات المظلومة بشكل مش طبيعي .. ومؤخرا فوجئنا باستقطاعات من بعضنا اتشالت من مرتبات الشهور اللي فاتت .. ولينا مطالب ... رفضنا التظاهر والاعتصام عليها لان مش وقته ... لازم العجلة تمشي .. والاعتصامات اللي حصلت في الجامعة دي كانت من طلبة ... احنا فكرنا ... قيمنا ... ووصلنا لقرار انه دلوقتي المطالبة هاتبقي اثرها مش كويس وهاتسبب ارتباك و احنا اما صدقنا
حضرتك من الدكاترة المحترمة اللي خايفين علي البلد وعلي طلابها علي حساب نفسها
ولكن في دكاترة عندنا لغت محاضرات عشان بيتظاهروا وعايزين العميد يمشي
باتكلم عن هندسة عين شمس
أقوم انا انزل اساهم في تظاهر في توقيت زي ده ... و اتعصب و استمر علي رأيي و انا فاتح باب جهنم اسمها فتنه ؟؟؟ وليه ؟؟؟ وليه مابقاش بافكر من منظور اشمل اني عايز الدنيا تمشي شوية قدام خصوصا انه فعلا فيه وعووود ان الدنيا تتصلح ...
متفق معاك جدا جدا
ده اعتراضي .. انا باعترض علي التظاهر الفئوي او الطائفي .. وادينا شوفنا اول ناتج مباشر ... مصادمات فئات اقل وعي وادراك من الناس اللي ساكنين في منشية ناصر ... اللي مش فاهمين ألف باء تحضر ... وحرقوا عربيات الناس ... وادوا فرصة لعالم تافهة وهابلة تتعدي عليهم

ماهو بالمنطق يا جو ... ما احطش صوباعي في بق الاسد و اقله ما تعضش ... طبعا اللي حصل بلطجة من الطرفين وقله ادب
و اقولك علي حاجه و هاتصدقني اكيد ... الموضوع مالوش علاقة بدين ... لا ده مسيحي علي حق ... ولا ده مسلم بجد ... لانهم لو فاهمين ديم صح ... عمرهم ما يعملوا كده
متفق

معلش طولت عليك
بس عندي سؤال برة الموضوع
فيه شخص اسمه مايكل منير ...ده انا مش فاهم ... هل فعلا ليه شعبية بين المسيحيين ... انا بصراحة شديدة مش عارف احس انه من اهل البلد ... ومش مرتاح لاسلوبه ... يمكن اكون متحامل عليه بس بجد نفسي افهم الباشمهندس مايكل ده حد كويس يعني ؟؟؟
مايكل منير لا يمثلني ولا يمثل الأغلبية من المسيحيين
له مصلحة
تحياتي يا سيدي و مليون بووسة علي دماغك يا جووو
تسلمممممم :)
صباحك مصري يا مواااطن
صباح ومسا علي حضرتك :)

المشاركة الأصلية كتبت بواسطة skybird

عن نفسي مشاركاتي تدل اني ابعد ناس عن الطائفية
بعد احترام الرموز الدينية اتمنى نبتعد عن الحساسية المفرطة اللي اخدنا عليها من سنين
ايه اللي يمنعك يا جورج تنتقد المسلمين باسلوب يحسس المسلم ان انتقادك هدفه هدم سلبية من اجل التقارب تكلم يا اخي فنحن لسنا ملائكة ولنا اخطاء واخطاء كثيرة
والمفترض الا يؤخذ كلامك على انه هجوم على الاسلام ولكن على المسلمين المخطئين ومن لم يفهم سنتصدى له نحن المسلمين لتوضيح الامر

كذلك المسلمين عليهم انتقاد اخطاء المسيحيين فهم ايضا ليسوا ملائكة ولهم اخطاء ولكن ايضا بالاسلوب الذي يقصد منه التقارب
لماذا الحساسية وتحميل الامور ما لا تحتمل وليس كل نقد هجوم
عندك حق طبعا
هتروح الحساسية ده بالتدريج ان شاء الله
واسمح لي اوضح اكثر
حضرتك اقتبست مشاركة لاخ هي مثال على ما اقول

اريد ان تكون مثل هذه الردود عادية فاراه رد عادي من مسلم يقول ان اللي بيتعمل هيخسرهم "قاطعي الطرق"حب وتعاطف المسلمين لاخوانهم المسيحيين
هذا نقد مشروع هدفه تصحيح خطا من اجل غاية اسمى هو الابقاء على حب وتعاطف المسلمين
يا جماعة عايزين نتخطى امور الحساسية ونصارح بعض في امور حياتنا طالما العقيدة والدين معروفة كل طرف للاخر والمتطرفين عقيدتهم معروفة حمانا الله منهم
انا معنديش أعتراض علي السطر التاني خالص
أعتراضي علي السطر الأول
وعلي نفسها جنت براقش !
بعد 25 يناير عيب نرجع لورا وكنت مكتئب لولا سمعت الشيخ المهندس اللي جاي من الشرقية لاعتصام المسيحيين ليقولهم انا جيت ارد الجميل لانكم حميتوني من البلطجة واحنا بنصلي الجمعة في ميدان التحرير وحب يشارك بتخصصه الهندسي في اعادة اعمار الكنيسة
والغريب ان اعتصام ماسبيروا تحول عصرا لاكثرية من المسلمين الملتحين والاخوات المحجبات لتوضيح الامور حتى خرج شعار "ايد واحدة"
عايزين نبطل حساسية والخروج من المراهقة الفكرية الطائفية في سبيل عرض مشاكلنا لحلها من الجذور
خلاص مفيش وقت وعايزين نبني مصر على نظيف من كل حاجة
هو ده الكلام
مراهقة فكرية :s_thum1[1]:
هتعدي ان شاء الله
كامل أحترامي لحضرتك

المشاركة الأصلية كتبت بواسطة ramyhekal

احنا اهل واخوات فى الانسانيه والحياه
وسنظل كذلك مهما حصل من الطرفين
الرجاء قبول اعتذارى لك نيابة عن الاخوه اللى غلطوا

مفيش داعي للأعتذار
انا مسامحهم ومش شايل في نفسي حاجة
وشكرا جدا لحضرتك
تحياتي وأحترامي

المشاركة الأصلية كتبت بواسطة tlrsiap

معلش يا جورج
انت راجل محترم و انا مقدر مشاعرك , و متفق بصراحة مع كلام هيومان و متفق مع ردودك عليه
انا كمان شايف انك متفق في رفض استغلال الموقف اللي حصل (زي بالظبط اصحاب الكلام اللي زعلك) , بس كل واحد رفض الأفعال دي بطريقة مختلفة , و دي احد اهداف الفتنة , ان اي حادث يبقى زي كرة التلج و يكبر لحد ما يشيلنا كلنا في سكته

اظن يا اخوة لو حد قال ننزل التحرير يوم الجمعة للتظاهر ضد صناعة الفتنة بيننا و ضد امن الدولة و فلول النظام القديم .... هاننزل ولا ايه ؟

باشمهندس تامر :)
انا بحترمك جدا
اللي حصل ده وقع ناس مش فاهمة مع ناس مش فاهمة
بس الظاهر انهم كتير .. ربنا يعقلهم
انا موافق علي النزول للتظاهر ضد الفتنة

المشاركة الأصلية كتبت بواسطة م.احمد زكريا

شوف يا باشمهندس جو

أنا مش هاقول كلام أكتر من الكلام القاله الاخوة السبقوني

بس يا اخي انا خريج هندسة شبرا يعني قعدت في شبرا 5 سنين كل يوم من الصبح لبليل وهي في منطقة دوران شبرا يعني خلوصي يعني شارع شبرا يعني مول الراعي الصالح يعني كشري الامير يعني 80% من السكان والمحلات والتعاملات مع مسيحيين
منطقتي :)
يا أخي عمري ما حسيت بقلق او تغير في المعاملة يا اخي ده لو في دولة عربية هاتحس بالفرق
ده مش ممكن تعرف ان القدامك مسلم أو مسيحي الا من صورة أو آية متعلقة في المحل
وبرضه مش هتفرق في التعامل
هتلاقي هنا زي هنا بالظبط
ده غيير الزملاء في الشغل و ايام المواقع والمعسكرات ما تعرفش انه مسيحي الا بالصدفة او من الاسم بالكامل .... الحياه عادي جدا
انا بسافر وبقعد وببات مع صحاب ليا كتيييييير
مفيش أي فرق
انا حاسس ان موضوع الفتنة الطائفية دي وهم إحنا معيشيين نفسنا فيه

والعايز يشعللها بيشعللها في طبقات فقيره جاهلة معدمة سهلة الإثارة للإحساس بالأهمية ليس إلا
طلع زكي وبيلعب صح
ماتزععلش نفسك البلد كلها ثايرة والناس بتعتصم وبتتظاهر على الفاضية والمليانة ماجتش على دي وهانسيبها

إحنا لازم نصلي وندعي إن ربنا يعدي الأيام الصعبة جدا جدا دي على خير إن شاء الله
يااااااااا رب تعدي علي خير
وكفاية الصورة الفوق دي يا ناس تخليقوا تعرفو مين مع مين ومين ضد مين
محدش في الناس دي ليه مصلحة عشان يتجمع مع التاني
لا في رئيس ولا حزب وطني
في دلوقتي مصر
هو ده الوقت اللي الواحد فيه بيبان علي حقيقتة
لما المصالح بتختفي
يبان كل واحد علي أصله
والحمد لله بانت

المشاركة الأصلية كتبت بواسطة beautiful0mind

والله نفس الاحساس عندى ومعرفش لية دايما بنربط الخلفات الشخصية بالاديان ....... مع ان طول عمرنا اخوات وجيران واصحاب وفى مننا كمان نسايب ...اية الجديد بقى انا مش عارف


اى خلاف ما بين اتنين ده خلاف ما بين اتنين مصرين ......

واستاذ جورج انا بهديلك الفديو ده

YouTube - ‫ظƒظ„ظ…ط© ظ„ط§ط® ظ…ط³ظ„ظ… ظپط§ط¶ظ„ ظپظ‰ ظ…ط§ط³ط¨ظٹط±ظˆ‬‎

الفيديو ده يا حمادة كان هيخليني أعيط والله
ربنا يديم المحبة