الموضوع: تجربتي مع اللمض التنجسرام 140/100 والفيليبس اكستريم باور 60/55 (صور)

أولا و قبل مابتدي فيه شكر واجب للزميل midooo_119 على موضوعه http://www.nilemotors.net/Nile/192803-140-100-w.html لإنه بجد الواحد استفاد منه كتير بخصوص اللمض التنجسرام
و قلت بقى اجربها أنا كمان لاني كنت بعاني من الإضاءة اللي عندي اللي كانت تعتبر سهاري يعني
المهم نبتدي بتجربتي مع اللمض ...
أنا عربيتي بيجو 405 موديل 1998 و اللمض اللي فيها راكبة بالها 10 سنين مثلا و لما طلعتها لقيت إنها فيليبس اتاريها عشان كده معمرة كل ده بس طبعا نورها كان خلاص بقى في البطيخ يعني ... فـقلت اغيرهم و قريت كتير هنا فالمنتدى عن مواضيع اللمض وكده لحد ما عرفت إن فيه اللمض ال 60/55 دي مابتحتاجش كتاوت وفيه الحاجات الاعلى بتحتاج كتاوت..
وانا الصراحة معرفش ليه مكنتش مطمن قوي لموضوع الكتاوت ده ومكنتش عايز ألعب في حاجة في العربية .. المهم دورت على أحسن لمض 60/55 لحد معرفة إن فيه الفيليبس اكستريم باور دي أحسن إضاءة يعني ... يهمني الإضاءة أكتر من الشكل و لون النور...
المهم جبتهم وكانو من توكيل فيليبس ب 110 تقريبا ال 2 و دي الصور قبل وبعد تركبهم (مع ملاحظة إن اللمض اللي قبلها دي كان بقالها بتاع 10 سنين زي ما قلت فـالمفروض ألاقي فرق كبير في الإضاءة )

نبتدي باللمض الأصلية الفيليبس اللي بالها 10 سنين

الواطي


العالي


من قدام



الإكستريم باور

الواطي


العالي


من قدام


طبعا زي ماهو واضح الفرق مش اللي هو يعني اللمض متستاهلش تمنها و كمان المفروض على موقع فيليبس إنها 80% زيادة في قوة الإضاءة إنما طبعا زي ماهو واضح الإضاءة مازادتش ب 15% مثلا ده كمان لإن اللمض القديمة بالها 10 سنين أساسا يعني أي لمد كانت هتركب بدالها لازم هيبقى فيه الفرق ال 15% دول فـجالي إحباط الصراحة

المهم قعدت فترة باللمض دي لحد ماشفت موضوع الزميل midooo_119 اللي اللينك بتاعه فوق و حسيت إن مش مهم بقى الفلوس الراحة عالاكستريم بور دي وهو ادفع تاني بس ألاقي إضاءة ليها لازمة يعني
هو كان فيه موضوع هنا برده قديم شوية عن اللمض الفيليبس رالي وكان واضح إنها كويسة قوي برده (بتحتاج كتاوت) بس بعد فترة متابعة كان واضح إن ماحدش من الشعب لاقيها وإنها بطلت تنزل فـا قلت اتوكل على الله واجيب التونجسرام وجبتها من التوفيقية من محل مش فاكر اسمه إيه بس هو زي مايكون توكيل تنجسرام اللمبة خدتها ب 35 جندي

ورحت تاني يوم للكهربائي وركبت الكتاوت وكانت تقريبا ب 45 جنيه بتحابشها سلوك وحاجات كده والراجل خد مصنعية 20 جنيه تقريبا ... وبالمرة لقيت عنده ورق فضه لإن الفوانيس عندي كانت مسودة (فوانيس بقالها 10 سنين بقى ) من جوه فوق (الحتة اللي بتعكس النور الواطي ) وخليته لزقلي ورق الفاضى مكان الحتت المسودة ..

المهم بعد ما ركبت الكتاوت والفوانيس اتعملت وكله بقى تمام الحمد لله الإضاءة بقت أحسن (مع نفس اللمض الاكستريم باور و دي 60/55 زي ماقلنا فوق) مع إن اللي أنا فاهمه إن المفروض الكتاوت متفرقش مع اللمض دي لإنها 60/55 يعني مش محتاجة كتاوت أساسا و كهربة العربية الأصلية المفروض تكون مكفياها

و ادي صورها بعد الكتاوت

الواطي


العالي


من قدام



وبعدها بقى ركبت اللمض التنجسرام وطبعا كنت متوقع فرق كبير وانها هتبقى زي الصور اللي الزميل midooo_119 كان حاططها و خصوصا إن أبسط حاجة الفيليبس 60/55 واط و التنجسرام 140/100 وات يعني تقريبا ضعف الواط
بس مش عارف ليه للأسف الفرق ماكانش كبير وانا حاسس إن فيه حاجة غلط بس إيه هي مش عارف مع إن اللمض هي زي اللي midooo_119 حاططها ونفس العلبة وركبت كتاوت يبقى إيه بقى

و ادي صور التنجسرام وأنتم بنفسكم شوفو الفرق مش كبير إزاي مابينها وبين الفيليبس مع الأخذ في الإعتبار زي ماقلنا إنها ضعف الوات فا مش عارف أنا إزاي كده أكيد فيه حاجة غلط بس إيه هي مش عارف

الواطي


العالي


من قدام



و بس بعد إذن الزميل sowrdlee برده حاطت صورة للتنجسرام عنده غير عندي خالص هاستعير بس الصورة دي للنور الواطي عنده



متهيألي فيه فرق كبير ما بين النور عنده وعندي حتى باين في لون النور عنده أبيض ما شاء الله وانا عندي أصفر غلبان كده
هو صحيح عربيته شفرولية لانوس فا فوانيسها كريستال وانا لأ بس هل الفوانيس الكريستال تعمل الفرق ده كله ؟؟ وانا حاسس إن فيه فرق في اضاءة اللمض نفسها بعيدا عن الفوانيس نفسها

هو يعني الخلاصة فالاخر إن الحمد لله النور عندي بقى كويس آه مش وحش بس مش جامد زي ما أنا كنت عايز وزي ماكنت متوقع وشفت في الصور

معلش بقى طولت عليكم بس أهو الواحد قال يحكي التجربة كاملة

يا باشا الفين و توسعوميت مبروك على اللمض و زى ماقال استاذ midooo_119 الفوانيس شكلها مصفر اوى عندك فحاول تشترى وشين جداد احسن و مش هيخسروا

و بالنسبه للمض انا لو كنت صورت لمض اللانوس قبل ما اشيلها مكانتش هتيجى ربع اللى كانت عندك اللى بقالها 10 سنين

بس مع تنجسرام الحياه احلى - ايه جو الاعلانات ده -

و بارك الله فيما رزق

ملحوظه :-
استاذ swordleee ان جبت اللمض ب 25 جنيه بس اتضحك عليك يا باشا