الشمندورة حسب علمي علامة توضع في المجرى المائي لتحديده، وأظن بتستخدم في الرياضات المائية زي الشراع والتجديف، ممكن لو حد رياضي يفيدنا
عرض للطباعة
بالنسبة لأغنية العصفور هي كانت بتقول صوته "صو صو صوصوصو" بس سؤسؤ بؤبؤ دي جامدة جدا، موتتني م الضحك
أغنية الحلم "شفت منام واحترت أنا فيه .. دلوقتي أحكيلكو عليه .. -الكورال- خير إن شالله شفتي ايه؟ .. يجعله خير اللي حلمتيه .. والنبي قولي شفتي ايه .. دلوقتي هاحكيلكو عليه"
الأغنية الأندلسية دي ماسمعتهاش قبل كدة، لو ليه لينك ياريت حضرتك تبعتهولنا عشان نشوف كمال عارف (غالباً هايكون أخو سعد بيه نبيهة من الأم :))
ولك خالص مودتي
فيه بقى شوية ألغاز عاوز حد يفسرهالي !!
أغنية محمد منير "نعناع الجنينة"
"في عشق البنات أنا كنت .....
ترومبيلي وقف عجلاته بندريوم"
مكان النقط (نازل يوم - نادر يوم - نابليون)
أناباسمعها "نازل يوم" أخويا بيسمعها "نادر يوم" ونادر ده يعني عامل ندر مش اسم واحد تبع سعد بيه نبيهة :)
نابليون دي بقى واحد صاحبي بيحلفلي إنها نابليون وفيه شبه إجماع على إنها نابليون.
أغنية إحدى فوازير رمضان لشريهان بتبقى واقفة على طبلة (دربكة) وبتقول
"دَرَبُكانبيتي" والكورال يردد "بيتي"
الكلمة دي كنت بافسرها على إنها "دار أبوك كان بيتي" وبعدين قلت إنها "دَرَبُكة نبيتي" يعني دربكة لونها نبيتي
بس واللهٌ أعلم الـ "دَرَبُكانبيتي" دي أحد الإيقاعات الخاصة في الموسيقى العربية
آه صح، كدة المعنى بقى تمام :)
ألف شكر
فيه كمان حاجة افتكرتها، أغنية صفاء ابو السعود بتقول:
"بنام ننا هوووو وتطبطب علينا
ولا بيجيلها نوم لو نامت عينيها
يا ماما يا حلوة ربنا (يزيدك)
ياللي ألف بوسة تستاهلها إيدك"
أنا كنت باسمعها "يا ماما يا حلوة ربنا يهديكي" وماما اتنرفزت أوي لما سمعتني باقول كدة :D
من حوالى 3 سنين كنت انا و اربعة اصحابى بنتكلم عن اغنية اهلا بالعيد.
و طبعا احنا الخامسة اجمعنا على سعد و نبيهه. بس فى واحد اضاف إن فى جزء كمان هو مش فاهمة ، صفاء أبو السعود بتقول فيها:
"جت طيارة فى بيت أعيادنا و أطرح فيها البركة و زيد"
فصححناها ليه:
"كتر يا رب فى أعيادن و أطرح فيها البركة و زيد"
دي كلمات اغنية شمندورة
ايوة شمندورة من جنا بارى انجس كريو من جنا
سجرى مالا وانا مونت انجلاة وانا
***
ع الشط أستنى ... رايحة فين
دانا ليكى باغنى غنوتين
غنوة عن الآهة والحنين
وغنوة لعنيكى ياحنين
اة يا شمندورة لابسة توب
يا اجمل من الصورة دوب يا دوب
يا اسمر يا سمارة دوبت دوب
يا عيون قدارة ع القلوب
***
اه يا شمندوره الصبر طال
ردى و جاوبينى ع السؤال
اطلبى و اتمنى لو محال
م العين و الننى يا غزال
واعتقد ان شمندورة معناها البنت الجميلة وبيتهيألي انه بيغني لبنت جميلة من قنا
وما زلنا نضحك مع غلطاتنا :)
من ضمن المشاركات في الموضوع الأصلي: واحدة اعرفها قضت طفولتها في أبو ظبي و كانت بتشوف التليفزيون يقطع البرامج و المذيع يقول حان الآن موعد صلاة الظهر (مثلا يعني) على حسب التوقيت المحلي لمدينة أبو ظبي.. لما جت اتعلمت الصلاة و بدأت تصلي كانت قبل ما تدخل في الصلاة تنوي الصلاة و تقول نويت أصلي صلاة الظهر حسب التوقيت المحلي لمدينة أبو ظبي :D
فضلت كده لحد ما مامتها مرة سمعتها و صححت لها نية الصلاة الصحيحة طبعا بعد فاصل طوييييييييييييل من الضحك :D