الموضوع: دليل شامل عن الفيرنا بواسطه اسئله الاعضاء - متجدد

كلام سليم
انا كمان عربيتي سوداء
العربيه لما بتكون مغسوله وطالع بيها باليل بتبقي تحفه واللي مش مصدق يشوف منظر اي فيرنا سوداء من الخلف والفوانيس الخلفيه شغاله بشرط العربيه تكون متلمعه هتلاقي شكلها تحفه نور احر مع لون اسود بتخلي اي حد وراك يركز معاها دا طبعا لو لسه خارج من المغسله
لكن بصراحه انا بعد ماجربت الاسود في بلدنا الجميله قلت ياريتني اشتريت الفيرنا الفيراني اللي كانت قدامي في المعرض وسمعت كلام صاحب المعرض وماستنيتش السوداء
بصراحه يا جماعه العربيه حلوه اوي وكل حاجه والعيوب اللي فيها عاديه لوحطيت في دماغك انك راكب ارخص عربيه سيدان (يعني اربعه راكب بشنطه مش هاتش باك) في السوق
لان ارخص من الفيرنا هاتركب شاهين او لادا مافيش تحتيها حاجه تانيه مشهوره علي ما اذكر واللا هاتجرب حظك مع الصيني وانا اعتقد ان برضه الفيرنا ارخص
عموما وبدون تطويل لو اتكلمنا بحياديه من منطلق ان حضراتكم راكبين عربيه كوري تجميع مصري وبسعر منافس واستهلاك بنزين معقول ومحرك فعلا جبار وتكييف قوي(طبعا التكييف جامد لان غبور الجميل تقريبا نسي يركب فلتر التكييف لذا مفيش حاجه بتقف امام الهواء)
تلاقي ان بحسبه بسيطه انت الكسبان والعربيه ان شاء الله هاتعيش معاك بشرط انك ماتهينهاش يعني ماتحرقش علي الماتور عمال علي بطال طبعا كلنا بنحرق وبنشد لان العربيه بتغريك بكده ولكن في مناسبات خاصه مش علي طول وطبعا اهم من الحرق علي الماتور هو مده الحرق يعني لو جبت الفيرنا والكورولا والجولف علي طريق ومشيت بالتلاته علي ار بي ام خمسه او سته لمده كبيره تفتكروا مين اول عربيه ماتورها هايخرب وبعدين مين وفي الاخر مين......... اعتقد كده تبقي وجه النظر واضحه فياريت ماننساش احنا راكبين ايه..
انا يا جماعه شايف ان حافظ عالعربيه هتحافظ عليك
الزيت والصيانه( الفعليه) ومراجعه ضغط الاطارات وميه الريداتير وتسخين العربيه كويس دوريا فعلا حاجا بسيطه بس هاتوفر عليك كتير اوي
المهم وعذرا للاطاله ان الحاجه الوحيده اللي قرفاني في العربيه فعلا اللون الاسود من ناحيه انه بيلم تراب بمجرد مايخرج من المغسله ومن ناحيه تانيه دهان الفرنا بصفه عامه بتحس انه خفيف اوي زي مايكون اتخلط بمياه لان فهلا بيتخربش بسهوله ده طبعا غير انك لو كنت في المغسله ومعاك متسوبيشي وكورولا اسود بيغسلوا فعلا هتلاحظ ان عربيتك مش بتلمع بعد الغسيل زيهم وتحس ان عربيتك فيها حاجه مش تمام
عموما لو تغاضينا عن النقطه دي زي ماقلت لاني راكب ارخص عربيه سيدان نضيفه في السوق غير انها كوري تجميع مصري اجد ان اعربيه زي الفل وانا الكسبان
ربنا يباركلنا في عربياتنا كلنا
وعذرا للاطاله
احمد بندق

المشاركة الأصلية كتبت بواسطة prince_bondok1st

لان ارخص من الفيرنا هاتركب شاهين او لادا

الشاهين ال 1400 الفاضيه بقت ب 70 الف
يعني ولا الفيرنا الفل اوبشن

شاهين ايه بس الي حد يركبها دلوقتي
العربية شكلها قديم اووووووووووووووووووي وخسارة فيها ال70الف هو احنا بنلاقي الفلوس في الارض
من الاخر مفيش الاالفيرنا في الفئة السعرية بتاعتها
الحمدلله اول ماركبت عربية ركبت ال128وبعد كده الفيرنا
والفيرنا والله حببتني في السواقة عربية مزاج والله

اعتقد ان كده احنا متفقين علي ان الفيرنا عربيه كويسه بكل المقاييس
وبصراحه انا لما قريت الموضوع استغربت بان اسم الموضوع هو دليل شامل عن الفيرنا مع انه كان يستحق اسم دليل شامل عن عيوب الفيرنا وعيوب توكيلها
قد نختلف او نتفق بان العربيه كويسه او ان عيوبها كتير لا دي وجهات نظر
ولكن اعتقد اننا جميعا نتفق بان التوكيل فعلا مش علي المستوي المطلوب لسياره سريعه الانتشار زي الفيرنا والهيونداي بصفه عامه
لهذا واسمحوا لي ان اقترح اقتراح ممكن يضيف جديد للموضوع ده

اقترح بانه بدلا من ان يقوم كل شخص بذكر عيوب الفيرنا بتاعته ان احنا نمسك العصايه من النص عشان يبقي دليل فعلا
يعني ياريت كل واحد من حضراتكم يذكر احلي مميزات شايفها وبيحبها في الفيرنا بتاعته حتي لو كانت موقف حصل معاه والعربيه اثبتت فيه كفائه
ومن ناحيه تانيه يذكر برضه اكتر عيب اتخنق منه في العربيه حتي لو كان موقف العربيه ماثبتتش كفائه فيه
واعتقد ان بكده هانستفيد من الدليل فعلا بالاضافه انه كل واحد لما يقرا عن حاجه حلوه في عربيه غيره اكيد طبعا هي موجوده في عربيته هايحس بانه دفع فلوسه في محلها

برجاء لاتبخلوا علينا بخبراتكم لانها اكيد هاتفيدنا كلنا سواء كويسه او مش كويسه