واضح ان الموضوع بقي فرض ارادة

**ezzatfox** · 15-03-2011 09:59 AM

انا بقالى يومين فى حيرة شديدة و الان حزمت امرى بالاستفتاء بلا لهذة التعديلات . لانى متخوف بشدة من ان تأثير الموافقة على الدستور بشكلة الحالى سيكون لة عواقب كثيرة فى المستقبل و لى اسبابى المنطقية التى سالخص بعضها :
اولا - مجلس الشعب و الشورى هيتم تكوينهم وفقا للدستور و النظام القديم و هنا فى كذا نقطة اهمهم ان القوى التى ستسيطر على هذة الانتخابات هما الحزب الوطنى و الاخوان المسلمين و هما دول الجهتين الوحيدتين تقريبا اللى اعلنوا موقفهم بالتصويت بنعم
تانى نقطة ان هيبقى نصف اعضاء المجلس من العمال و الفلاحين .. طيب بالذمة ينفع فى المرحلة دى يبقى مجلس الشعب عمال و فلاحين .. دة المجلس دة هنعتمد علية فى انتخاب الجمعية التأسيسية لوضع دستور جديد دة غير القوانين المشوهة اللى محتاجة تتعدل .. دة غير دورة فى مراقبة الحكومة و تصحيح اوضاعها طب ازاى .
و بعدين مجلس الشورى دة ملوش ريحة اللازمة يعنة اهدار للمال العام بدون اى مبرر .
دة غير بند الجنسية اللى فى قمة التشدد و ملهوش مثيل فى اى حتة فى الدنيا .. دة رئيس فرنسا متجوز واحدة ايطالية .. طيب مش لازم مراتة انما حتى لو احد والدية مصرى او كان معاة جنسية و اتنازل عنها بردة مينفعش طب دة فى ناس بتاخد الجنسية لو اتولدت فى دولة اجنبية و من غير ما تطلبها او تسعى ليها ..
حاجات كتير جدا و غير الكلام اللى انا قولتة بتخلينى ارفض رفضا قاطعا هذة التعديلات و حاسس انة نظام فرض رأى من الجيش يعنى و لا عملوا مناقشات مع فئات المجتمع قبل التعديلات و لا اى حاجة .. قفلوا على نفسهم 10 ايام و طلعوا قالوا هو دة التعديل يا تقبلوة كلة على بعضة و نبقى لبسنا الدستور كلة .. يا اما ترفضوة كلة و المجلس العسكرى قاعد فى الحكم .
طب ما يتعمل مجلس رئاسى زى ناس ما طلبت و احنا مش اول دولة يحصل فيها مرحلة انتقالية .. مشفناش فى اى تجربة من التجارب دى حاجة بالمنظر دة .
ربنا يستر و يوفقنا للاختيار الاصوب ... يا رب

احمد - مدير الادارة القانونية باحدى الشركات - 37 سنة

**رزق** · 15-03-2011 10:04 AM

المشاركة الأصلية كتبت بواسطة ahmed_oth

:s_thum1[1]:
نعم
احنا عملنا استفتاء مصغر فى الشغل من 200 موظف
اكتر من 150 موظف نعم
نعم

لو كل الناس بتقول نعم أمال زعلانين ليه وأي حد بيقول لأ يبقى معادي للإخوان والوطني (والبلد)؟ - مش للاخ صاحب الاقتباس خاصة

والفكرة برضه مش فيك ولا فيا

الفكرة في ال 30 مليون أمي
والأميين المتعلمين والجهلة - والقبلية
دول اللي ممكن يودوا أي دولة في داهية
في أي استفتاء مش بس ده

**tiger451** · 15-03-2011 10:32 AM

انا متفق معاك مهندس حاتم
الافراط في الثوره مش مطلوب
رحمك الله يا شيخ شعراوي
لكم كنت اتمني ان يكون معنا الان

**enas75** · 15-03-2011 10:41 AM

الحمدلله كنت مع الثوره من اول يوم....حتي لما جت اوقات عليا اتلخبطت فيها الحسابات ...من جوايا كنت مع الثوره
بس دلوقتي حقول نعم للتعديلات الدستوريه...لاني فنظري عندما سمعت الطرفين ...وجدت ان معظم الطرف اللي بيقول لا
بيقول لا بس علشان خايف انه مالوش قاعده شعبيه تاهله انه ينجح في الانتخابات ( يعني مصلحه شخصيه)
والخوف والرعب من الاخوان المسلمين وبقايا الوطني....مع اني مقتنعه تماما ان الوطني اكتر واحد عايز الانتخابات تتاجل لان الطبيعي اي مواطن عادي حيرفض اي حاجه من ريحه الوطني
ومن ناحيه الاخوان ....بجد مستغرباكو....ليه رفضنيهم كده للدرجه دي.... نظام حسني وامن الدوله قدر يرسخ فيكم ان الاخوان بعبع
وايه المشكله ان احنا نشوفهم ونشوف حيعملو ايه ....
ده غير ان فيه مستقلين كتيير اوي داخلين الانتخابات اللي جايه وناس كويسه....يبقي ليه الرعب من المجلس القادم
وخلال الاربع سنين اللي جايين تقدر الاحزاب الجديده توضع شعبيتها في الشارع وساعتها حيبان الكويس من الوحش
كل ما اسال حد ليه لا يقولي اصل كده الاخوان هما اللي حينجحو....طب ايه المشكله ...يبصلي وميعرفش يرد...اقوله يعني المشكله اصلا مش متعلقه بالدستور ولا انك حتختار رئيس جديد ................انتم جميعا محسسني ان حسني مازال رئيس الجمهوريه.....وخايفين ليضحك علينا...
مش المفروض بردو ان احنا حننتخب رئيس جديد غالبا لن يخرج عن عمرو موسي او هشام بسطويسي ...او البرادعي
والناس دي كلها اصلا عندها توجه للدوله البرلمانيه ...يعني تغيير دستور البلد
يبقي ليه القلق الجامد من دستور بيلفظ انفاسه الاخيره
وليه قله الثقه في النفس اللي بقيتو فيها .......
مصر مش كلها اخوان .....ووجودهم حيبقي وجود صحي لكافه الاطياف الاخري وساعتها تتحقق الديمقراطيه..الللي عماليين ترددوها ومحدش توقف لحظه وفكر فيها ..............
رجائي الاخير اتخذ قرارك بنعم او لا......بناءا عن القانون والدستور والافضل للبلد ......
مش تاثرا باخوان والوطني ( الفزاعه الجديده).وفكر في مسار الاحتماليين وقرر من وجهه نظرك

**fepsceasar** · 15-03-2011 10:44 AM

انا مع م/ حاتم
وحاسس ان فى ناس هتقول لا علشان الاخوان هتقول نعم ولو طلع حد مش عجبنى هيقول حاجة هقول عكسها
كلنا متفقين ان الدستور لازم يتغير
انا هقول نعم علشان عايز الدستور الجديد يتم إعداده فى وجود برلمان منتخب وحكومة منتخبة مش لجنة معينة وبرضه الناس هتختلف عليها

**د.أبونضال** · 15-03-2011 10:51 AM

عزيزي المهندس حاتم: هل تُعطي الحق لنفسك في تبني رأي وتُنكر على الآخرين تبني الرأي المخالف لمجرد أن حضرتك لاحظت اتجاه عام في وسائل الإعلام غير مؤيد للتعديلات، وتتهم من يتبنون هذا الرأي بأنهم منقادون ويرددون مالا يفهمون، ويحاولون فرض إرادتهم دون مبرر؟
سأعبر لحضرتك عن وجهة نظري المتواضعة، أنا لا أعتقد أن الإسراع بالانتخابات سيؤدي إلى الاستقرار لأن الانقسام الحاد في الآراء (50 % إلى 50% ) سيستمر، وأنا عن نفسي لا يعنيني من يفوز في الانتخابات طالما الأسس الدستورية والقانونية سليمة وهناك آليات رقابية وتشريعية سليمة، وكلنا متفقون على أن الدستور سيتغير لكن المشكلة هي متى؟ الآن أو بعد عام ... أنا سأصوت في الاستفتاء بلا لأنني أريد الدستور الجديد الآن... ولم أفرض إرادتي على أحد ولن أُجبر أحد على التصويت بنعم لأنني باختصار أعبر عن رأي نفسي فقط.
شكرا
أحمد 35 سنة...مدرس مساعد بالجامعة ... متزوج وأعول ولدا واحدا

**ahmed_oth** · 15-03-2011 10:53 AM

المشاركة الأصلية كتبت بواسطة angeliccore

لو كل الناس بتقول نعم أمال زعلانين ليه وأي حد بيقول لأ يبقى معادي للإخوان والوطني (والبلد)؟ - مش للاخ صاحب الاقتباس خاصة

والفكرة برضه مش فيك ولا فيا

الفكرة في ال 30 مليون أمي
والأميين المتعلمين والجهلة - والقبلية
دول اللي ممكن يودوا أي دولة في داهية
في أي استفتاء مش بس ده

ممكن توضح اكتر
عشان انا تقريبا فهمت غلط

**رزق** · 15-03-2011 10:57 AM

المشاركة الأصلية كتبت بواسطة ahmed_oth

ممكن توضح اكتر
عشان انا تقريبا فهمت غلط

أكيد.
اقصد إن معظم المؤيدين زي حضرتك بتقولوا إن رأي نعم هو الاغلبية
فـليه الناس معترضة علي اللي بيقولوا لأ وبيوصموهم بإنهم بيرفضوا نكاية فالإخوان

يعني هل هم عايزين 100% يكونوا بيؤيدوهم عشان يرضوا؟

**fepsceasar** · 15-03-2011 11:09 AM

المشاركة الأصلية كتبت بواسطة angeliccore

أكيد.
اقصد إن معظم المؤيدين زي حضرتك بتقولوا إن رأي نعم هو الاغلبية
فـليه الناس معترضة علي اللي بيقولوا لأ وبيوصموهم بإنهم بيرفضوا نكاية فالإخوان

يعني هل هم عايزين 100% يكونوا بيؤيدوهم عشان يرضوا؟

احنا هنا علشان نتناقش
لان كل واحد ممكن يقل رايه فى الصدوق وخلاص
وبالمناسبة انا مع الثورة من اول يوم وان شاء الله هقول نعم لحد يفكر برضه ان نعم دى خيانة ولا حاجة ما خبيش على سيادتك انا بسمع تفسيرات كتير لنعم وللا كمان

**adelseliem** · 15-03-2011 11:12 AM

المشاركة الأصلية كتبت بواسطة adelseliem

مناقشه موضوع بتكون مناقشه ما كتب فيه مش كلام فى أتجاه تانى

وبالنسبه للموضوع
أنا أؤيد كاتب الموضوع
وأؤيده أكتر فى طلبه أن اللى يشارك يقول سنه وبيشتغل أيه
أصل الواحد مش مستعد يفضل يتناقش مع شخص بيردد كلام بيسمعه أو شويه مقالات فى جرنال وتيجى تسأله طب أنت رافض ليه أو مؤيد ليه ميعرفش يرد ويجادل ويروح وييجى
يا ريت لما أى واحد يقول رأيه فى موضوع يشرح وجهة نظره وأسبابه هو مش كلام حد تانى وأصل هما قالوا وفلان قال وفلان عاد و و و
معندناش وقت للمجادله

المشاركة الأصلية كتبت بواسطة misoalex

وحضرتك شايف ان انا جايب كلام من بره الموضوه مقتبسه وبتناقش فيه ؟؟؟؟؟؟؟؟!!!!!!!

لو حضرتك عاوز تتكلم وخلاص اتكلم بس انا موجهتش ليك كلام
اه وعلى فكره انا مش بردد كلام سمعته ولا واحد قالهولى ومش فاهم انا بقول نعم ليه ولا ليه

وحتى لو الى بيقول نعم او لا مش عيب يقول كده عشان واحد فهممه او فلان او علان قاله معلومه غلط وتقول اصل معندناش وقت للكلام ده
لو حضرتك شايف واحد فاهم غلط فهممه مش افرض رأيك عليه فهممه وهو يختار

أنا نقلت مشاركتى وردك عليها

ممكن أعرف سنك وبتشتغل أيه ( لو مش عايز بلاش ده مش أجبار )

بص تانى على مشاركتى وقولى دخلك أنت بيها أيه

أنا رديت على مشاركتك بجمله واحده فى الأول

وبعدها كتبت وبالنسبه للموضوع وكمان حاطط تحتها خط فى المشاركه الأصليه يعنى بالبلدى ده كلام فى الموضوع مش فى مشاركتك

أنت خدت الكلام عليك ليه

علشان تعرف أن مش أنا اللى عايز أتكلم وخلاص

الموضوع: واضح ان الموضوع بقي فرض ارادة

LinkBack

أدوات الموضوع

عرض

-

-

-

-

المواضيع المتشابهه

كاوتش اوكاتفيا فانتزيا , ولاكن هذة ارادة الله , وكمان انا جديد لانج

مهم لكل من سيشارك في جمعة 29 ( تطهير - هوية اسلامية - ارادة شعبية )

عيب واضح من المصنع 2010 صنى

لا تتعجب انها ارادة الله

سؤال واضح وصريح في الميجان؟؟؟

الكلمات الدلالية لهذا الموضوع

المفضلات

المفضلات

ضوابط المشاركة