اى السر انى استلمت الفرنا متغطية ب 10 كيلو تراب ؟

**atamim** · 09-04-2008 01:07 PM

السلام عليكم ورحمه الله و بركاته

انا استلمت العربية و عليها كمية تراب كبيرة لدرجة لونها مش باين

كمان الماتور جوة كان متغطى تراب

اى السر فى الموضوع دا؟

و يا ترى يؤثر على فلاتر الهواء فى العربية ولا اى ؟ و يؤثر على البوية ولا لقى؟ انا غسلتها فى الجراج بخرطوم مية علشان مايكونش فية ضغط مية زى الى بيكون فى البنزينه .

يعنى اروح بنزينه ينفخوا التراب عنها ولا استنى صيانه ال 1000 هما الى ينظفوا الماتور بنفسهم ؟

**Adham_Sabry** · 09-04-2008 01:43 PM

نفس الكلام معايا
رغم اني شاريها من معرض غبور في المعادي
وبالمناسبه كانت عامله 85 كم
غريبه فعلا .. لأ والولد هناك قالي انظفهالك يا باشا ؟؟
هو الطبيعي ان الواحد يدفع دم قلبه في عربيه جديده ويطلع بيها من المعرض علي المغسله ..
دي مهزله

**atamim** · 09-04-2008 01:46 PM

المشاركة الأصلية كتبت بواسطة ABOZAYED

نفس الكلام معايا
رغم اني شاريها من معرض غبور في المعادي
وبالمناسبه كانت عامله 85 كم
غريبه فعلا .. لأ والولد هناك قالي انظفهالك يا باشا ؟؟
هو الطبيعي ان الواحد يدفع دم قلبه في عربيه جديده ويطلع بيها من المعرض علي المغسله .. دي مهزله

لا انا كانت عملة معايا بس 28 كيلو علشان المخزن قريب من التويكل

بس لما غسلتها كان فية خربوش بسيط عند الباب عندى مش عارف دا منى و انا بفتحها بسلسلة المفاتيح بتاعتى ولا دا موجود اصلا

**mrekaby** · 09-04-2008 01:53 PM

الف مبروك على العربية و ربنا يحفظك ويحفظها
مخزن هيواندى جنب الشغل تباعى و بشوف العربيات دى واقفة كلها فى مكان مكشوف و على ارض ترابية فى ابو رواش فى كمية تراب و عفرة غير طبيعية
اعتقد والله أعلم انه طبيعى تكون العربيات كلها تراب

**zakiali** · 09-04-2008 03:35 PM

المفروض ان التوكيل بغسلها قبل التسليم انا اشتريتها من معرض المهندسين وكانت فعلا متربه بس غسلوها قبل التسليم ووقفوها قدام المعرض وجه مدير المبيعات هناك وسلمهاني حته حته من الموتور لحد الولاعه . بس اول ما مشيت بيها لاحظت انها عامله 115 كم ! بس الحمد لله داخلين في شهرين اهو ومفيش مشاكل 2500 كم وعملت صيانه الألف برده الحمد لله من غير مشاكل .. اظاهر ان حجم المبيعات الرهيب ده في الفيرنا اكيد هيظهر أخطاء فرديه يعني لو شفتم عدد الناس اللي اشتكوا منها مقارنة بعدد المبيعات الرهيب 50000 عربيه ! اعتقد ان الموضوع مش كبير اوي كده ؟ ولا أيه انا عارف اني لو كنت ماكن اي حد حصله مشكله في عربيته الجديده اكيد هيكون منهار عصبيا .. عموما اللي عنده مشاكل ميسبش حقه أبدا يكلم ده وده ويعلي صوته ويبعت فاكسات وايميلات للشركه في كوريا وجهاز حمايه المستهلك ويعمل زيطه وده اكيد كله في صالحه وفي صالح بقيت الناس انهم يحاولوا يشوفوا الغلط فين ويصلحوه لأن التوكيل سمعته بدأت تتأثر بعد الانتشار الرهيب لعربيات هيونداي في مصر .