ربنا يستر
الدكتور بشار ده برغم وجهه الوديع لكن انا خايف منه اكتر م القذافي
وكمان الامر مش مستقر في الاردن والعراق والبحرين وعمان
ياراجل ده حتى البرتغال فيها مظاهرات بنفس نمط مصر وتونس
ربنا يستر و الفترة اللي جاية تعدي على خير
أنا وعائلتى زى حضرتك كده بس بدأوا يتقنعوا ب لا
التصويت هيكون بالبطاقة الرقم القومى فى اى مكان تصادف وجودك به وفيه حبر فسفورى للاصبع لضمان عدم الادلاء بالرأى مرة أخرى
المشكلة والسبب فى الحيرة ان الرؤية مش واضحة
من وجهة نظرى اللى هيقول نعم ده شخصية متفائلة
واللى هيقول لأ شخصية حذرة ومتشائمة
انا شايف ان عجلة الديموقراطية بدأت تدور ولن يستطيع احد ايقافها
الشعب اللي كسر حاجز الخوف وحاجز امن الدولة وحاجز حسني مبارك وحواجز تانية كتير
هذا الشعب لن يستطيع احد ان ينتزع منه اي حق من حقوقه بعد الآن
الحاجز الوحيد اللي انا خايف منه هو ان الجيش ياخد خط مختلف عن الوضع الحالي وهو امر قد يكون مستبعد لكنه ما زال احتمال قائم
لذلك لا يفترض ان يبقى الجيش في سدة الحكم مع عدم وجود قيادة منتخبة لفترة طويلة
وراجع كلامي في اول مشاركة بالتفصيل
مع الاخذ في الاعتبار المخاوف الخارجية من جميع الاتجاهات الجغرافيبة والسياسية والاقليمة والدولية
يعني مخاوف الناس من عدم تغيير الدستور انا شايف انها غير واقعية ولن يستطيع اي شخص ان يقف هذا الموقف .... الا بموافقة الجيش وهو امر مستبعد تماما ..... والا كان ساند مبارك ضد الثورة
الجيش اما مع الثورة واما يريد حكم البلد .... لكن محدش ح يقدر يلعب بالدستور في وجود الجيش كقوة محايدة
الخوف الحقيقي من الجيش لو طمع في الحكم ....... ومن الخارج طبعا
ياريت اكون قدرت اوصل وجهة نظري المتواضعة
على فكرة انا كلامي ده من واقع رؤيتي للوضع بالداخل والخارج
ومن واقع تاريخ الثورات وعلى رأسها 1952
..
كلامي مالوش اي علاقة بالاخوان عاوزين ايه والسلفيين شايفين ايه والحزب الوثني ح يصوت ازاي
دي كلها قوي لها مصالحها وايدلوجيتها وبعدها السياسي والعقيدي وانا خارج جميع التيارات
انا لم انتمي لأي حزب او جماعة او مذهب سياسي او ديني طوال سنوات عمري
انا راجل مسلم متدين معتدل ... مصري عربي أفريقي .... مش اكتر
علشان بس لا يتم اساءة فهم كلامي باي شكل
اوافق على التعديلات
* التعديلات دى هى تعديلات على دستور 71 ، وبموافقتنا على التعديلات دى معناه موافقة ضمنية على باقى مواد الدستور بما فيها صلاحيات الرئيس.
* المادة الخاصة بشروط الترشح اللى انا شايفها ظالمة وبتقتل الإنتماء عند شريحة كبيرة جدا من الناس اللى خرجوا من البلد لظروف كلنا عارفنها من فساد وقمع وظروف إقتصادية سيئة ، واول ما الناس فرحت بالثورة وحست ان البلد هاتكون افضل واستعدت انها تشارك فى بناء البلد من جديد ، اروح انا اقولهم متشكرين قوى مالكمش دور معانا.
* المادة 189 عليها اختلاف كبير من فقهاء الدستور نفسهم ، البعض بيقول ملزمة والبعض بيقول غير ملزمة ، وبالتالى اصبحت انا غير المتخصص عندى شك ، خاصة ان نص المادة فيها لعب بالألفاظ مخلينى غير متيقن من نوايا اللى صاغوا المادة.
* فى رأيى ان وضع دستور جديد فى ظل عدم شغل منصب رئيس الجمهورية هايكون فى شفافية اكبر نظرا لعدم وجود حاكم ، وبالتالى عدم وجود ضغط على اللجنة المشكلة لوضع الدستور لوضع بنود مجاملة للرئيس (لسة ما اتخلصناش من مرض عبودية الحاكم)
* كمان ما ينفعش اوافق على تعديلات كان اللى اقترحها فى الأساس هو حسنى مبارك قبل ما يسيب الحكم ، ما ينفعش بعد ما راح 1000 شهيد والاف المصابين وخسارة 70 مليار فى البورصة وإقتصاد على حافة الإنهيار يبقى المقابل لدة كله شوية تعديلات فى دستور بايظ أساسا.
* أخيرا فى مثل شعبى بيقول لا تصلح العايب ولا ترقع الدايب.
علشان كدة انا هاقول لأ للتعديلات
طبعا وجهة نظرك تحترم
انا بس ليا تعليق على النقطتين دول
اولا حسني مبارك مش هو اللي شكل اللجنة دي وهو كان عاوز يعمل تعديلات غير دي
وبفرض انه هو ده اللي دعا لكدة ..... مش معنى ان حسني مبارك هو اللي قال يبقى ارفضه .... طيب ماهو حسني مبارك كان بيقول لا إله ألا الله ..... هل معنى كدة اني ارفض قوله ؟؟؟
...
اما حكاية البورصة فدي اصلا الناس فاهماها غلط .... احنا ماخسرناش 70 مليار في البورصة .... اللي حصل ان قيمة الاسهم السوقية انخفضت .... لكن الخسارة لم تحدث .... اللي يبيع في الانخفاض يبقى هو اللي خسر .... لكن اللي ينتظر يبقى لم يخسر شيء .... وكمان اللي يشتري بالانخفاض ده ويبيع بعد كدة لما يحصل ارتفاع يبقى كسبان
زي اللي معاه كيلو دهب وشايله في البيت .... لو الدهب انخفض وهو معاه الدهب ومش ح يبيع .... ماقدرش اقول انه خسران
...
وفي الآخر هو ده مكسب الديموقراطية والثورة
ان يبقى فيه اكتر من رأي بدون مشاكل
نفس تفكير المجموعة اللى عملت مظاهرات سنة 1953 بعد ما عبد الناصر طلب تفعيل نشاط الاحزاب و وضع اسس لحياة ديمقراطية حقيقية
نزلت مظاهرات عند قصر عابدين تطالب ببقاء مجلس قيادة الثورة و منع قيام اى احزاب و كان الهدف هو بالضبط الخوف على امن مصر القومى و الخوف من يصل حزب الوفد اقوى الاحزاب فى ذلك الوقت للحكم مرة اخرى
كانت النتجية انة ظهر الحزب الوطنى اللى خرب الحياة السياسية خلال اكثر منم 30 سنة, و دى نتيجة طبيعية لمن يرضى بانصاف الحلول لانها تتحول سريعا الى حلول هزيلة وتتلاشى مع الوقت
هناك فرصة حقيقية الان لعمل دستور جديد و على اساسة يتم انتخاب مجلس شعب حقيقيى يمثل كل المصريين
اما لو تنازلنا الان عن هذة الفرصة حيتبعها لاحقا تنزلات واحدة وارء الاخرى ..حتى اننا سوف نقبل بتعديلات هزيلة بعد عدة سنوات و تنتهى الثورة على ذلك .. ننتظر ثورة اخرى بعد 100 سنة قادمة
ثورة شعبية بهذا الحجم من التاييد الشعبى من حقها دستور جديد يحقق احلامها و طموحتها و فزاعة الامن والامان و التهديدات الخارجية و الداخلية ما هى الا فزاعة وهمية يمكن السيطرة عليها .
اللى اقصده ان الفاتورة اللى اتدفعت كبيرة جدا ، وما ينفعش يكون هو دة المقابل لكل اللى احنا دفعناه ، وجهة نظرى ان التعديلات ما هى الا محاولة لتغيير مسار الثورة والإلتفاف عليها وعلى مطالبها اللى كانت واضحة من اول يوم ، احنا مش اول دولة تقوم بثورة واللى احنا بننادى بيه مش حاجة جديدة ولا هى إختراع ، ثورة يعنى عزل للحاكم وسقوط للدستور وفترة انتقالية لحين انشاء دستور جديد للبلد ، غير كدة يبقى انا بيضحك عليا.
ازاي ؟؟؟
دول كانو عاوزين الجيش يقعد
وانا باقول الجيش لازم يمشي في اقرب وقت
وبعدين الامن الوطني مش فزاعة
شوف الدنايا عاملة ايه حولك .... شوف اتفاقية حوض النيل واللي حصل واحنا مش واخدين بالنا .... هو اللي بيحصل في ليبيا والسودان دول فزاعة ؟؟؟..... دول الفزع بعينه
هو وجود اسرائيل على حدودنا ده فزاعة ؟......
الفزاعات دي لما احب اخوف حد من حاجة مش موجودة
لكن اللي انا خايف منه موجود وملموس ومحسوس
وفي الآخر كل واحد له وجهة نظرة
.....
بس انا تفكيري مش زي مانت بتقول زي بتوع 1953
احنا كلنا عارفين ان دي كانت مظاهرات مدبرة لأصغاء الشعبية على ما تم تقريرة بالفعل ولو الثورة كانت عاوزة ديموقراطية كانت عملتها في ال59 سنة اللي فاتت