الموضوع: والدى والمراره والقلب واللف على الدكاتره - ممكن حد يفيدنى

الف مليون سلامة على والدنا
اللهم اشفه شفاء لا يغادر سقما
انت ماذكرتش سن الوالد
ليه ماروحتش لدكتور اورام ممكن يدلك على تحليل لدلالات الاورام ويوفر عليك القصة
ثانيا اخبار الكبد انت ماجبتش سيرته خالص اخبار تحاليله ايه
طمنا ع الوالد ربنا يشفيه

السلام عليكم و رحمة الله و بركاته

لأ طبعا, هما الدكاتره ماجتش عند الوالد و خلصوا, بس البنط اللى أنت كاتب بيه المشاركة الكبييييييييييييييييييرة دى, مستحيل حد يقراه.

أنا بعد اذنك, أعدت كتابته ببنط أكبر تييسيرا على الأخوة الأفاضل هنا فى المنتدى .



السلام عليكم ورحمة الله
ندخل فى الموضوع على طول
انا والدى عنده تقريبا 64 سنة
كان عامل عملية قلب مفتوح عند دكتور حمدى السيد من 14 سنة والعملية لحد دلوقتى ناجحه والحمد لله
فى الفترة الاخيرة بدأ يجيله الم شديد فى المعدة وبعدين بقى فى قىء
واحنا فى الطريق للدكتور نلاقى الالم اختفى مره واحده ويرجع طبيعى بعد ماكان بيعض فى الارض من الالم
المهم مره تانية جه الالم ورحنا للدكتور وكشفنا قال دى المراره والالم نتيجة انسداد القناة المرارية بحصوه واول مالحصوه بتتحرك بيرجع طبيعى وبما ان المراره كونت حصوات فلازم تتشال لانها بالبلدى بقت مصنع حصوات
طبعا كل مره كان بيبقى فى قىء
فى يوم 25 يناير بدأ الالم يجيله وبشده ولكن الحصوة المره دى ماتحركتش والام كان بيشد ويهدا لكن مابيروحش
استنينا يوم والتانى على انها هاتتحرك ولكن ماراحتش واول ماقررنا نروح لدكتور مالقيناش لا دكاتره ولا مستشفيات وده كان يوم 28 لان المستشفى العام هنا والتامين الصحى كمان رفضوا استقبال اى حالات الا اصابات المظاهرات واللى كانت بالكوم طبعا
قالولنا خدوه وسافروا لقينا الطريق مقفول (على فكره انا من السويس) وكنا تقريبا سبه محاصرين
المهم هو كل الفتره دى قبل اللقمه ماتنزل من البلعوم حتى يكون مرجعها وعلى ماقدرنا ناخده ونسافر بيه كننا عدينا اكتر من 20 يوم كل يوم حالته فى تدهور والصفرا عليت ووشه وجلده وعنيه بقت كلها لونها اصفر بشكل مبالغ فيه طبعا مع عدم الغذا والالم المستمر
اول ماطلعنا بيه كان على التامين الصحى فى مدينة نصر
قتلولنا ده محتاج منظار واللى هنا بايظ خده واطلع على مستشفى صدناوى واما روحنا لقيناه بردو بايط ومش شغال واحد ابن حلال قالنا خدوه واطلعوا بيه على عين شمس يس هاتدفعوا مبلغ محترم ( ماكنتش فاكره محترم اوى كده)
خدناه وطلعنا على عين شمس التخصصى وتقريبا لحقناه فى اخر لحظة واكنت حالته حرجه بشكل يخض
الناس استقبلوه واستقبلونا بجملة (2000 جنيه تحت الحساب قبل ما يحط رجله فى الاوضه) طبعا دفعت ودخل
الصفرا عنده كانت وصلت فوق العشرين بس مش فاكر 23 ولا 24 وطبعا الدكاتره اللى هنا هايعرفوا ده معناه ايه
اول مادخل هاتك يا محاليل ولمدة يومين كاملين المحاليل كانت متعلقاله 24 ساعه فى اليوم من الخميس للسبت
والسبت دخل عمل المنظار وعملهاله دكتور اسمه اسامه حته
ماعلينا الراجل عمله المنظار وطلع الحصوه وكانت كبيره فعلا وركب دعامه فى اخر القناة المراريه بعد ما فتح فيها لانها كانت ضيقة
اكمن الحاج كان عامل قلب مفتوح طلعوه على العناية المركزه على طول وكان فعى بيتنفس بصعوبه
طلع تانى يوم الحمد لله على غرفته وطلعنا من المستشفى يوم الخميس يعنى بعد اسبوع وكنت قد دفعت بالفعل 20 الف جنيه بالتمام والكمال بخلاف المصاريف النثرية وكانت الصفرا فى اخر تحليل وصلت 4.3
رجعنا السويس وبعد يومين لقينا الحاج بقى بيتعب ويجيله الم فى صدره ناحية الشمال وبيمتد لدراعه وبيشتد تحت باطه
خدته وطلعنا جرى على دكتور باطنه وكبد وطلب تحاليل هيموجلوبين المهم عملناها وطلع الهيموجلوبين عنده 6.6
وده طبعا قليل جدا لان الطبيعى على ما سمعت المفروض يبقى 13.5
واحنا ماشين قلبه وجعه تانى فقمت محود وداخل على دكتور قلب فقالى ده نقص هيموجلوبين وحديد فعشان كده القلب بيشتكى واداله دوا كبسولات حديد ولزقه تتحط على الصدر
الدكتور قال اطلعوا بيه على المستشفى وانقلوله دم وقد كان خد كيس وطلع وبعد ماروح فى نفس اليوم بقى لما بياكل بيجيله الالم او لما حتى بيدخل الحمام حتى انه فقد القدره على صعود درجة سلم واحده فبقيت بشيله انا واخويا والالم بقى بييجى بسبب ومن غير سبب لاعارف ياكل ولا يدخل حمام ولا يتحرك اصلا
رجعنا للدكتور قال لا ازاى يطلع ده محتاج 3 اكياس اقل حاجه
رجعته تانى وعلقناله 4 اكياس مش تلاته بعد مادخنا على دم يكون متوااااااااافق
ربنا كرمه وخرجنا وكان زى الفل وانا رحت من نفسى اعمل تحليل هيموجلوبين بعد اخر كيس بساعتين عشان اشوف وصل كام لقيته بقى 9.5 قولت الحمد لله المهم الالم مايجيلوش الم الصدر ده لانه بقى هو المشكله دلوقت
بعدها بيومين كان عنده استشاره رحنا للدكتور وقبل ماروح قلت اعدى اعمله تحليل هيموجلوبين تانى ( اسال مجرب ولا تسالش طبيب :)
لقيت الهيموجلوبين نزل ووصل ل 8.6 فقلقلت واحنا عند الدكتور قال ده طبيعى انه ينزل شوية شان الجسم فيه مخازن حديد وكلها متعطشة للحديد فاول ما بيدخل الجسم اى كمية حديد كل المخازن بتجرى تاخد اللى محتاجاه عشن ترجع زى الاول وخصوصا اللى فى الكبد
عدى 10 ايام وامبارح رجع يتعب تانى من الاكل والحركه
الخوف بقى من ايييييييييييييييييه
الخوف من ان كان فى جراح فى عين شمس قاللى ان منطقة الضيق اللى فى اخر القناه المراريه بعد عمل اشاعة ثلاثيه بالصبغة يشتبه انها ورم وبسؤال الدكتور اللى عمل المنظار قال انا ماشفتش اى ورم او الياف وانا بقص عشان اركب الدعامه لكن الجراح قال ان ده ممكن يكون ورم داخلى فهنحتاج نعمل منظار اخر تشخيصى بالسونار يدخل يشوف وياخد عينه من الانسجه وده مفيش منه غير اتنين فى مصر واحد فى المركز العالمى والتانى فى مركز فى المنهدسين اسمه الفاسكوب والاحسن المركز العالمى لكنه بالحجز والطوابير
طب يادكتور ايه اللى خلاك تشك قال انه عمل تحليل اورام وطلعت النسبة 150 وده يدى احتمال
فسالته هو الاكيد بيبقى كام فقالى من 300 ل 400 فقولتله والطبيعى قاللى من 30 ل 40 لكن ممكن يكون علو الصفرا والحالة السيئه اللى وصللها الكبد ترفع النسبة دى دون ان يكون فى ورم فعلا
طب والحل يا دكتور قاللى اذا اتاكدنا يبقى عملية تتشال فيها المراره بالبنكرياس بنصف المعده تقريبا ودى عمليه بتقعد 7 ساعات تقريبا ونسبة النجاح فيها قليله خصوصا ان نتائجها مش مؤكده ده غير ان والدك ليه وضع خاص عشان عملية القلب المفتوح وكمان السن
فقولتله يعنى ايه يا دكتور قاللى يعنى دى فرصه علاجيه وانا مش عاوز اضيعها على المريض
طبعا اتخنقت وحسيت انا مش عارف اروح فين واتاكد من مين
فكلمت الدكتور بتاع السويس وهمه كانوا اتنين والاتنين قالولى هاته وارجع يابنى ماتدخلش فى متاهات لازم ترجعه البيت دلوقتى مادام المنظار نجح والحاله بتستقر وتتحسن بسرعة كمان
واما رجعت حصل موضوع الالم فى الصدر اللى حكيت عليه فوق
وانا بقى فى التامين بنقله الدم جت بنوته لطيفه شكلها متخرجه اول امبارح وقالتلى انت تبعه فقولتلها انا ابنه وكنت لسه جاى من الشغل عليه فى المستشفى
فقالتلى الاستشارى شاف والدك ونقل الدم مش هايفيده بحاجه فقمت متنحلها وقولتهلها ايه ورم اكيد
قالتلى لا هو سرطان
وبعيد عنكو الدنيا اسودت والاوات اتلخبطت فى عنيا ولقيتها بتقولى انقله القاهره احسن والاحسن ترجع للدكتور اللى عمله المنظار كمان فى نفس المكان ( اه ماهى معذوره ماتعرفش موضوع ال 20 الف فى اسبوع على منظار وشوية محاليل)
وطبعا التامين زفت زفت زفت هايرموه فى اوضه ويسيبوه لحد ما يخلص
انا زكرت موضوع الدكتوره ده لان ان شايف كلامها بيتحقق انه فعلا فى حاجه بتكسر الحديد فى الدم وبتمنع الاستفاده منه وعشان كده حالته بتتاخر وبيرجع تانى لموضوع الم الصدر
فهل اللى انا شايفه ده صحيح ام ان العلاج من الانيميا وموضوع مخازن الحديد فى الجسم ده بياخد وقت وعودة الم الصدر وازدياده ده مرحله وهاتعدى

اى دكتور يفيدنى الله يكرمكو قبل مادخل فى متاهات الله اعلم هاتودينا لفين خصوصا ان الحاج خلصان خالص ومفيهوش حيل لاى حاجه

ربنا يشفيه

وياريت تحافظوا على حالته النفسية وترفعوا معنوياته

وبإذن الله الأطباء يردوا عليك

السلام عليكم ورحمة الله
بداية نرجو من الله أن يشفي الوالد ويعافيه و أن يذهب عنه مرضه
و أنصح حضرتك بدلا من أن تصرف 20 ألف في عشرين ألف توجه لمستشفي كبير مجربه من المعارف و الأصدقاء وتكون ذات سمعة طيبه و أشرح لهم الموقف وهم سيقومون مع الوالد بالازم ويطمئنوك ويخبروك عما حدث من قبل و ما سيتم فعله
كم تمنيت المساعده ولكن ليس لي أي خبرة في هذا المجال