شويه مفاهيم مش فاهم معناها ؟

**tito_1980** · 18-03-2011 10:17 PM

روديه للصبابات و وش السلندر
فورش الدبرياش
خرطوم الفايظ بتاع الكاربيراتير و عمه الهوا

**fvks** · 19-03-2011 06:38 AM

المشاركة الأصلية كتبت بواسطة eng_ahmed_90

روديه للصبابات و وش السلندر
فورش الدبرياش
خرطوم الفايظ بتاع الكاربيراتير و عمه الهوا

رودية الصباب : ديه عبارة صنفرة هو عبارة علبة فيها براده خشنة وبراده نعمة بتستخدم في حالة تغير الصبابات علشان الازم الصباب لازم يكون مطبع كويس في مكانه علشان ميهربش الضغط من حواليه
فورش الدبرياج :هو تقريبا الديسك والفورش المقصود بيه ال الريش الي بضغط علي الاسطوانه تقريبا اوالعكس علشان الاسماء متلغبط بينهم

الفايظ: ده بريجع جزء من الرذاذ الزيت علشان يزيت الكربراتير
ديه المعلومات الي عندي لو في معلومات اضافيه وادينا بنتعلم من بعض

**l0new0lf** · 19-03-2011 08:04 AM

الفرش حاجه زى الشوكه بسنتين لما بندوس دبرياج بتقوم هى دايسه على البليه تقوم البليه دايسه على السوست الريش الى فى الدسك يقوم الاسطوانه باعده عن الحدافة و الحركه تفصل بين الموتور و الفتيس

**l0new0lf** · 19-03-2011 09:32 AM

المشاركة الأصلية كتبت بواسطة fvks

الفايظ: ده بريجع جزء من الرذاذ الزيت علشان يزيت الكربراتير
ديه المعلومات الي عندي لو في معلومات اضافيه وادينا بنتعلم من بعض

معلش مخدتش بالى من باقى المشاركه
طيب و العربيات الى مافيهاش كربرتير ليه فيها خرطوم فايظ؟
الزيت الى فى المحرك بيسخن و يبخر فلو ملهوش متنفس ضغط بخار الزيت جو الموتور هيزيد
و دى حاجه مش كويسه
فخرطوم الفايظ ده علشان يخف من ضغط بخار الزيت
و لو الفايظ بخره عالى فده دليل على ان الموتور محتاج طقم شنبر او كاوتش صباب او عمره كامله حسب حالة الموتور

**Dr_AHMAD** · 21-03-2011 02:03 AM

معلومات قيمة
شكرا

**MMamdouh** · 21-03-2011 11:00 AM

المشاركة الأصلية كتبت بواسطة eng_ahmed_90

روديه للصبابات و وش السلندر

عملية الروديية هى عملية تطابق سطح الصبابات مع قواعد الصبابات لضمان احكام غرفة الحريق

بعد عملية تغيير الصبابات و/او تغيير قواعد الصبابات بيبقى فيه عدم تطابق بسيط بين الصباب و قاعدتة و دة بيهرب جزء من كبس المكنة و للتخلص من الموضوع دة بيتعمل الروديية

الروديية ببساطة بيعتمد على بعض المواد اللى بتتحط على اماكن تلامس الصباب مع قاعدتة و دى بتاكل السطح المعدنى للصباب و القاعدة اثناء لف الصباب على القاعدة عدة مرات لحد ما تختفى تماما اماكن عدم التطابق و يبقى الصباب محكم الغلق تماما

فورش الدبرياش

الفورش عبارة عن ذراع معدنى كل شغلتة نقل الحركة من سلك الدبرياج (او الماستر التحتانى لو الدبرياج شغال بنظام ضغط الزيت) الى بلية الدبرياج اللى بدورها بتضغط على ريش الدسك

خرطوم الفايظ بتاع الكاربيراتير و عمه الهوا

اثناء عملية الاحتراق بيهرب جزء من غازات العادم من الشنبر و الغازات دى بتتراكم داخل كارتيرة المحرك... لو مفيش منفذ للغازات دى انها تخرج من الكارتيرة دة حيرفع الضغط فى الكارتيرة و يسبب تلف اويل سيل الكرنك

لتصريف الغازات دى بيتعمل فتحة فى اعلى نقطة فى المحرك لتصريف الغازات... طبعا الغازات دى محملة ببخار زيت من الكارتيرة و لو اتسابت تخرج الى حوض المحرك حتغرق الدنيا زيت

عشان كدة بيتركب على الفتحة بتاعت التهوية خرطوم رايح الى منافولد السحب عشان المحرك يشفط الغازات دى و يطردها مع العادم بعد حرق ابخرة الزيت لتقليل التلوث البيئى

MMamdouh