رأيي الخاص : الصح صح و الغلط غلط ايا كان اللي عمله
سلام عليكم
باختصار كده , احنا واجبنا نحكم على افعال انها خطأ او صح , و بنسبة الفعل لصاحبه يبقى صاحبه اخطأ او اصاب , و ما ينفعش نفس الفعل يتقاس في ناحية انه خطأ و الناحية التانية لأ , و حدوث ده هو خطأ في حد ذاته
يا اخوة:
الاستفتاء ده استفتاء ضبابي , يعني ما يليه غــــــــــــــــــــــــ ـــير واضح و بالتالي ما ينفعش نقول اللي هايقول كذا ده كذا
وصم مختاري نعم او لأ بأنهم (علمانيين / كفار / حزب وطني ) غلط جدا جدا جدا , لأن ما يتبعه غير واضح و ما اظنش حد فينا متأكد 100% ان اختياره صح
كذلك وصم اي حد اختار اي اختيار انه بيعمل لصالحه الشخصي برده غلط لأن التهمة دي قد تسير في اتجاهين
كذلك اني اقول شوف الاخوان بيعلقوا يفط تقول نعم في الشارع و اتجاهل خالص ان اون تي في شغالة لأ لأ لأ , برده خطأ , و عكسه خطأ
و برده اني اقول شوفوا الاخوان بيوزعوا اوراق في الشارع تقول قولوا نعم , و اتجاهل تماما ان الوفد و الغد بيعملوا نفس الشيء , برده خطأ
الأفعال السابقة كلها صحيحة في رأيي , نيجي للنوع التاني
و برده اني اقول شوف السلفيين بيحشدوا و اتجاهل خالص ان الكنيسة بتعمل نفس الشيء خطأ , و عكسه برده خطأ
مع تأكيد , الحشد مش عيب , لكن اني احشد في استفتاء ضبابي زي ده بطريقة تعال يا مؤمن نحارب الكفرة , او نقول بأسلوب طائفي يعني , خطأ في رأيي , في الاتجاهين طبعا
اني اقول الحزب الوطني بيوزع فلوس , و اتجاهل ان الوفد بيوزع فلوس , خطأ , و العكس خطأ , و الفعلين خطأ
باختصار , عايزين بقى نتعلم ندافع عن حريتنا و الديمقراطية اللي ربنا انعم علينا بيها , ويا رب تدوم
و عايزين كمان نتعلم نمارس الديمقراطية دي صــــــــــــح
تحياتي للجميع