الموضوع: تقييمات الاعضاء للاسبيرانزا

[align=center]بسم الله الرحمن الرحيم[/align]
بعض أراء سبعاوى:

بفضل الأخ العزيز وائل عطية اتيحت لنا امس فرصة للتعرف على السيارة
الإسبيرانزا عن قرب،

وقد قمت بتجربة الٌقيادة للسيارة بحضور وائل عطية فى الكرسى اليمين
وكريم منير فى المقعد الخلفى

بداية نتكلم عن السيارة وهى واقفة:

السيارة من الخارج مافيهاش غلطة، الصاج الخارجى جيد جدا،لا توجد ايه
فواصل او فروقات تجميع، الدهان معتنى به جدا، الملحوظة الوحيدة هى عدم
سهولة قفل الأبواب
تحت الكبوت المحرك مغطى بالكامل بغطاء بلاستيك لا يعطى لك الفرصة لرؤية
الكثير مما يوجد تحته ولكن ترتيب المكونات المجودة تحت الكبوت والشكل
العام لها قريب جدا من النوبيرا(ستلاحظون اننى استخدم النوبيرا كمرجع
طوال هذا التقرير لاننى بشكل ما حسيت ان الإسبرانزا لها طعم وملمس
النوبيرا)مستوى الصاج والتقفيل بالحوض يحصل على تقدير مرتفع للغاية،
وشنطة السيارة واسعة(بنفس حجم شنطة النوبيرا تقريبا)ء

قام وائل بتدوير المحرك والكبوت مرفوع لتقييم صوت المحرك، فى السلانسية
الصوت الوحيد المسموع هو صوت الرشاشات لكن فيما عدا ذلك المحرك هادئ
جدا، قمنا بكبس دواسة البنزين حتى 5000 أر بى أم، الصوت معقول جدا جدا
جدا، ليست هادئة كالسيارات اليابانى مثلا لكن بمستوى الكورى وربما
افضل،دخلنا صالون العربية، ستاير التابلوه حديث جدا وهو قريب الى حد
كبير من تابلوة اللانسر الجديدة، وشكل الإضاءات الداخلية رائع، لكن
الخامات المستخدمة لتصنيع الصالون اقل الى حدما فى المستوى من خامات
النوبيرا مثلا، كان لى تعليق على ان البلاستيك المستخدم لفرش الباب ارق
مما ينبغى، لكن الشهادة لله رغم ان الخامات اقل فى المستوى لكن التقفيل
مافيهوش غلطة

بدأنا الحركة، اول انطباعين تأخذهم مع بداية الحركة حاجتين، الاول ان
المحرك مالوش صوت تقربيا، يعنى لو قارننا بالإيه 11 مثلا مافيش نسبة خالص
فى صوت المحرك، الإنطباع التانى ان عصاية الفتيس سايبة شوية، وهو نفس
الإحساس اللى انا حسيت بيه فى العربية اللى كانت عند ابو غالى فى العرض
لكن برغم الإحساس بإنها سايبة دا ماكانش له اى تأثير على سهولة التعشيق
ومرونته

خدنا العربية وطلعنا بيها على طريق التجمع الاول، اداء المحرك فى السحب
نسخة كربون من أداء النوبيرا،فقط صوته اقل من صوت النوبيرا، بمعنى ان
مع كبس البنزين فى البداية المحرك مش بيستجيب بسرعة فى السرعات المنخفضة ،
لكن مع التسارع والوصول الى فوق ال2000 ار بى ام يصبح المحرك محتمس
وسريع الإستجابة، رغم ان الطريق مطلع لكن العربية وصلت لسرعة 120
بسهولة،بس لازم اضيف ان استجابتها للتسارع كانت اقل من الكيا ريو اللى
جربناها بعد كدة وده احنا ارجعناه لوزن العربية الثقيل، لان طبقا الكلام
وائل العربية وزنها حوالى 1500 كيلوجرام،على الخامس كانت سرعة العربية
100 على 2700أر بى إم والمحرك مالوش صوت،ابتدا صوت المحرك يبان بعد110
واصبح ظاهر مع 120

عملنا مع المحرك إختبار المرونة فى الأداء، على المطلع إدينا العربية
الخامس على سرعة عشرين كيلو فى الساعة، وابتدينا نزود، المحرك استجاب
بمرونة ممتازة وبدون رعشة تقريبا(تقرييييييبا)لحد ما وصل لسرعتة القصوى


برغم ان المحرك صوته مقبول جدا لكن عزل الاصوات الخارجية عن الكابينة مش
بنفس المستوى، الصوت مسموع جدا من تحت العربية وصوت الهواء مسموع جدا
من خارج العربية رغم اننا كان قافلين الشبابيك،هارجع تانى للنوبيرا
واقول ان الإسبرانزا نفس مستوى عزل الصوت تقريبا

الثبات على الأرض كان شئ رائع بصراحة، الطريق اللى احنا كنا بنجرب عليه
كان فيه عالى وواطى بس الإسبرانزا كان ثباتها يستحق الإشادة، هى اقل شوية
فى الثبات من التويوتاالعيون لكن احسن شوية من الكيا ريو،ودا انا
بارجعة لقاعدة عجلات العربية العريضة

القدرة على التحكم فى العربية فى الملفات افضل من معقولةلكن غير مبهرة،
يعنى بالمقارنة بالعريبيتين التانيين اللى جربناهم كانت الإسبرانزاالأقل فى القدرة
على المناورة،بس برضة لازم نلاحظ انها كانت الأكبر حجما فى التلاتة،الباور
ستيرنج بتاعها عادى، عامل زى الباورستيرنج بتاع الفيات، مش خفيف اوى
لكنه يقضى الغرض، يعنى هو باور ستيرنج وخفيف جدا طبعا بالمقارنة بأى
عربية مافيهاش باور، لكن باور التويوتا مثلا كان اخف منه بمراحل

مشوار دواسة البنزين طويل جدا، بيفكرنى برضة بالنوبيرا،لكن الفرامل
ممتازة وقادرة على ايقاف هذا الطن ونص من الحديد بكفاءة بالغة

العدادات مريحة وسهلة القراءة،توزيع اماكن الادوات معقول لكن ربما يفكر
الإخوة فى شيرى فى بعض تعديلات بسيطة له فى الجيل القادم

يعنى ان لو حبيت اقارن العربية دى بالشيرى ِِإيه 11 هقول انها متفوقة
عليها جدا فى هدوء المحرك والشكل الخارجى والداخلى

ولو هقارنها بالنوبيرا هلاقى انها اوسع واشيك ومحركها اهدأ شوية وصاجها
الخارجى احسن

فى حدود تمنها عربية ممتازة وهى جديدة،وفعلا بتحس لما تركبها انك خدت
حاجة تمنها اكتر من فلوسك

فاضل بس اننا ننوه اننا لسة مانعرفش حاجة عن العمر الإفتراضى
لاجزائها،وعن شكل الدعم الفنى وتوافر قطع غيارها، صحيح ان تاريخ حسام
ابو الفتوح مشرف مع دايو اللى نجح إنه يخليها عربية شعبية فى مصر اللى
من سبع سنوات فقط عمرها ما كانت تعرف ان فيه شركة اسمها دايو وانها
بتعمل عربيات،ولكن اللى بيشترى اسبرانزا حاليا هو بيراهن على نجاح حسام
ابو الفتوح معاها، حتى لو كانت نسبة النجاح عالية بس لازال فيه نسبة
مخاطرة

سبعاوى

و سوف أوالى وضع كل الاراء و هذا الموضوع للقراءه فقط و ليس للتعليقات


موضوع الرسالة: لمحات عن المحرك المصنوع من الألومنيوم

--------------------------------------------------------------------------------


انا أول مرة اعرف منكم ان بلوك محرك الإسبيرانزا مصنوع من الالومنيوم

لكن عموما هى حكاية البلوك الالومنيوم دى ظهرت فى بعض-وأؤكد بعض وليس كل-السيارات الحديثة وهدفها الأساسى هو تخفيض وزن المحرك وتكلفة التصنيع

إزاى

فى البداية احب اوضح حاجة ، اننا مش بنتكلم هنا عن الومنيوم صرف لكن عن سبيكة من سبائك الالومنيوم تسمى شعبيا الأنتيمونيا، دائما تستعمل لعمل الفارغات (housing)والأجزاء غير المتحركة فى المحركات والأجزاء الميكانيكية الأخرى ومنها على سبيل المثال لا الحصر، فارغة الدينامو ، فارغة صندوق التروس، فارغة طلمية المياه، فارغة المارش،الجنوط الاسبور.. إلخ

تتميز هذة السيبيكة بعدة مميزات اساسية: ا-خفة الوزن(ثلث كثافة الحيدي تقريبا) 2-انخفاض درجة الإنصهار والسيولة العالية عند الإنصهار مما يسهل استخدامها لعمل الاجزاء ذات الأشكال المعقدة 3- غير قابلة للصدأ مما يسهل استعمالها فى الأجزاء المعرضة للهواء بدون تزييت

اشهر استخدام للأنتيمونيا فى المحركات هو وش السلندر الذى اصبح يصنع من الانتيمونيا منذ فترة طويلة جدا ولذلك لم تعد اوشاش السلندر لمحركات البنزين تصنع من الحديد منذ عهد بعيد

عيوب الأنتمونيا: انخفاظ الصلابة الى حد بعيد مقارنة بالحديد(القوة اللازمة لكسر مقطع من الأنتيمونيا لا تزيد عن 1على 5 من القوة اللازمة لكسر مقطع مماثل من الحديد العادى)، انخفاض الصلادة(مقاومة الخدش) فيما معناه انه يمكن خدش سبيكة من الأنتمونيا او قطعها بالمنشار بسهولة شديدة جدا عن خدش او نشر قطعة ممثالة من الحديد، واخيرا انخفاض مقاومة الإجهادات الحرارية، (نعرف جيدا قصة وش السلندر اللى يبتعوج لما الموتور يسخن عن اللازم)، غير قابلة للتشكيل على البارد(الطرق والسحب) مما يجعلها لا تصلح للتشغيل بالحدادة

بدأ استخدام سبيكة الانتيمونيا فى بعض السيارات لتصنيع البلوك بديلا عن الحديد، وذلك اتباعا لإحدى فلسفتين، 1- صناعة سيارة اقتصادية (سهولة تصنيع البلوك الالومنيوم وخفة وزنه التى تخفف وزن السيارة ككل وتقلل الطلب على احمال عالية على اجزاء السيارة المختلفة) اما الفلسفة الأخرى فهى تصنيع سيارات رياضية يستفاد بخفة وزن محركها فى رفع تسارعها وسرعتها القصوى

لهذة الفلسفة اتباعها، كما رأينا فى محركات سكودا والسوزوكى سويفت واخيرا الإسبيرانزا
وفى نفس الوقت فلسفة البلوك الحديد لها ايضا اتباعها مثل معظم السيارات الاخرى الفيات والبيجو والهيونداى والكيا والتويوتا والنيسان الخ

مثلما ان للمحرك الالومنيوم ميزة فى خفة الوزن فإن له عيب الإصلاحات الكبيرة(كالعمرات مثلا) حيث ان اقل خطأ فى الفك والتركيب والتناول اثناء الإصلاح(وهو ما يحدث كثيرا فى بلدنا) يؤدى الى اضرار جسيمة فى البلوك(مثل تفويت القلاووظات، كسر للأجزاء البارزة من البلوك...الخ) ولذلك فإن التعامل مع بلوك من الألمونيوم يحتاج الى ميكانيكى من النوع الذى يعمل بالشوكة و السكينة والى زبون تكون عينية فى وسط راسه

وعلى ذلك فإن البلوك الألومنيوم ليس كله خير ولا كله شر، كما ان البلوك الحديد ليس قطعة من الماضى لأن البلوك الالومنيوم لا يستطيع الحلول محله فى السيارة المبنية على فكرة القابلية لإعادة تجديد المحرك

وبالتالى فإن اختيار كل منا يتوقف على احتياجاته من السيارة ولكن من الجميل ان يعرف كل منا مميزات وعيوب ما اختاره

نوبير و لا اسبيرانزا:
هحاول ابسط لك الموضوع علشان ماتتعبش كتير

من وجهة نظر الاداء الإتنين زى بعض تقريبا(تسارع وثبات وتحكم وصوت)
من وجهة نظر الإتساع الإتنين زى بعض
من وجهة نظر التقفيل: الإتنين بيطلعوا من نفس المصنع ،وعموما هو مصنع سمعته فى التقفيل جيدة

الفروقات تنحصر فى الآتى:
ما هو فى صالح النوبيرا: عمر افتراضى معروف، لا توجد مغامرة فى شراءها،خامات الصالون افضل،ششعبية مرتفعة فى السوق
ما هو ضد النوبيرا: شكل كلاسيكى، توقع توقف الإنتاج قريبا،قصر عمر المقصات،قصر عمر الرشاشات

ما هو فى صالح الإسبيرانزا: شكل حديث، كماليات عديدة بالسيارة،صالون ذو شكل فاخر
ما هو ضد الإسبيرانزا:خامات الصالون ليست بجودة النوبيرا، اداوت القيادة لا تعطى إحساس السيارة الزيرو(وخصوصا عصا الفتيس)،لا توجد معلومات متوافرة عن عمر السيارة الإفتراضى ولا عن عيوبها المتوقعة حيث انها سيارة لا تزال جديدة من شركة لا تزال جديدة ايضا وبالتالى لا توجد سوابق للحكم عليها

فى كلمة ونص: لو انت ميال لعدم المغامرة وعايز حاجة معروف اولها وآخرها هات النوبيرا
لو انت متقبل فكرة انك هتغامر فى مقابل انك تاخد غربية فيها كماليات زيادة وشكل احدث بس انت متعرفش العربية دى هتعيش اد ايه وهتتباع بعد كدة بكام يبقى الإسبيرانزا

كلام كريم منير
الاسبيرانزا بتاعت وائل عطية
العربية واسعة - تقيلة -راسية-تسارع حلو فكرني باللانوس جبت بيها لحد 160 كم وكان جنبي شريف المصري وورا محمد علاء وحازم خضر
العربية تجميعها حلو من غير تكييف - بالتكييف زبالة
شريف كان مرعوب لما وصلت ل 160 ويصرخ ويقول مش عايز اموت في عربية صيني (بجد كان احلي فيلم كوميدي عيشتة في حياتي ) ويقولي دول هايلمو لوائل ويجبولوة غيرها عشان يخلصوا من شريف المصري
العربية قواعد الموتور مش حلوة والتقفيل الداخلي سيء بس واصعى وكماليات كتير
تكييف تعبان حتي علي 4 وبيحط علي الموتور قوي- العفشة مش اد كدة وفي خشونة بسيطة في الفتيس
بس زاوية الؤية فيها جيدة جدا ومريحة نسبيا بس العزل سيء داخل الكابينة
شايف انه لسه سنتين علي ما نحكم عليها بجد وتدخل مقارنة


الاستاذ عماد عثمان:
عاوزين بامانة شديدة تقول لنا عن مزاياها وعيوبها بالتفصيل
1- متانة الصاج
2- الاكسسوارات والمزايا فى السيارة من ناحة الاوبشن
3- قوة الطلعة بالسيارة ومستوى السحب
4- اعلى سرعة جبتها بيها
5- التابلوة ومستوى تشطيبه
6- الفرش ومستواه
7- العفشة وحالة السيارة عند تحميلها
8- الاحتكاك من تحت عند عبور المطبات
9- مستوى التكييف
10- التعامل مع الوكيل فى صيانة 1000 وهل انت راض عن مستوى الصيانة


متانة الصاج كويس جدا و ناشف وتقريبا فى نفس متانة الفيات و التويوتا و البى ام وانشف من الهيونداى لانها كانت معايا
الاكسسوارات والمزايا فى السيارة من ناحة الاوبشن دى بقا كتير جدا وبجد حاول تقرا بداية المشاركات هنا وعلى كونتكت كارز لانه لا يمكن حصره و هذا هو سبب شد النا س ليها يمكن ذكر الابشن اللى مش موجود فيها مثل شاشات الدى فى دى و الاير باج و سنسور الباركنج وتسخين الكراسى غيركدة كله موجود
قوة الطلعة بالسيارة ومستوى السحب يمكن يكون مش قوى بس مش ضعيف بس علشان انا لسه فى التليين بس رغم كدة لما بجرى السحب بيكون رائع فى السرعات العالية
اعلى سرعة جبتها بيها كانت 100 رغم انهم قالولى اخرى 80 وكانت هتجيب بس مزودتش و محستش و انا على 100
التابلوة ومستوى تشطيبه جيد بس تخيل العمالة المصرية يعنى عندى درج الطابلوه مفارق سنة جهة الشمال بس لو واحد مايعرفش العيب دة مش هيلاحظه بس انا اصلى من خوفى و الاقى ورعبى كنت بدور على العيوب بس كل دى حاجات بتتحل فى التوكيل على فكرة كفاية ذوق الناس و ادبهم حتى لو ماتحلتش بس هى بتتحل
و بالمناسبة واحد صاحبى فى الفريق معايا جاب فرنا وظهر صوت زنة فى الطابلوة عنده راح التوكيل تخيلو قالولو دى مشكلة فى الفرنا وملهاش حل اضطر انة لازم يشغل الكاسيت وهو ماشى و بيندم دلوقتى مع انى حظرتو من الفرنا و قولتلو هات اسبيرانزا مسمعش الكلام تعالوا شوفو دلوقتى لما بيركب معايا
الفرش ومستواه حلو بس طبعا زى كل الناس ركبت فرش جلد بيج فاتح
العفشة وحالة السيارة عند تحميلها العفشة جيدة بس المطبات الجامدة بحس بيها فى علبة الدركسيون مثل عيون القط وعادية فى التحميل لانها اصلا عالية بس السحب بيقل طبعا
الاحتكاك من تحت عند عبور المطبات كما ذكرت
مستوى التكييف يعمل بس ماشغلتوش غير مرتين وانا واقف لتاكيد انه يعمل ثم قفله انا فى اول 1000

التعامل مع الوكيل فى صيانة 1000 وهل انت راض عن مستوى الصيانة
لسه طبعا نظرا لظروف المباريات الودية و المعسكرات استعدادا للكاس فمش لاحق اتمتع بالسواقة كتير بس هانت خلاص

اسف لاطالتى وارجو ان اكون قد افدتكم
شكرا
عماد عثمان
اسبيرانزا رقم 10

السيارة ممتازة جدا ( احمد عبد الحميد )

lord1964@hotmail.com 11/01/2007 0302 م

عدد القراء : 266
اولا بعتذر عن عدم وجودى معكم الفترة السابقة لان كنت مشغول جدا فى العمل .
احب اعرفكم ان السيارة عملت معى حتى الان 600 كم ولا يوجد بها اى شكوى والحمد لله والله اكبر السيارة ممتازة جدا ولا يوجد اى شكوى من العفشة وعلبة الدريكسون او اى حدف للسيارة كما ذكر بعد الاعضاء بل السيارة ناعمة جدا وصوت الماتور عادى جدا خصوصا احنا فى الشتاء لازم تسخن السيارة قبل التحرك حتى يصل المؤشر الى العلامة الطويلةالزرقاء الثابتة وتحرك بالسيارة سوف تجدها هادئة وسحبها شديد وكل شئ فى السيارة يعمل بكفائة عالية والله اكبر ولا يوجد لدى اى شكوى للسيارة واستهلاك البنزين 190 كم فى الصفيحة داخل البلد .. ولسة حتى الان لم اختبرها فى السفر الطويل ولم ازود السرعة عن 80كم لانها طبعا لسة فى التليين وانصح بعض الاعضاء لا يقرصو على السيارة فى السرعة بل تعامل معها بهدوء وتكون الارجل خفيفة على الاكسراتير لانها فى مرحلة التليين. اما الفيتيس انا حاسس اننى راكب سيارة اتوماتيك.. وكل عام وانتم بخير..
اخوكم / احمد عبد الحميد

م. أمر مقارنه بين الفيرنا و الاسبرانزا

لحسن حظي اني ركبت الفيرنا حوالي سنة يوميا لأنها كانت مع واحد صاحبي وكنت معاه يوميا اما الاسبيرانزا فانا امتلكها والحمد لله.
المقارنة تكاد تكون منطقية بالنسبة للسعر لأنهم غالبا في نفس السعر. وانا هبدأ بالحاجات اللي تميز الفيرنا.
1- عربية تاريخها معروف وقطع غيارها رخيصة (يعني مش هتغامر)
2- الاستلام الفوري
3- تعدد الاختيارات بين ال 1500 و ال 1600 بالاضافة الى الامكانيات المختلفة التي يمكن اضافتها او حذفها.
اما عيوبها الملحوظة هي
1- مشاكل في الزوايا وتعد مشكلة مزمنة (خاصة مع صديقي)
2- الانتشار الفظيع. وانا شايف ان ده عيب.
3- الشكل وانا شايف انة مش حلو (مسألة ازواق)
اما عن الاسبيرانزا فمزياها اعتقد ان حضرتك عارفها ومن ضمنها
1- الامكانيات الهائلة.
2- الموتور avl
3- وكيل محترم جدا
4- شكل اكثر من رائع (مسألة ازواق)
5- ثباتها اكثر من الفيرنا.
6- نظام تعليق رياضي ماكفرسون الماني.
7- العزم بتاعها اكثر بكثير من الفيرنا
العيوب
1- ظهرت بعض العيوب في العربية وقد عالج التوكيل بعضها ووعد بحل البعض الاخر في شهر مارس.
2-فترة الانتظار الطويلة
3- قطع الغيار لم تظهر معالمها حتى الان (بس اعتقد انها مش هتكون غالية يعني زي دايو او اقل)
4- حتى الان العربية في مرحلة بناء السمعة والشهرة ولم تنتهي من ذلك حتى الان.

ونصيحة صغيرة اوي لأي حد معاه سيولة وعايز يشتري عربية اقولة احجز وانت مطمئن وانتظر لغاية شهر 3 وشوف اية اللي حصل في المشاكل اللي موجوده في العربية لو اتحلت يبقى خلاص ولو لا قدر الله عجزوا عن حلها (لا اتوقع ذلك) يبقى تاخذ فلوسك وتجيب فيرنا او لانوس.
شكرا
م/آمر يحيى

أستاذ خالد
بعت النوبيرا واشتريت اسبرانزا 2007 ولكن !!

khaledsdk@hotmail.com 28/01/2007 1234 م

أرجو أن تباركولي فقد بعت نوبيرا أوتوماتيك 2001 وجبت اسبرانزا 2007 العربية ماشية 600 كم فقط لونها سماوي غامق مش فاتح وميتاليك وإليكم الملاحظات وأرجو الرد والتعليق :
1) شكلها الخارجي والداخلي جيد وشيك .
2) درجة عزل الصوت (الهواء والطريق والأسفلت) أعلى في النوبيرا عن الاسبرانزا حيث أشعر بكل نتوءات الطريق
3) حجمها من الداخل أكبر من النوبيرا وأعرض
4) موضع عصاية الفتيس غير مناسب كان عايز ينزل تحت شوية كي يكون في متناول اليد بسهولة.
5) مكن رفع الزجاج قوي وسريع ، ون تتش للفتح فقط.
6) الشنطة نفس حجم شنطة النوبيرا تقريبا.
7) عزم الموتور أقوى من النوبيرا
8) الثبات على الطريق جيد مماثل للنوبيرا
9) يوجد رجرجة في المطبات(حالة عامة )
10) التكييف البارد بيجيب هواء ساخن ، لا أعرف لماذا ، لو حد عنده حل يقولي ، الزراير مضبوطه على البارد.
11) في المانيوال بتاع العربية مكتوب فيه حساسات في الاكصدام والمفروض بيكتب المسافة اللي باقية بينك وبين اللي وراك في التابلوه ويعطي صفارة وهذا لم يتحقق، هل شغال عند حد ؟
12) الأبواب عايزه ضبط والشنطة لازم ترزع الباب عشان يقفل كويس ، طيب ليه ماضبطوهاش في المصنع ؟
13) صوت الموتور مسموع عن موتور النوبيرا ، لكن عزمه حلو
14) دواخل الرفارف الأربعة ليس بعا فبر لحماية الرفرف من الأوساخ والطين مما يعرضها للبارومة بسرعة ، فهل يمكن تركيبه لها ، وعند مين ؟
15) أحيانا مع الغيار الثاني لما أدوس أوي أشعر برعشة(مش كركرة أو تصفيق لا) في الطلعة ثم تذهب بعد ذلك ، لماذا ؟

عموما العربية كويسة مش وحشة انا باعتبرها النوبيرا الجديدة لأنها نفس الفئة ونفس المواصفات تقريبا
بس مشكلتي الكبيرة في التكييف مش شغال خالص، دفع الهواء كويس لكن التبريد مافيش ، ما الحل غير التوكيل

انا قربت على صيانة الألف كيلو وسامع فيه ناس دفعوا 300 و 400 جنيه ليه هي مش صيانة مجانية عدا الزيت فقط ؟

أرجو الرد والتعليق للإفادة وشكرا

أستاذ محمد مرسى:
ستاذا.moh_code ..
بالنسبة لموضوع الحجز والأستلام .. أنا واخدها من معرض بيبعها فورى .. وأستلمت السيارة من السويس بسعر حسبه لى المعرض بــ 70000 جنيه ..
وعشقى للسيارة جاء بعد دراسة مستوفية كاملة عنها (عشقتها قلبا وعقلا) وهذا ما جعلنى أشتريها فورى ..
والدراسة التى عملتها على السيارة كالأتى :
1- الجسم الخارجى متين جداً .
2- التصميم أراه أكثر من رائع .
3- المكونات الداخلية من موتور وعفشة
4- الأوبشن الكثيرة
5- حماية الركاب من فرامل وقضبان صلب ..ألخ
6- أراء مالكى السيارة (بعيداً عن المنتدى)
موضوع صوت الفرامل أنا فعلا سمعته لكن كانت مرة واحد فقط ومعلقتش فى دماغى ..
وعلى فكرة الفرامل أكثر من رائعة .. وخاصة نظام ABS وقد جبتها بنفسى على طريق السويس قريب من مدينة الشروق وأنا راجع مصر بعد الأستلام مباشرة فوجئت بسيارة نصف نقل يتطاير منها علب بلاستيك على ما أظن .. والنصف نقل ركنت على شمال الطريق وناس واقفة على الطريق راحت تلم الحاجة اللى وقعت وأنا على سرعة 100 كم وعلى بعد حوالى 100 متر أو 150 متر بدأت أفرمل وخش فى اليمين كل ده حدث بسرعة كبيرة وحاولت أرجع للشمال تانى علشان ابعد عن أحد الأشخاص اللى بيلم الحاجة من الطريق وطبعاً بحاول أتفادى الحاجة نفسها .. بصرحة رغم قلقى الشديد بعد اللى حصل وتوترى لكن السيارة عملت اللى عليها بالمظبوط وكان أداء السيارة أكثر من رائع لم تعوم أو تخرج عن سيطرتى ...
وتقبل تحياتى ..

م.سامى:
صيانة 5000 كم والحدفة اليمين

samih_mail@yahoo.com 30/01/2007 01:08:15 ص

قمت بعمل صيانة 5000 كم فى جسر السويس
كان فى لمبة عليها رسمة مفتاح عند عداد الRPM بتنور كل كا ادور وتطفى بعد كدة
يوجد مكان معقول جدا لانتظار العملاء هناك
ويوجد لافته معلقة بانهم لا يستقبلوا عملاء سوى الحاجزين فقط
استقبلتنى مهندسة استقبال و دونت ملاحظاتى وهى الحدفة اليمين وان الباب الامامى يمين تقيل شوية
بعض محضر الاستلام وهو ورقة بها رسمة السيارة لبيان اذا كانت مخبوطة قبل ماتروح لهم ولا لا و كشف بالمحتويات الاستبن والكوريك وخلافه
بعد حوالى 10 دقائق قام احد الاشخاص بأخذ السيارة للورشة وبعدها بشوية لقيته بينادينى علشان نجرب العربية
رحنا جربناها وقد اختفت الحدفة تماما!
سألته عملوا ايه قاللى انهم بدلو الكاوتش الامامى - أى اليمين ركبوها فى الشمال والشمال ركبوها فى اليمين
بعد التعارف قاللى ان اسمه م. وليد الشربينى
وكانت العربية ريحتها WD40 مرشوش على كل كوالين الابواب
وكل الابواب أصبحت تقفل وتفتح بسهولة شديدة
رجعنا الورشة ، كانت هواية التكييف اللى اسفل الزجاج الامامى مخلوعة من مكانها فعملوها
دفعت فاتورة الصيانة وهى 79 جنيه ومشيت وانا مبسوط جدا
ان اكتر مشكله كانت مضايقانى اتحلت
بالمناسبة لقد قالت لى مهندسة الاستقبال لنهم هيغيروا جلبتين اللى فى علبة الدركسيون اللى ماسكين البارات فى التغيير القادم
هو ده فقط اللى هيتغير مش خراطيم الباور ولا العلبة
م. سامى

أستاذ محمد صبرى ابراهيم
مقارنه بين الالانترا الاسبيرازا و الفيرنا


يا أستاذ وائل أنا هنا هاسرد بعض الحقائق عن الالنترا

أولا : الالنترا الجديدة ديه اسمها برة النترا 4
و اللي قبلها 2001 - 2006 النترا 3
و اللي قبلها النترا 2
و هكذا حتى النترا 1

لحد ما نزلت الالنترا 3 ، كانت الالنترا بتعاني من بطء في التسارع و ردائة خامات التقفيل

من أول النترا 3 ، هيونداي بداءت تحسن في الجودة فيها و قامت بتطوير الماتور قليلا لتحسين موضوع التسارع (يعني العربية مارت بالمراحلة الطبيعية لتطور أي عربية ، اللي بعض الأعضاء بينكروها بالنسبة لبعض العربيات الأخرى)

نيجي لنقطة الفئة
الالنترا تنتمي لفئة السيارات الاقتصادية الرخيصة في الخارج، بمعني "ما تشتريهاش غير لو معامعكش أكتر من تمنها"

نيجي لنقطة السعر
الالنترا 3 برة بتتباع في حدود من 10000 إلى 11000 دولار (و ده موديل 2006) أي ما يعادل 57000 جنية هنا في مصر (المفروض طبعا)
الالنترا 4 برة بتتباع في حدود 13000إلى 14000 دولار (و ده موديل 2007) أي ما يعادل 75000 جنية هنا في مصر (المفروض طبعا)

لما نقارن الالنترا 3 بالاسبيرانزا
تلاقي ان الاسبيرانزا بالنسبة للسعر تبداء من 12000 دولار أي ما يعادل حوالي 68000 جنية هنا في مصر، و ده قريب جدا من سعرها في مصر (وديه ميزة، إني بركب عربية تمنها هو هو في أي حتة في العالم، مش بشتريها هنا بالغالي و برة هي أرخص من كدة)

بالنسبة للماتور
لسة لم يختبر و لم يتضح معالم عمرة الأفتراضي، و لكن أنا شخصيا يكفيني و يعطيني ثقة في هذا الماتور(و ده رأيي الشخصي) إن شركة زي فيات (شركة أروبية عريقة جدا) هاتنزل عربياتها المتقفلة في الصين بهذه المواتير، و من ثم ستقوم بعد ذلك بإنزال هذا الماتور في عربيتها ال Brava
و ده رابط للكلام ده
الرابط

بالنسبة للفرامل ال ABS
فا فرامل ال ABS في الاسبيرانزا هي من ماركة Delphi و هي شركة مقرها أمريكا و لها أكثر من 10 فروع على مستوى العالم و مقرات إقليمية، و ليست كما أفتى بعض الناس إنها إختراع صيني و سموه ABS، , و ده رابط للشركة (للإضطلاع لمن يهمه الأمر )
الرابط

بالنسبة للفئة
هي نفس الفئة، فئة العربيات الاقتصادية الرخيصة في الخارج، إللي بردة "ما تشتريهاش غير لو معامعكش أكتر من تمنها"

فبالتالي لو أنا جيت أتكلم مع أي حد و أقوله إن الاسبيرانزا ما ينفعش أقارنها بالالنترا أكيد هايضحك عليا

ليه؟؟؟؟؟؟؟؟؟؟؟؟؟؟

لأن ديه 1600 و ديه 1600
السعر، الاتنين في نفس الفئة السعرية
ديه عربية رخيصة و ديه عربية رخيصة (برة مصر طبعا، لأن هنا الوكلاء بتضحك على الناس من الآخر و بتبعلوهم الحاجة بسعر عالي أكتر من قيمتها الفعلية، مش في العربيات بس، لأ في كل حاجة)
طول قاعدة العجل في العربيتين تقريبان زي بعض، مما يعني إن فئة الصالون بالداخل هي هي.

بس ممكن أقول إن الالنترا علشان أقدم مرت بمراحل تطور أكتر من الاسبيرانزا فهي ممكن تكون أكثر استقرارا، ممكن تكون مشاكلها اتعرفت و بقت محددة، ممكن تكون خامات التابلوة أحسن أو أوحش كدة، لكن أقول "لا تقارن" ده كلام بجد غريب و غير موضوعي بالمرة و يحتاج الكثير و الكثير من المراجعة، علشان يكون كلام منطقي و يلتفت إليه و يسمع

و ده رابط بيشرح معلومات عن مراحل تطور الالنترا
الرابط

بالنسبة بقى للفيرنا

فبجد لا تعليق، العربية ديه بجد أنا مش لاقيلها كلمة أوصفها بيها، غير إنها حركة حلوة و زكية من غبور للوقوف أمام اللانوس بعد ما قضت تماما على الأكسنت (ممكن نسميها إفتكاسة)
ماتور أكسنت بتعديلات بسيطة جدا جدا جدا
شاسية غير معروف
حتى شكل المقصات الخلفية مختلف عن أي مقصات في أي عربية مطبقة نظام تعليق McPhrson هي فعلا كل عجلة منفصلة، بس المقص فيه تقوص غريب!!!!!!!!!!!! و بصراحة لا أعرف المساعد بيربط فين في المقص
صالون عاااااددديييييييييييييييي ي جدا جدا صالون اللانوس و عدادتها أحلى منها بكتييييررر (مسألة أذواق) و ده رأيي الشخصي.
وزن العربية خفيف حوالي 1110 كجم و هو ده سبب التسارع الجامد إللي في الأول، لكن العربية بعد كدة بتتكشف على السرعات العالية لمسافات طويلة (حيث الأداء إللي بجد و العمر الافتراضي)، حيث يجب أن تقرص على العربية علسان تجمع في سرعة عالية، و بالتالي ما تقدرش تمشي بيها كدة (140 - 160 كم مثلا) لفترة ساعتين مثلا متواصل، لأنك قارص على الماتور، لازم تهدي سرعتك شوية (ده طبعا لو كنت عايز تحافظ على الماتور و تطول عمرة، أما لو عايز تجري جامد و خلاص فا دوس , و العربية هاتقبل)

أستاذ محمد صبرى
الاسعار:
والله يا أستاذ زيزو

أولا 66000 زي 67500 زي 64000

مش هو ده الفرق

عارف ليه الاسبيرانزا فيها كل الأوبشنز ديه و بالسعر ده

1 - تقفيل مصري (زيها زي اللانوس و الفيرنا) مافيش جمارك يعني
2 - يا ريت نفتكر أقبل تحرير سعر صرف الدولار كانت اللانوس بكام، كانت ب 42000 جنية
3 - الأوبشنز ديه كلها لعب عيل، وحدة كونترول واحدة بتعمل كل ده، و اسمحلي ال CAN-Bus في الاسبيرانزا متطور جدا و فيه إمكانيات كتيير جدا زي الأجانب ما بيقولوا (Out of the box) يعني إمكانيات كتير زيادة عن إحتياجك و هو هو بنفس السعر الطبيعي لأي CAN-Bus موجود في أي عربية، صناعة الالكترونيات و الرقائق المدمجة تطورت تطور غير عادي من أول 2005 (أنا أساسا مهندس إتصالات و إلكترونيات) و أول حاجة عملتها إني قريت عن الشريحة ديه في الاسبيرانزا كويس جدا و بتركيز و لو حضرتك إحتجت أي معلومات هنها قولي و هاحاول أوفرها لحضرتك بقدر المستطاع.
4 - الاسبيرانزا كدة تمنها زي تمنها في أي حتة تانية بتتباع فيها في العالم ، الدور و الباقي على حاجة زي اللانوس بتتباع برة ببلاش (عربية لا تنتج من 8 سنين) و الفيرنا إللي مالقيتلهاش تمن برة أصلا،
و الأتنين بيتباعوا هنا بي متوسط سعر 66000 ، أليس هذا هو الأدعى للتساؤل ؟؟؟؟؟؟؟؟؟؟؟؟؟؟؟؟؟؟؟؟؟؟؟ و على فكرة الأسواق برة أسواق منطقية قايمة على حقائق في تحديد الأسعار، مش زي هنا في مصر، السوق رهن بأحلام الوكلاء،