السلام عليكم ورحمة الله وبركاته

طبعا كالعادة وزي م كل الناس عملت قبل كده, وواجب عليا طبعا قبل أي حاجة إني أشكر جميع أعضاء قسم البريليانس أولا وإدارة المنتدي المحترم بجد نايل موتورز, لإني بجد لولا المنتدي والأعضاء المحترمين اللي فيه بجد وبالذات قسم البريليانس, وطبعا توفيق ربنا قبل كل ده , أنا مكنتش افكر اشتري البريليانس.

طبعا عقدة المنتج الصيني إتحكمت فيا لبعض الوقت, وكتير من الناس حاربوا الفكرة لمجرد معرفة إن البريليانس Made in R.P.C مع إني لو كنت قولتلهم إنها كوري أو حتي أي حاجة تانية كانوا نزلوا اشتروها تاني يوم, لإن الصراحة أنا شايف (ودي وجهة نظري الشخصية جدا) مش فارقة خاااااااااالص عن أي عربية كوري أو ماليزي دون داعي للهجوم علي أي موديل أو علامة تجارية بعينها.

طبعا في فروق في العربية م بينها وم بين عربيات تانية في نفس الفئة السعرية هاذكرها لاحقا, بس أنا شايف إن الفروق دي متقللش من جودة البريليانس, وخصوصا إن كمالياتها ومعاملات أمانها وشكلها اللي أحلي بكتييييييييييييير من موديلات تانية بنفس السعر يخليك تسأل نفسك طب ليه ماشتريش البريليانس !!!

أنا طبعا كنت اقتنعت بالعربية تماما بعد مجهودات بحث قمت بيها علي مدار أكتر من 4 شهور, أنا مكنتش مزنوق للعربية لإني كان معايا عربية بس صغيرة شوية فكنت بادور براحتي, وكنت عايز اغير للرفاهية مش للضرورة. طبعا قلبت المنتدي علي الفئة اللي هي من 65 ل 75 ألف لإن دي كانت الميزانية اللي عامل حسابي عليها. وكنت باتكلم في كاش مش تقسيط, عشان أنا اتلسعت من البنك في العربية الأولانية ومكنتش عايز اكرر التجربة. وبعد م لفيت سوق الكوري والياباني والماليزي والصيني, توصلت لحاجة واقتنعت بفكرة إن ليه أركب حاجة متجمعة في مصر لما ممكن أركب حاجة مستوردة بالكامل من الصين, وخصوصا إن التقفيل المصري لكتير من العربيات اللي في الفئة دي مش 100 %, مهو العربية إسمها كوري أه بس هي أصلا متجمعة هنا وبأسوأ عمالة ممكن تلاقيها في العالم , يبقي ليه لأه هاه؟ لييييييه؟

المهم – أنا أصلا بارغي كتير أنا عارف - اشتريت أول فئة ف ال fsv اللي هي 1.5 gl اللون الفيراني أو الأوليفي زي م بعض الأعضاء بيحبوا يسموه, وملقتش الكاملة مانيوال اللي هي 1.5 gls خااااااالص. مع إن زي م الناس عارفة فرق السعر اللي هو 5000 جنية م بين الهاف والفول أوبشنز لا يساوي السعر الحقيقي لبقية الكماليات في العربية ال gls.

المكان اللي اشتريت منه هو أحمد موتورز أخر شارع الهرم وهو موزع رئيسي لبريليانس وقريب جدا من البيت عندي لحسن الحظ, وكان المفرض السعر 75000 نهاااااااائي. بس انا عارف إن السعر الرسمي للعربية كان 70000 بس ده كان قبل الأحداث والثورات الأخيرة واللي كانت سبب في تغيير سعر العملة شوية قدام العملات الأجنبية, وده خلا السعر يتحرك شوية. لدرجة إن الوكيل مكنش راضي يبيع وكل م أتصل أسأل عليها يقوللي لا معنديش وهو عنده جوه, زي البقال اللي مكنش عايز يبيع للراجل الحلاوة الطحينية بالظبط. وطبعا كل المعارض عملوا نفس الحركة البايخة, حاجزين العربية عشان يبيعوا بالسعر الأعلي.

طبعا بعد م قعدت ادور علي العربية في كتير من المعارض عشان الاقي أحسن سعر زي سمير ريان والمصرية اللي تخيلوا منزلة إعلان نص صفحة في ملحق أهرام الجمعة حاطين فيه العربية وسعرها 72000 وتتصل بيهم يقولولك لا والله مش موجودة. حتي إن واحد من الأعضاء اللي هو (خالد ساجا) وهو من بنها أساسا قاللي دي موجودة في فرع المصرية بتاع طنطا جميع الألوان ب 72000 ومشكورا الراجل راح هناك عشان يشوفها لنفسه برضه لإنه كان ناوي يشتري زيي, وكنت علي استعداد اروح أجيبها من طنطا بالسعر ده, لكن خالد كلمني وقاللي لأ المصرية ضحكت علينا لتاني مرة والعربية مش موجودة عندهم خالص.

أنا ساعتها توكلت علي الله وقولت لنفسي إن السعر ده علاقة في العرض والطلب علي العربية, بمعني إن المعروض من العربية قليل والبياع من حقه يبيع بالسعر اللي يناسبه, المهم السعر ده يناسبني أنا ولا لأ. بس أنا طبعا قعدت فاصلت مع المندوب اللي في المعرض لما الراجل فعلا فعلا قرف مني, ولما قولتله في الأخر هاروح أجيبها من الأحمدي موتورز بـ 74000 اللون الأسود منها (أنا طبعا باهدده لإني مكنتش عايز إسود خالص بس هي كانت فعلا موجودة عند الأحمدي موتورز في الحي السابع ب 74000), قام قاللي خلاص هاديهالك بـ 74000
في الأااااااااااااااخر خالص توصلنا لـ 73500

المهم اشتريت يوم 13 مارس 2011 ومقلقتش إني اشتري يوم 13 ولا حاجة, بس علقت 1000 جنيه لحد م الورق ييجي, اللي هو الإفراج الجمركي وعقد البيع وأخدت من المعرض بس حاجه إسمها إقرار تسليم سيارة مكتوب فيه التاريخ والساعة.

طبعا الإنطباع الأولي العربية خرافة, ويمكن ده سببه إني كنت سايق عربية 800 سي سي ومن غير عفشة ولا مساعدين تقريبا, وفجأة لقيت نفسي راكب حاجة كبيــــــــــــــــــــــ ـــــــــــــــــــرة إسمها ال fsv. العربيية بصراحة كبيرة عليا بالظبط 4580 مللي يعني اربعة متر ونص تقريبا وفارقة كتير عن عربيتي القديمة اللي كانت سوزوكي ألتو. لكني كنت مندهش من إني خدت عليها بسرعة جدا, يادوب مشوار واحد من الهرم لحد بيت الوالد في رمسيس وانا راجع طلعت علي ميدان لبنان والدايري, حسيت إني انا والعربية بقينا صحاب. ومن كتر فرحتي استلمت العربية من المعرض ونسيت ابص علي أي حاجة من الحاجات اللي الأعضاء هنا كانوا بيوصوا بعض يبصوا عليها, أتأكدت بس ان العربية عاملة 55 كيلو بس وبصيت علي عداد البنزين والأنوار ف السريع, وجريـت.

نتكلم بأه شويه عن العربية:

أولا: الموتور DOHC 16V VVT اللي هو المفروض نفس موتور التويوتا الأفانزا علي م سمعت, والمفرض كمان قطع غياره هي هي نفس قطع غيار موتور الأفانزا, وطبعا لم أتمكن حتي الأن من اختبار القدرة الحقيقية لهذا المحرك عشان مبجريش بيها أوي. يعني أخري 90 ع الدايري مثلا والأر بي إم مبيزيدش عن 3000, لكني مستمتع فعلا بقيادة عربية فيها محرك بتكنولوجيا تويوتا ومطمئن جدا من الناحية دي.

ثانيا: العفشة تمام أوي, وفعلا اللي اخترع نظام التعليق ده والمساعدين وسيستم الفرامل ده محتاج مننا تصفيق حار, علي كيفية جمعه م بين النعومة والثبات, هي طبعا عفشة رياضية بعض الشيء وهتحسسك بالمطبات بس مش أوي, وهتفرق معاك في الملفات والمنحدرات الكبيرة زي م كتير من الأعضاء اللي معاهم العربية قالوا قبل كده. العفشة طبعا من تصميم شركة لوتس الإنجليزية ومش محتاج اتكلم تاني.

ثالثا: الصالون والفرش الداخلي بصراحة يستاهل 7 علي 10, فهو فخم ولا ينقصه الزوق والتصميم المريح للعين لكن خاماته متوسطة الجودة والتقفيل النهائي مرضي ولكن مش ممتاز, وده بالنسبة لي أمر غير هام بالمرة لإني مش محتاج من العربية أكتر من موتور وعفشة وفرامل ونظام أمان عالي زي اللي في البريليانس. أما فيما عدا ذلك فلا يؤثر علي العربية كمنتج من وجهة نظري.
بالمناسبة الصالون واسع جدا والشنطة بحر مالوش أخر – 470 لتر - لا تنافسها من وجهة نظري عربية تانية من حيث الوسع الداخلي في نفس فئتها السعرية ولا حتي اللوجان.

رابعا: الشكل الخارجي والمظهر طبعا جذاب أخر حاجة, كفاية الفوانيس مع مكبرات الضوء والعلامة التجارية للبريليانس سواء في الأمام أو الخلف والإشارات الضوئية اللي في المرايات تعطيك الإحساس الحقيقي بالفخامة, ولا كإنك راكب عربية فولكس فاجن وبدون تحيز. الرفارف والعجل ال 15 بوصة مع خطوط تصميم ذات طابع إيطالي مخلية العربية شبابية وعصرية جدا.

خامسا والأهم: معاملات الأمان ونظام الفرامل ال ABS-EBD والإيرباج للسواق والراكب الأمامي ونظام قفل الأبواب بعد ال 20 كيلو/ساعة وكتير من الحاجات اللي لم تختبر بعد أنا معاكوا, وربنا يسترها معانا ومنحتجلهاش, بس فعلا فعلا مخلياني سايق وانا مطمئن ومحسساني إني مدفعتش فلوسي في حاجة ملهاش لازمة أو حتة خردة زي م ناس كتير قالت.

الخلاصة ليك قلب جامد اشتري بريليانس, ولو كنت بتخاف اركب 128

أنا طولت عليكم أوي أنا عارف, بس الموضوع موضوعي بأه براحتي, وهاكمل الموضوع بعدين إن شاء الله بس إدوني فرصة أخد نفسي. المشاركة الجاية هيكون فيها الصور إن شاء الله ومصاريف استخراج الرخصة, عشان أنا لسه مرخص أول امبارح يوم 21مارس بعد م استلمت بقية الورق.
تخيلوا مقدرتش اركن العربية الفترة دي كلها وماشي بيها من غير نمر وعملت 500 كيلو تقريبا من غير لوحات, عشان بس متعة قيادة البريليانس, بحبها يا ناس بحبها ......... بحبها.