الموضوع: مرسي مطروح

أه صحيح في حته إسمها حمام كليوباترا رائعة الجمال .. (اللي متصورة عندها فاتن حمامه لما الولد غرق فيه )


شكلها كده يا أستاذ aif فعلا ههههههههه..

السلام عليكم و رحمة الله و بركاته

أولاَ أنا أحب أهنيك على الإختيار الصحيح دة لأن أنا شايف إن مرسى مطروح أحسن بكتير من مصايف تانية زي شرم الشيخ و الغردقة و العين السخنة فا دائماَ مش الغالي بيبقى الأحسن .
أنا ذهبت لمرسى مطروح 4 سنوات متتالية أخرهم كانت سنة 2003 بس أنا كنت أنا و العائلة كنا بنروح من الساحل الشمالي من الكيلو 48 و الطريق طبعا عامل زي طرق مصر مش مستوي بس جيد برضه كنا بنقوم الساعة 8 الصبح و كانت بتاخد مننا 4 ساعة و كنا بناخدها طوالي من غير إستراحات و كنا بنروح ب 128 EXCEL FLICIA و الحمد لله ما بيسخنوش مننا في السكة خصوصاَ ال 128 و كنا في السكة بندخل مدينة اسمها الحمام في الكيلو 64 و بنعمل SHOPPING ونكمل تاني المهم أول ما توصل حذار لأن في طريقين واحد فيهم المدخل أما التاني دة طريق السلوم و دة بقى 250 كيلو تانية فحذار .
بالنسبة لأسعار الشقق و الفنادق أنا معرفش لأن إحنا كنا بننزل في شقق تبع الحري - الجيش عموماَ - و كانت في الآخر جنب فندق البوسيت و كان على الناحية التانية على بعد 350 متر شاطئ الغرام و اللي بينهم دة مدخل خليج و المهم أهم الشواطئ عجيبة - كليوباترا - الأبيض - روميل - البوسيت - الغرام مرسى مطروح بتتميز بمياه البحر الجميلة ذات اللون الفيروزي و الموج الهادئ يعني لا خوف على الأطفال في حدود 20 متر و ممكن أبعد من كدة كمان ما عدا شاطئ الأبيض تقضية اليوم الصبح فطار و بعدين نزول البحر و على الساعة 4 الغداء و بعديه فترة الراحة , الساعة 7 8 كدة بداية النزول و الفسح الليلية نزول الشارع للتمشية أو الآتي ركوب كاريتات بحمار - هتعجب الأولاد جداَ جداَ - ركوب العجل مع العلم إن الكورنيش بيقلبوا نصه مش فاكر من الساعة كام للعجل بس و النص التاني للعربيات يعني لا خوف على الأولاد في ركوب العجل أو الخيار الإقتصادي اللي هو سوق ليبيا هتلاقي حاجات رخيصة هناك و خاجات من ليبيا بس فاصل يعني الحاجة أم 15 خدها ب 10 أو بكتيره أوي 12 جنيه و أكيد هترجع بما لذ و طاب وعندك يا سيدي مقلة النصر و علم الروم النصر أشهر مقلة بتاعت لب و كنا بنجيب لقرايبنا منه بالطلب علشان كان لبه جميل جداَ بس مش عارف بقى عمل إيه بعد كدة و عندك كمان الزيتون الأسود هناك تحفة إشتري كمية و أنت راجع بس بؤضه مش عارف أحواله إيه في السنين اللي ما روحتش فيها غير كدة بقى ممكن تدخل سينما أو تقعد على كازينو أما الفسح في الصبح بتبقى كالتاي إما شاطئ عجيبة و دة لو قعد اوصفلك مش هقدر أبين لك قد إيه هو حلو دة فعلاَ جنة الله في ارضه و عامل زي الخيال منظر أكثر أكثر أكثر أكثر من رائع لو كان عندي سكانر كنت وريت لحضرتك الصور اللي إحنا مصرينها هناك للمنظر التحفة دة هو عبارة عن شاطئ على البحر محاط بالصخر من ثلاث جهات - و خلي بالك و أنت نازل تحت - و دة ممكن الأولاد ينزلوا فيه بس أخرهم 10 متر بعيد عن الشط بعد كدة لازم حضرتك تكون معاهم و الشاطئ عرضه حوالي 30 متر تقريباَ و الصخور اللي على اليسار ممكن حضرتك تتطلع عليها أنت و الأولاد بس برضه لحد 10 متر على الصخر و هناك قبل ما تنزل الشاطئ هتلاقي معسكر حرس الحدود و على الناحية الثانية من الصخر - هو عامل زي الهضبة - هتلاقي منشآت خرسانية مكعبة صغيرة على أبعلد متساوية تقريباَ تبعهم برضه و حضرتك رايح هناك هتلاقي أراضي بتتباع هي أراضي رخيصة ممكن لو خضرتك عجبك المكان تشتري هناك , نيجي لشاطئ كليوباترا و دة عبارة عن ساحة واسعة من الصخر في الأرض مغطى بمياه البحر و بحذر حضرتك إن الصخر دة خطر جداَ جداَ يعني على قد ما تقدر حاول ما تخدتش الأولاد و لو الأولاد مع حضرتك خليهم يمشوا بحذر و جنب حضرتك و بعد الساحة دي في الآخر هتلاقي صخرتين أكيد هتشبهم بحاجة أبو الهول أو إنسان واقف بس أكيد هتشبهم و الصخرة الكبيرة حضرتك ممكن تدخل فيها و تقعد في داخلها و لو قلبك جامد ممكن تتسلقها و هتقضي هناك وقت جميل جداَ , أما شواطئ البوسيت و روميل و الأبيض و الغرام فهي شواطئ عادية بس شاطئ الغرام خلي بالك منه لأنهم هناك معمقينه قدام الشط على طول علشان في مراكب هناك و على فكرة في صالة بولينج هناك في مرسى مطروح في نهاية الشارع اللي كنت قاعد فيه بس مش هقدر أوصه لك لأني نسيته .
بس في النهاية أنا أضمن لك أنك تقضي وقت ممتع جداَ و ممكن تكون دي أحسن أيام حياتك و أبقى قول لي عملت إيه بعد ما ترجع و إن شاء الله تروح و ترجع بالسلامة و لو في أي إستفسار أنا موجود في الخدمة في أي وقت و إن شاء الله تستمتع .

تم تعديل حجم الخط ليلائم بقية الصفحة
الادارة 1