الموضوع: تقييم شامل ل هوندا سيتى بعد 5 سنين استعمال

السلام عليكم
انا من ملاكى سيتى 2004 و قلت ان اكتب تجربتى عنها بكل حيادية و موضوعية لكى أفيد كل من يريد اقتنائها سواء كانت مستعمله او جديدة
اولا النواحى الأيجابية
1- عالية عن الأرض
2- موتور قوى بالرغم من انه 1300 سي سى و طبعا الموتور ال1500 اشد واحسن
3- تكييف ممتاز جدا زيعمل فى أقصى الظروف بكفائة تامة ولا يؤثر على أداء الموتور
4- الباور ممتاز فى المناوره حتى سرعة 120 كم ودقيق فى التوجيه وبيتقل مع السرعات
5- الكاسيت ممتاز زالسماعات الأصلية ممتازه
6- السيارة واسعة من الداخل بالرغم من صغر حجمها خارجيا لكن مش أوسع من الألنترا مثلا
7- الشنطه واسعة بشكل مشفتش زيه فى سيارة أخرى
8- الكراسى مخملية مريحة جدا وفخمة
9- التابلوة شيك جدا و سهل وبسيط ومن لونين بيج فى بنى انا شايف انه حلو
10- العدادات واضحة و جميلة
11- الرؤية من الداخل ممتازة سواء فى الخلف أو الأمام
12- العفشة الأمامية مريحة الى حد كبير جدا يعنى امتصاص الصدمات ممتاز
13- طول عمر المكونات الأساسية و الأضافية والكماليات
14- استهلاك بنزين قليل من 280 الى 320 كم لكل 20 لتر بنزين للموتور ال1300
15- ضغر حجمها بيعطيها فرصة جميلة فى المناورة والباركنج داخل الزحام فى المدن
16- فرامل ممتازه بالرغم من انها فى الموديل بتاعى مش ايه بى أس لكن بعدكده فيه أ ب س
17-نعومة فى الأت الجر غير عادية لأن الجير بوكس مش عادى (cvt) وصوت الموتور هادىء
18- الأبواب و الشنطة بيقفلوا ويفتحوا بكل سهولة ويسر وجمال
19-الخامات المستخدمة عالية و متقفلة كويس جدا بالرغم من انها تايلاند مش يابان
20- مفيش أعطال متكررة أو مزمنة بشكل يزعجك
21- الوكيل جيد الى جيد جدا ومنظم و نظيف خاصة بتاع الدائرى
22- قطع الغيار متوفرة فى التوكيل و بعض القطع متوفرة فى خارج التوكيل بأسعار اقل
23- السبورت مود فى الفتيس ممتاز و بيجمع بسرعة و ال l مود ممتاز فى العزم الى سرعة50 كم فى الساعة وبعدين تجيب ال d أو ال سبورت مود
24- سعر ممتاز لو بتشترى مستعمل بالنسبة للى هتأخده منها.
25- عزل الكابينة ممتاز جدا
العيوب والمساوىء
1- قكع غيار غالية و غير متوفر كتير منها خارج التوكيل
2-الصاج ضعيف وخفيف
3- الأكصدامات ضعيفة ومن أقل خبطة بتفك من مكانها لكنها طرية لا تنكسر
4- الفئه اللى معايا ليس بها وسائل أمان من وسائد هوائيه و أيه بى أس لكن بعد الموديل 2005 موجود كل حاجه وكله بثمنه
6- الكاوتش الأصلى مقاسه ضغير ومحتاج يتعرض شويه
7- الاتزان على السرعات العالية فى المنحنيات من بعد 120 كم/س بيقل كثيرا لأنها عاليه من الخلف و خفيفة الوزن
8- الموتور ل1300 سى سى لا يتعدى سرعة ال160 كم/س و صوته بيعلى قوى فوق كده
9- الموتور ال 1500 سى سى أفضل من ناحية القوة ولكن أعلى فى استهلاك البنزين
10- صياناتها غالية نوعا ما اذا قورنت بكورى ولكن معقولة اذا ما قورنت بأوروبى أو يابانى
11- الفرش البيج بالرغم من انه شيك لكن بيتوسخ بسرعة ويحتاج الى مراعاة مستمرة أو كسوة جلد بيج مثلا لكن الأبواب مش هتنفع يتعملها كسوة جلد لأنها هتبوظ
12- العفشة الخلفية قاسية الى حد ما و لكن ميزة لو حملت وراء كتير لأنها مبتنزلشى فى الأرض زي بعض الكورى واليابانى والسيفيك
13- على السرعات العالية (فوق 120 كم)صوت احتكاك الهواء بالسيارة بيزيد لكن العزل الداخلى بيعزل جزء كبير من الصوت
14- تيل الفرامل بيتغير كل 20-25 الف كيلو وده من رأيى انه مش كويس
15- تستخدم بنزين 92 افضل ولكن 90 هيمشيها لكن الأداء هيبقى مش كويس وصوت الموتور هتسمع فيه كركرة عالية
16- حزام الأمان مش بيتشد لمكانه لما بتسيبه و لازم تساعده يرجع لأن سوستته ضعيفه شوية
17- ليس لها اكسسوارات فى السوق لأنها مش كتير

ما هو ممكن عمله لكى تتغلب على بعض المشاكل

1- تقوية الأكصدامات عند سمكرى كويس
2- المحافظة على الفرش الداخلى بعمل كسوة وتنظيف التابلوه والأبواب اول بأول
3- تقسيم الصيانات الجامده على مرحلتين و ذلك لتفادى الكلفة العالية مره واحدة و قطع غيارها تتحمل ذلك بسهولة يعنى ممكن تأجل تغيير السيور الصيانة الجايه مثلا وتعمل البوجيهات أو العكس
4- تجنب الضغط على الفرامل مع وجود القتيس على ال d ولو هتقف أو تهدى هات الفتيس على ال n لتفادى تاكل التيل

حاجات تم تغييرها من الزيرو خلال 127 الف كم الأن
1- تيل الفرامل 5 مرات و تمن الأصلى بقى ب 320 ج
2- بلة الشداد
3- الكارتيرات البلاستيك بتاعة تحت المحرك و فوق العجل الأمامى تمن الواحدة 180 جنيه
4- فلتر بنزين مرة واحدة بس لأنه بيتغير كل 80 الف
5- زيت الجير بوكس مرتان (كل 60 الف) تمنه 400 جنيه
6- تم تغيير طنابير امامى عند 125 الف كيلو 320 جنيه
7- البطارية مرتان
8- الكاوتش مرتان
9- بلى العجل الأمامى بالخطأ فى التشخيص 320 جنيه (المشكلة كانت فى الكاوتش)
10- جزء فى كمبرسور التكييف عبارة عن ملف مغناطيسى (100 جنيه استعمال)
11- فلاتر هواء 3 مرات أو 4 مش فاكر (140 جنيه)

أشياء لم تتغير الى الأن و الحمد لله على نعمته
1- المارش أو ترس البندكس
2- الدينامو
3- السيور !!!
4- التيل الخلفى أو الطنابير الخلفية
5- طلمبات البنزين أو الماء أو الزيت
6- طلمبة الباور أو اى أى حاجة في الباور
7-صاج خارجى مثل رفارف او شنطة او ابواب او حتى اكصدامات بالرغم من انى خبطت الاكصدامات لكنها طريه
8- العفشة مازالت سليمة بالرغم من ان السيارة ماشية ل 127 الف كيلو فى اماكن وشوارع اقل ما يقال عنها انها لا تصلح للحيوانات الىى هى شوارع مصر للاسف
9- اى حاجة فى الداخل ماعدا الطفاية لانها ضاعت منى واشتريتها من الوكيل

خلاصة القول

السيارة تعتمد عليها بشكل ممتاز لا تخذلك ابدا والحمد لله اتركها بالشهر و أعود اليها تدور من أول تكة
لم تعطل أبدا فجأة اثناء القيادة او الركن ماعدا مرة واحدة فقط تعطل التكييف اثناء يوم حار جدا جدا و الرمل و الهواء كانوا صعبين كأن يوم القيامة قام وتم أصلاحة ب 120 جنيه (100 قطعة غيار و 20 مصنعية)
السيارة قيادتها ممتعة جدا وناعمة جدا جدا وسلسة ولا تحس باى نتشات أو نقلات او صعوبة فى النقل لأنها مش على تروس ولكن على حاجة اسمها أطارات متغيرة القطر
تناسب عائلة صغيرة مكونة من 5 أفراد
اقتصادية فى البنزين وقويه فى المحرك
تجنب الأحتكاكات و الصدمات فى الأكصدامات بقدر الأمكان يعنى متخشش بصدرك قوى فى الزحمة لأنك هتزغل
اعمل حسابك فى كل صيانة كل 10 الاف كيلو فى حسبة 400-600 جنية حسب نوع الصيانة
تناسب السيدات و خاصة الصغيرات السن لانها سهلة القيادة و الباور بتاعها ناعم و سلس وسهل ولا يحتاج قوة
من يحتاج الى مواصفات أمان يشترى موديل 2006 - 1500 سى سى
السيارات الحديثة الشكل اللى موجود دلوقتى هو هو نفس مواصفات القديمة من ناحية الكفائة والعمر الطويل للأجزاء ضعف الاكصدامات ولكن مع مواصفات أعلى وشكل أحلى وأنا أرجحها لمن يقدر على دفع صياناتها ويستطيع الأرتباط بالتوكيل فقط ولو انى أفضل شرائها مستعمل كسر زيرو لأنى اشعر ان ثمن الزيرو مبالغ فيه الى حد ما
تمن المستعمل
2004 فابريكة او رشة اجزاء بسيطة من 55-60 الف جنيه حسب الحالة
2005 بالكاسيت ال سى دى 57- 62 حسب الحالة
2006 1500 سى سى تيب ترونيك (وليس ستيب ترونيك) 70-75 الف حسب الحالة
2009 الشكل الجديد حاير ومش مستقر عند سعر معين ولو انى اقدر سعرها لو الفئه الأولى اللى هيا 120 الف جنيه ممكن يبقى ب 85 -90 الف
والفئة التانية اللى ب 129 الف ممكن يبقى ب 90-95 الف حسب الحالة
وشكرا
م/طارق منصور

المشاركة الأصلية كتبت بواسطة semsem kane

تقرير ممتاز وموضوعى جدا اشكرك علية وبمناسبة الموضوع هاقول على تجربة ليا فى العربية دية

كانت من اربع سنين معروض عليا سيارة سيتى 1300 سى سى فول اوبشن موديل 2006 كانت ماشية بس 4000 كم وتمنها 52000 الف جنية والسيارة كسر زيرو فابريكة وكنت لسة ماجيبتش السيارة السيفيك ال sir

بس فعلا كتجربة قيادة السيارة دية فعلا لقيتها ناعمة جدا , عالية اوى عن الارض , مريحة فى المطبات , صوت المحرك يكاد لايكون مسموع , السيارة قطع غيارها غالية اة بس معمرة كعادة هوندا بس مش بكفاءة زى السيفيك

اللى معجبنيش فيها :( مش ثابتة خالص خصوصا بعد سرعة 110 , التسارع بطىء جدا بعد 100 لكن قبل كدة السيارة بتسحب حلو مع انى جايب السبورت مود , الرؤية الامامية مش مغطية الشارع بشكل كويس يعنى لو فية حد جاى من جنبك ممكن ماتشوفوش )

هية دية الاسباب اللى خليتنى ماشتريتهاش لان انا كان عندى الثبات والاداء فى المقام الاول عشان كدة العربية دية ارشحها بقوة كسيارة عائلية وبردة الموديل الاحدث بتاع 2007-2009 بالمحرك ال1500 المزود بالبادل شيفت الموجود خلف الطارة

وربنا يباركلك فيها ويحفظهالك بس اهتم بيها مش هتحس ان قطع غيارها غالية

مضبوط كلامك ولذلك هى مش بتعت شد وجرى فوق 120 كم/س لكن تحت كده ممتازه وعلشان كده انا بأحاول ارقى ل 1500 سى سى و لو حد معاه ال2006 التيب ترونيك وعاوز يبيعها يقولى وشكرا