شكرا ياباشا .. هى الحقيقة مشكلة معقدة ..المفروض ان لنا عقول نستعملها .. طيب اللى عقله خفيف او مالوش نعمله ايه ؟؟ مش بس فى الفتاوى الدينية .. يعنى كل شئون الحياه لو مفيش حد ادنى من القدرة على تعقل الاشياء حنبوظ الدنيا بسوء تصرفاتنا و اعمالنا ..الانسان بدون عقل بيحتاج يعتمد على حد يفكر له و ممكن ينقاد لواحد ديكتاتور او نصاب او مجنون يودوه فى داهيه سواء فى السياسة او الاقتصاد او الدين او شئون المجتمع .. الشعب الالمانى مثلا انقاد ورا هتلر و افكاره اللى خربت الدنيا و الامثله مالهاش حصر ..
اهم حاجة مناهج التعليم تتغير و بدل ما بتعتمد على الحفظ و التلقين بدون فهم تعلم الطلاب المناقشة و التحليل و اساليب التفكير فى معالجة اى مشكلة .. انا معنديش حل سحرى يخلى الواحد يعرف الفتوى الصح من الخطأ اذا ماكانش الانسان على درجة من العلم و الثقافة و الوعى ! ..انا شخصيا بأقرا كتير و باستخدم منهج الاستبعاد يعنى لو لم اجد منهج واضح و استخدام للمنطق و روح موضوعية و تحليل متناسق استبعد هذا الكاتب او المفكر او الشيخ صاحب الفتوى و عموما انفر لما الاقى واحد واضح عنده التحيز و الافكار المسبقة وغالبا تلاقى عنده لهجة عصبية او يستخدم السباب و الهجوم على شخص من يخالفونه فى الرأى .. اسقط هذا الرجل من دماغى و لا اضيع وقتى معه مرة اخرى ..
طبعا وقتنا محدود و لا نستطيع ان نقرأ كل التفاسير و الفتاوى و الاراء لكن احاول ان اختار من اتوسم فيهم فكر راجح و نزاهة .. و متفق معاك ان فى ناس معندهاش قدرة على القراءة و الفهم و التحليل ..الخ بل عندنا اصلا كام مليون امى و كام مليون يدوب بيعرف " يستقرى " .. طيب ايه العمل ؟؟
يا سلطان اقدر اقول لك حاجة واحده لا تعطى ثقتك الكاملة فى هذا الداعية او الشيخ او المفكر الدينى و تنساق وراءه بالكامل بدون تفكير لانه مهما كان انسان ممكن ان يخطأ او يصيب .. مفيش سبيل تانى غير انك تحاول تفكر برضه فى كلامه .. المهم مفيش مرجع دينى نهائى يمكن ان تثق فيه مائة فى المائة .. شوية حذر مطلوب قبل ما تسيب دقنك لحد ..
و اعتقد ان افضل حل لمشكلة فوضى الفتاوى الحالية ان لا يتم ترك الفتاوى للمجهودات الفردية بل يكون فى مجمع كبير للبحوث الدينية و الفتوى واعرف ان هناك لجنة للفتاوى بالازهر الشريف لكن ما اتمناه ان يختلف تشكيل هذا المجمع الجديد الذى يجب ان يضم بالاضافة الى رجال الدين بعض الشخصيات العامة المعروفة فى تخصصات مختلفة و معرفون بالاستقامة و الحكمة و يجب ان يعاد فتح باب الاجتهاد و ان يعاد النظر فى منهج التعليم الدينى بالازهر الشريف و ان تعرض الموضوعات التى يختلف عليها الناس بدلا من الحيرة بين ده و ده و دوكها و دوكهم ! ..
اعتقد لو هناك فتوى صادرة عن هيئة مستقلة عن الحكومة و تضم شخصيات محترمة و مشهود لها بالنزاهة و الاخلاص و الاستنارة و تصدر عنهم فتوى جماعية و بناء على دراسة متعمقة تتناول كل ما يتعلق بالموضوع .. اعتقد ده احسن حل خاصة للعامة من الناس بدلا من التأثر بهذا الشيخ او الداعية لاسباب غير موضوعية مثلا لشهرته او جاذبيته فى الحديث او تأثرا بكلام مرسل يقال عنه .. الناس محتاجة لجهة افتاء تثق فيها .. و لو اخطئت هذه اللجنة فى الفتوى فالوزر يقع عليها لو اتبعها بسطاء الناس غير القادرين على التبحر فى الدين بأنفسهم او تحليل ما يسمعونه او يقرأوه .
لكن متى يتم تشكليل مثل هذه اللجنة القومية المحترمة والمستقلة عن الحكومة و عن اى جهات ضغط لاى جماعة او حزب و غيرها ؟؟ .. قول يا باسط ! :)
--------------------------
على فكره السلاطين على مر التاريخ كان لكل واحد فيهم مفتى خاص يعطيهم الفتوى السلطانية المتينة .. انت اول سلطان تتنازل عن حقك ! ( تفتكر الشيخ فى فيلم الزوجة التانية - الممثل الرائع حسن البارودى رحمه الله و هو بيطلق الست من جوزها بالاكراه عشان العمدة يتجوزها و يقول للراجل الغلبان : و اطيعو الله و رسوله و اولى الامر منكم ! )