المشاركة الأصلية كتبت بواسطة zalpany2000
هو بس انا حابب اوضح انها كانت خناقة اه بس مش عادية... ولاول مرة نشوف سلاح ابيض في ساحة الكلية عندنا ... واللي تصدي للعيال البلطجية دول الولاد بتوع الجوالة والاتحاد من جوه الجامعة ...
متهيالي كدة وضحت لرالي ان كانت خناقة وكان فيه مطاوي والصيع بتوع بين السرايات دخلوا ورفعوا مطاوي فعلا
واصابوا طالب
عاوز بس اقول ان حرس الجامعة كان دورهم لا يتجاوز اطلاقا تأمين بوابات الجامعة ... وتأمين المدرجات ... ومرة ولا اتنبن لاقيتهم بيتكلموا مع العيال بتوع المكتبات بتاعة بين السرايات ... لما كانت بتحصل خناقة .... ماكانوش بيتدخلوا ...
فعلا كلام حضرتك سليم لكن في نفس الوقت كانوا بيبقوا عارفين الطلبة اللبطجية وكان في اوقات كتير جدا بيتعمل لهم فصل لهم حد منهم بيمسكوه وهو معاه سلاح او حشيش او او - اما موضوع بتوع المكتبات فاحب اقولك انهم كان فيه بيزنس بينهم وبين بعض الحرس وكانوا بيدخلوا ويعملوا الدعاية بموافقتهم
انا غير رافض لوجود حرس من الشرطة للتأمين ... بس انا اكتر من مرة اتخانق علي البوابة الرئيسية وانا داخل نظرا لاسلوب الامن اللي علي البوابة ... خصوصا لو داخل بعربية غير عربيتي وبادج الجامعة مش عليها ... بس لما كانوا بيعرفوا ان اللي داخل هيئة تدريس كان الوضع بيختلف ... بس موضوع التاكسي اللي حضرتك بتقول عليه ده عمرة ما حصل معايا ... ودخلت كتير بتاكسي الكلية ... اوقات كان بيسيب رخصته علي الباب واوقات لأ...
ومتهيالي حضرتك مش معترض على التصرفات دي انهم يتاكدوا ان العربية عليها بادج او ان اللي داخل بعربيته عضو تدريس والا لو تم السماح للكل بالدخول هاتبقي الجامعة جراج كبير ونتفرج على خناقات بين الطلبة والدكاترة على الركنة وطلبة تخرب لك عربيتك زي ما كان فيه هنا في المنتدي طالب خرب عربية دكتور واتنين تانيين دخلوا قالوا انهم عملوا نفس الموضوع وشجعوه كمان
وموضوع دخول التاكسي انا شفت طلبة معاقين داخلين بالتاكسي لغاية ابواب الكليات والحرس اكيد هو اللى كان بيسمح بدخولها و ده طبيعي يعني لو واحد من الحرس بلطج الاغلبية كانت بتتعامل بالعقل
لو جينا بقي للجد ... مافيش ميثاق يحكم الامن داخل الجامعة ولا فيه قائمة ممنوعات مثلا .... ولا حتي فيه توعية للطلاب بايه الممنوع وايه السليم ... الدنيا سبهلله ومافيش شئ واضح .... يتعمل قرار من مجلس الجامعة بايه الممنوع علي الطلاب ... ويلتزم بيه الطلاب ... ومش محتاجين حتي امن ... ممكن يبقي حتي العقاب اداري لو الطالب تجاوز وخرق العرف الجامعي ده ... ويبقي العقاب امني او جنائي لو الطالب ارتكب مخالفة من النوع ده ...
اللي عايز اقولو ان المفروض انه اسمه حرم جامعي .. وحرم دي ليها شقين ... انه يحرر الرأي داخل الجامعة ويحرم التدخل في توجيه الرأي او توجيه القرار وان الحرم ليه قدسيته من قدسية العلم ... ودي من اهم الحاجات اللي بتدي للجامعة هيبتها واللي للأسف تم اختراقها علي مر السنين من اول تدخل أمن الدولة في التعيينات و الترقيات والوظائف الادارية .. وأحيانا في نتائج طلاب (وانا واثق من كلامي)
اما الوجه الآخر للعملة هو انه حرم بمعني انه له من الاعراف والتقاليد والقواعد المتماشية مع هدفه ودوره... ودي اللي مافيش حد عارفها .. من اول الطالب لحد الاساتذة نفسهم ... لازم يبقي فيه ميثاق زي دستور للجامعة علشان الناس تفهم ايه اللي ليها و عليها .... قبل ما نلوم علي الطلاب لازم نلوم نفسنا اننا مافهمناهمش الصح من الغلط و المباح من الممنوع
اسف للاطالة
تحياتي