اقتباس المشاركة الأصلية كتبت بواسطة ralliart مشاهدة المشاركة
يا دكتور اوعى تكون صدقت حوار ال30 بلطجي ده !!! ده تهويل اعلامي
الموضوع كان خناقة عادية زي اللي كانت بتحصل ايام الشرطة ومكانش هيكون في اي تصرف هيختلف لو كانت الشرطة موجودة ،هو حضرتك مشفتش خناقات في الجامعة قبل كدة؟
والامن من ساعة الموضوع ده أؤكدلك ان مفيش بني آدم بيخش الجامعة من غير ما يشوفو الكارنيه على عكس زمان كان بيفوت 10 ويشوف واحد
وبالنسبة للمخدرات والاسلحة فانا طالب وعارف كويس اللي بيحصل واللي كان بيحصل
المخدرات طول عمرها موجودة والمطاوي وكانت بتطلع في الخناقات
وعمال الكافتريات فيهم ناس شغالة في المخدرات وحاجات تانية وبيبقو معروفين للظباط ومحدش كان بيقبض عليهم
الموضوع متغيرش الطالب الحشاش لسة حشاش والطالب المحترم لسة محترم

ممكن الموضوع يتحل بوجود نقطة شرطة في الجزيرة اللي في النص بين الجامعة وهندسة (اللي كان بيقف فيها الأمن المركزي) لكن لو قربو اكتر من كدة هيبقى فيها مشاكل وده اللي بيحصل في دول كتير ان الجامعة بيكون ليها حرس ملهوش علاقة بالداخلية وبيكون فيه مجرد دورية شرطة قريبة
على الأقل لحد ما ينتهي زمن الكوسة ويعرفو شغلهم صح
مش قادر اقول لحضرتك مدى حرقة الدم لما تلاقي العلماء يدخلو الجامعة مشي لانهم جايين بتاكسي وتلاقي واحد راكب عربية متفيمه اسود في اسود وحاطط باريه عالتابلوه وشايل النمر داخل يضرب سرينة في الحرم الجامعي علشان ابوه ظابط
هو بس انا حابب اوضح انها كانت خناقة اه بس مش عادية... ولاول مرة نشوف سلاح ابيض في ساحة الكلية عندنا ... واللي تصدي للعيال البلطجية دول الولاد بتوع الجوالة والاتحاد من جوه الجامعة ... عاوز بس اقول ان حرس الجامعة كان دورهم لا يتجاوز اطلاقا تأمين بوابات الجامعة ... وتأمين المدرجات ... ومرة ولا اتنبن لاقيتهم بيتكلموا مع العيال بتوع المكتبات بتاعة بين السرايات ... لما كانت بتحصل خناقة .... ماكانوش بيتدخلوا ... انا غير رافض لوجود حرس من الشرطة للتأمين ... بس انا اكتر من مرة اتخانق علي البوابة الرئيسية وانا داخل نظرا لاسلوب الامن اللي علي البوابة ... خصوصا لو داخل بعربية غير عربيتي وبادج الجامعة مش عليها ... بس لما كانوا بيعرفوا ان اللي داخل هيئة تدريس كان الوضع بيختلف ... بس موضوع التاكسي اللي حضرتك بتقول عليه ده عمرة ما حصل معايا ... ودخلت كتير بتاكسي الكلية ... اوقات كان بيسيب رخصته علي الباب واوقات لأ...

لو جينا بقي للجد ... مافيش ميثاق يحكم الامن داخل الجامعة ولا فيه قائمة ممنوعات مثلا .... ولا حتي فيه توعية للطلاب بايه الممنوع وايه السليم ... الدنيا سبهللة ومافيش شئ واضح .... يتعمل قرار من مجلس الجامعة بايه الممنوع علي الطلاب ... ويلتزم بيه الطلاب ... ومش محتاجين حتي امن ... ممكن يبقي حتي العقاب اداري لو الطالب تجاوز وخرق العرف الجامعي ده ... ويبقي العقاب امني او جنائي لو الطالب ارتكب مخالفة من النوع ده ...

اللي عايز اقولو ان المفروض انه اسمه حرم جامعي .. وحرم دي ليها شقين ... انه يحرر الرأي داخل الجامعة ويحرم التدخل في توجيه الرأي او توجيه القرار وان الحرم ليه قدسيته من قدسية العلم ... ودي من اهم الحاجات اللي بتدي للجامعة هيبتها واللي للأسف تم اختراقها علي مر السنين من اول تدخل أمن الدولة في التعيينات و الترقيات والوظائف الادارية .. وأحيانا في نتائج طلاب (وانا واثق من كلامي)

اما الوجه الآخر للعملة هو انه حرم بمعني انه له من الاعراف والتقاليد والقواعد المتماشية مع هدفه ودوره... ودي اللي مافيش حد عارفها .. من اول الطالب لحد الاساتذة نفسهم ... لازم يبقي فيه ميثاق زي دستور للجامعة علشان الناس تفهم ايه اللي ليها و عليها .... قبل ما نلوم علي الطلاب لازم نلوم نفسنا اننا مافهمناهمش الصح من الغلط و المباح من الممنوع

اسف للاطالة
تحياتي