الموضوع: نقطة ضعف فى تركيب انذار للوجان

السلام عليكم
اكتشفت امبارح بالصدفه نقطة ضعف خطيره فى تركيب الانذارللعربيه اللوجان
مش عارف اقول علبها دلوقتى ولا نبعتها لبعض فى رسايل خاصه لانى بصراحه خايف لايكون حد من حرامية السيارات بيتابع المنتدى وبيعرف نقط الضعف اللى موجوده فى العربيات ويقدر يسرق مافيها
نقطة الضعف دية حتخلى الحرامى يقدر يدخل العربيه من غير ان الانذار يرن بس الحمد لله لاقيتلها حل

يااخوانا الحراميه دول فيهم ناس خريجى جامعات زينا بالظبط يعنى مش كلهم جهله ومحدش يستبعد انهم يكونوا فعلا بيتابعوا المنتدى والمنتديات الاخرى

عموما الموضوع هو ان اولا انا عربيتى هاف اوبش ومش عارف اذا كان الفول اوبشن مفيهاش العيب ده ولا لا

سهل جدا ان اى حرامى يفتح باب العربيه وكلنا بنسمع كل يوم عن عربيات جديده بتتسرق يبقى الموضوع مش صعب ولا حاجه وكنا بنقول الانذار اذاى مابيشتغلشى
بجرب امبارح حاجه لاقيت انى لو فتحت اللوك بتاع باب السواق بالمفتاح وشديته لبره طبعا الانذار بيشتغل وكده عادى
لكن اللى مش عادى انى لو عملت نفس الموضوع من فتح السنترلوك من باب السواق بس مشديتش الباب بمجرد فتح السنتر حتلاقى الاربع بيبان والشنطه طبعا فتحوا حنيجى بقى نفتح الباب الخلفى حنلاقيه فتح عادى من غير ما الانذار يشتغل وممكن نفتح الباب وتقفله 100 مره ولا الانذار حيشتغل وانا هنا بتكلم على الباب الخلفى فقط وليس الامامى وسبب المشكله هى ان البابين الخلفيين مفيهمشى زرار النور اللى بيشغل نور الصالون بمجرد فتح باب العربيه وطبعا انا بتكلم عن الهاف اوبشن اللى معايا والانذار على كلام الكهربائى بياخد الارضى من نور الصالون
طبعا انا مركبه من اكتر من خمس شهور ومكنتش عارف الموضوع ده والكهربائى برده كان المفروض ياخد باله منه لكن بقى اهمال الصنايعيه مشكله
حل المشكله واحد من الاتنين
ياما تروح التوكيل زى ما الكهربائى قالى وتشترى من هناك 2زرار نور وطبعا التوكيل ممكن يقولى تمنهم 1000 جنيه واستنى لما يجوا من فرنسا بس طبعا ده الحل الفضل والاسلم ( ياريت حد يسال على اسعارهم لو راح هناك )
ياما الحل اللى انا عملته وانا اللى فكرتله فيه انه فك فرش باب السواق وفصل السنتر منه بحيث لو حد فتح باب السواق مايقدرشى يفتح السنترلوك بتاع العربيه كله حيفتح بس الباب فقط ويضطر ساعتها يفتحه والانذارطبعا حيشتغل اما باقى البيبان حتفضل مقفوله
اخيرا خلو الكهربائى يوصل فرده من الانذار لشنطة العربيه زى ماعملت امبارح بحيث تخلى الانذار يضرب مع فتح الشنطه
طبعا موضوع لغى السنتر ده فيه قطع فى سلوك الكهرباء اللى فى الباب علشان تبقوا عارفين يعنى اللى عاوز يعمله هو حر واللى مش عاوز يشترى زرارين نور من التوكيل او لو لاقى بديل بتوع اى عربيه يركبه عليها ياريت يعرفنا بيهم لانه ده افضل حل

طبعا بعد كل ده لو فتحت السنتر من الريموت حيفتح ويقفل العربيه كلها عادى من غير مشكله وكمان لو فتحت او قفلت من الزرا اللى فى نص الطابلوه بتاع اللوك حيشتغل عادى من غير مشكله

اخيرا يادكتوراحمد انا مش عيل صغير عاوز اضرب بمبه فى الهوا وامشى علشان تقولى حنبلغ الاداره تحذف الموضوع
عموما نمرتى 0183449294