اعزرونى لانى اتأخرت شوية انتم عارفين ظروف الثورة وكمان انا استهلاكى فى العربية قليل جدا ... هو مشوار الشغل وبس
خلينا فى المهم ...
انا كنت فى مركز الصيانة فى القطامية يوم السبت اللى فات .. وده طبعا بعد مكالمة للانسة داليا واللى كان كلامها معايا بكل زوق واحترام ... فانا بشكرها جدا ..
روحت المركز حسب الميعاد اللى اتحدد معاها وكان الساعة 11 ... كان فية اثنين بيعملوا اوردر الشغل ... وكان كل طلباتى او مشاكلى فى العربية هى العضة اللى فى الفتيس ... وكلمتو عليها فقالى ربنا يسهل ونشوفهالك .. واتفقت معاه على ان الزيت موبيل ويكون 5000 كم ...
بعد نص ساعة تقريبا الفنى اخد العربية وكلمتو على عضة الفتيس ... وسألتو اية رأيك ... قالى والله هو التروس علشان لسة جديدة ... ومع الاستخدام ها تنعم وتبقى كويسة ... واخد حبيبة قلبى ودخل بيها المركز .. وانا طلعت الدور الثانى فى الاستراحة ... وطلبت شاى وانا بتفرج على الشغل بكل وضوح ( ودى ميزة عجبتنى ) ... المهم ... غيرو الزيت .. وفلتر الزيت .. وربطو العفشة ...
وخلصت الشغلانة دى تقريبا فى ساعة اللى ربع ... وبعد كدة حبيبة قلبى اخدها مهندس والفنى اللى اشتغل فيها ... وخرجو وجربوها علشان لو فية اى حاجة تانية ... ووسألت المهندس بعد التجربة .. اية الاخبار ؟؟؟ قالى العربية كويسة ومافيهاش حاجة ..
روحت دفعت الفيزيتا ... وكانت كالتالى :
الزيت 113.00 جم
فلتر 20.00 جم
ضريبة 13.30 جم
الاجمالى 146.3 جم ..... بس
قبل ما انسى ... جركن الزيت اتبقى منة لتر .. تقريبا ... كانو حاطينة فى شنطة العربية ...
طبعا انا اخدت العربية ... وكان الفرق واضح فى تغيير الزيت وتربيط العفشة ... العربية زادت نعومتها على الطريق .. وكمان زاد سحبها بشكل يخوف ( عايزة تجرى )
انا بشكر شركة الامل اللى واضح انها بتحاول جاهده جدا فى انها ترتقى بمسئوليها وفنييها من اجل تقديم خدمة ممتازة لعملائها ..وكمان بشكر الانسة داليا على زوقها واحترامها *
لاكن اتصدمت لما سألت على فانوسين الشبورة فى المخزن ... وعرفت ان سعرهم 170 جم بدون التركيب طبعا ... وكان سعرهم فى التوفيقية .. فى المحل اللى فى المول 80 جم فقط ( كاملين بلمباتهم )
وعلى فكرة ركبت سماعتين وفعلا كان سلكهم واصل للرف اللى خلف الكنبة زى ماكانو بيقولو ... وركبتهم انا وصديق لية امام البيت ... ماكنش فاضل غير اننا نحفر مكانهم فى الرف ... وتم بحمد الله
سألت ميكانيكى عن عضة الفتيس ... قالى سخن العربية كويس الصبح ( انا ماكنتش بعمل كدة ) علشان دورة الزيت للفتيس ... ولما عملت كدة ... العضة اختفت بنسبة 50 % ...
انا اسف للاطالة واسف للتأخير ,, واتمنى اكون افدتكم ...