بترجع حسب الاستخدام بس تقريبا المتوسط بتاعة 25000 زى ماقال احمد
افضل نوع الية راكب فى العربية
السلام عليكم- ازيك يا استاذ احمد اتمنى ان تكون بخير اية رايك اعمل صيانة الالف فى ابو رواش ولا قليوب (انا ساكن فى مدينة نصر) و كنت عايز اسئلك على الديفندر الامامى انا جبت اللى مغطى فوانيس الشبورة اللى تحت بس ساعات و انا ماشى يحك فى المطبات الصناعية تفتكر ممكن يكون راكب غلط
الحمد لله يا أستاذ أشرف و شكرا علي سؤالك .. أنا كمان ساكن في مدينة نصر و بافضل أعمل صياناتي كلها في أبو رواش , لكن بما انها صيانة الألف ممكن تعملها في قليوب مفيش مشكله اللا لو كان عندك ملاحظات تقيله يبقي الأفضل أبو رواش .
أنا كان عندي الديفيندر الأمامي و كان برده بيحك في المطبات ...
أنا مش عايز أسد نفسك لكن مهندس متخصص في غبور أكد لي انه خطر علي الشاسيه في حالة الحوادث التقيله لا قدر الله ...
بس هو مش راكب غلط لان في أنواع منه بتحك في المطبات زي اللي أنا كنت مركبه و زي اللي عندك أكيد .
تحياتي لك .
السلام عليكم ورحمة الله وبركاته جميعاً
إشتريت ماتركس كورى تسليم 3/2007 أوتوماتيك من يومين. حاسس بعدم اتزان بالمقارنه بهوندا 89كانت معايا. يا جماعه هل دا طبيعى؟
ايه أهم حاجه أبدأ بيها مع العربيه وايه أهم الإحتياطات اللى لازم أخد بالى منها.
و أنا متشكر يا جماعه لأى إفاده مقدماً
أخوكم خالد
ألف مبورك يا أستاذ خالد و ربنا يملاها بركه ان شاء الله ...
بالنسبه للثبات و الاتزان هي مسأله نسبيه .. يعني يمكن الهوندا اللي كانت مع حضرتك أثبت منها , عشان كده مانقدرش نحكم ان كان العربيه عندك طبيعيه وللا فيها مشكله , بس بشكل عام الماتريكس تعتبر من العربيات التقيله جدا و الثابته ولا يعيب ثباتها اللا حاجتين بس , هو انك ماتخدش الملفات علي سرعه عاليه أوي , و الهواء الشديد أحيانا بيأثر علي ثباتها عشان ارتفاعها طبعا , لكن بشكل عام هي عربيه ثابته مقارنة بعربيات تانيه في نفس الفئه .
الماتريكس عربيه عمليه جدا و بتحتاج لعنايه بسيطه و لكن في نفس الوقت عند تجاهل هذه العنايه البسيطه ممكن تنتج حاجات كتير مش كويسه ,
يعني خللي بالك من الملفات عشان ارتفاع العربيه , خللي بالك من انك تزود بنزين في الملفات بالتحديد عشان الكبالن لان العربيه تقيله جدا و عاليه و ده بيعمل عزم علي الكبالن و بيولد قوه عكس اتجاه الدوران بتبقي كبيره أوي نظرا لارتفاع العربيه , فخللي بالك من الكبالن بتاعتها ,
ربط عفشه و اضبط زوايا كل 5000 كيلو ...
بعد كده كل حاجه طبيعيه زي أي عربيه , يعني تاخد بالك من تيل الفرامل و ماتستناش لحد ما يسفر , و تغير الفلاتر و السيور و البوجيهات في معادها , خليك حنين علي البنزين و اديها بالراحه علي أد ما تقدر لان الموضوع ده هايفرق معاك جدا في استهلاك البنزين لدرجه لا تتخيلها ,
بالراحه علي المطبات عشان علبة الدريكسيون لانها ب 5000 جنيه و شويه ....
و علي العموم أنا معايا ماتريكس عامله 76000 كيلو و الحمد لله ماغيرتش فيها حاجه اللا شويه الفلاتر و السيور و البوجيهات و تيل الفرامل ... العربيه بقالها 3 سنين معايا و الحمد لله زي الفل , فا ماتقلقش من حاجه يعني علبة الدريكسيون دي بتعيش بعمر العربيه بس بالراحه علي المطبات , بس أنا حبيت أقول لك مش أكتر فا ماتقلقش من حاجه ..
أي استفسار تاني أنا تحت أمرك ..
ربنا يكرمك يا أستاذ أحمد
شكراً على الإهتمام
باذن الله حجزت ورايح صيانة 30000 الف يوم الجمعة فى ابو رواش حد عاوز حاجة من هناك
تروح و تيجي بالسلامه يا بسام و عقبال ال 300000 ان شاء الله .
أستاذ أحمد ممكن أتصل بيك ....؟؟ ولو ممكن يا ريت تقول لي المعاد المناسب ليك
السلام عليكم معلش يا استاذ احمد احنا كلنا وجعين دماغك باسئلة كتيرة ، انا خلاص حجزت الصيانة الاف يوم 3/6 بس كنت عايز اسئلك على موضوع الفتيس تانى وكمان السحب بتاع العربية اصل انا بقارنها بالعربية اللى كانت معايا هيونداى اكسل 1997 كان تجميعها فى السحب سريع و صوت ماتورها ناعم
معلش انا يمكن موسوس شوية بس الفتيس اتقل بكتر و كمان العربية مش بتجمع فى السحب بسرعة و صوت الماتور مش ناهم زى التانية تفتكر ان بيتهايالى و اخليهم يكشفوا على الفتيس فى صيانة الاف
والله أنا ماعرفش نظم فتيس الاكسيل ايه , بس فيتيسالماتريس يعتبر ناعم في كل الغيارات ماعدا المارشير ده عن عمد ... بس لو هاتقارن فتيس المتريكس الالنترا الشك القديم أو الفيرنا أو اجيتز هاتلقيه أتقل شيه نظرا لوضعة افتيس اللي أكبرت المصنع انه يعمله متدد الوصلات ...
لكن مفيش أي مانع من انك تقول لهم هناك علي الفتيس و لو في حاجه والله هما مش بيتأخروا ... بالنسبه لنعومة صوت الموتور فا طبيعي ان الاكسيل تكون شويه أنعم لسببين ... ان موتور الاكسيل في الواقع موتور ميتسوبيشي يعني ياباني و أكيد الياباني أنعم شويه من الكوري ... لكن بعد تغيير الزيت اصوت هاينعم معاك أوي ان زيت التليين اللي بيبقي في العربيه قبل الألف بيبقي زيت خفيف أوي ...
بالنسبه للسحب فا مش منطقي ان الاكسيل بتسحب أحسن .. ممكن الحكايه تكون عشان علي ما الموتور يلين مش أكتر ... بس برده خليهم يحطوا العربيه علي الهاي سكان يمكن في غلط في نسبة الهواء و البنزين في الكنترول يونيت ... بس ان شاء الله مفيش حاجه ...
و تروح و تيجي بالسلامه ان شاء الله ... تحياتي لك .
اخوانى الاعزاء انا جبت ماتريكس وعايز اعرف منكو شويه حجات
فى عداد بتاع الكيلو مترات فى ارقم تانيه بيعرضه لما ادوس على زرار التريب دى اية
وكمان العبيه بحس انها سوخنه من اقل مشوار لما احط ايدى على الكبوت
ومفاتيح العربيه واحد بيفتح الشنطة والتانى لا
ياريت حد يدلنى
ربنا يخليك ياحمد
الف مبروك abozeedn
دة trip واحد واتنين ودة مخصوص لو تحب تحسب مسافة مثلا طريق اسكندرية فابتظبطة على trip الاول وبعدين تدوس على الزرار شوية هايسفر العداد وتبدى تحسب المسافة الية انت عاوزها
وبرضوا trip الثانى وهما بيعدوا لحد 999 وبعيد تماما عن العداد الاساسى الية الواحد ماينفعش يلعب فية
بالنسبة لسخونة الكابوت دة عادى موجودة فى كل الماتريكس وكمان عشان الجو سخن شوية
بالنبة للمفاتيح ممكن تراجع التوكيل لان المفتاح يفتحالابواب الامامية والشنطة
علي ايه مفيش أي حاجه كلنا اخوات .. و ربنا يوفقك في الصيانه
تحياتي لك
انا عندى سؤال هو الواحد لما يكون حاطط للعربية زيت شل الى بيقعد 10000 لما يجى ينزلة بيكون نقص حوالى 2 ملى ولا مبينقصشى خالص اصل انا عندى كان معدى علامة ال f بحوالى ملى ودلوقتى نقص ملى كدة دة عادى ولا فية مشكلة وبعدين لونة بحس انة مدى على احمر
تغير لون زيت شل ألترا دا ظاهره صحيه .. لانه في مركب اسمه Active cleansing agent و ده مركب مسأول عن امتصاص جميع الشوائب من المحرك فا طبعا بيغير لونه ....
انت بتقول ان مستوي الزيت في الأول كان فوق علامة F يبقي كان زياده و اللي حصل ده مجرد تبخير طبيعي للزيت الزياده ليس اللا ...
ماتقلقش عربيتك لسه عذراء !!
تحياتي لك أخي الكريم .
أنا شفت أكصدام للماتريكس جامد أوى و نادر .... حد عندة معلومات عنة ؟ (الصورة مرفقة)
حد عندة فكرة عن الفوج لايت بتاع الماتريكس ... ممكن نزود قوتة شوية ؟؟؟؟ لأن النور الواطي اشد من اللازم والنور العالي شديد جداً ....
علشان كدة عاوز أزود قوة الفوج لايت لأنة بنور مسافه صغيرة جداً حوالي 2 متر أمام العربية وحاسس أنة ضعيف شوية
أخي الكريم أول أهلا بيك في منتدان الغالي ..
أحب أوضح فكره غايبه عن ناس كتير هنا ... وهو ايه الغرض الأساسي من الفوج لايت ؟
الفوج لايت مش معمول عشان أنوره و أمشي بيه بالليل و أشوف بيه ...
ده معمول عشان العربيات التانيه تشفني ساعة الشبوره ..
يعني بنوره عشان أتشاف مش العكس ..
فا أعقد انك لما بتنوره بيكون من بره مبهر و قوي لكن مش بيكشفلك انت الطريق لان دي مش وظيفته الأساسيه ..
تحياتي لك أخي الكريم .
شكراً أخوتى الأعزاء على الموضوع المفيد
الصراحة جاوب على كل استفساراتى عن العربية
والنصائح فيه فادتنى أوى فى التعامل معاها
فاضل بس موضوع واحد هو إستهلاك البنزين
لأنى فعلا حسيت إنه عالى أوى معايا رغم وخصوصا لما بشغل التكييف وقت الظهر
رغم إن الكل قالى إن طبيعى العربية 1.6 يكون استهلاكها للبنزين عالى
وقررت إنى أحسبه فعلاً
بس عاوزة أعرف لما أحسبه أشغل التكييف عادى ولا يكون حساب مسافة الكيلو مترات بس
لأنى فعلاً لما بشغل التكييف بلاقى استهلاك البنزين زاد بصورة ملحوظة جداً
رغم إن المسافة مبتكونش طويلة
الأخت الكريمة أهلا بيكي في منتدانا الغالي ...
الماتريكس بصفه عامه استهلاكها في البنزين عالي نسبيا عن أي عربيه 1600 تانيه لان وزنها تقيل جدا ...
أكيد التكييف بيأثر و لكن تأثيره الي حد ما محدود ...
خلينا نقول ازاي نتأكد الاستهلاك طبيعي وللا فيه مشكله ...
حضرتك ممكن تفولي العربيه و تصفري عداد التريب و تشوفي البنزين هايعمل كام كيلو لحد ما المؤشر يجي في النص ( نص التنك ) ,
لو كان 250 كيلو أو أقل حاجه بسيطه أو أكتر حاجه بسيطه يبقي الاستهلاك طبيعي جدا في ظروف السواقه العاديه و الزحمه ... لو أنا دلعت العربيه و مشيتها بالراحه و عملت كنترول علي قدمي اليمني الموضوع هايفرق كتير و ممكن نص التنك يوصل لحد 300 كيلو جوه البلد و أحيانا أكتر ( دي عن تجربه ) .. لو علي طريق سفر و سرعتك 90 مثلا الاستهلاك هايتحسن خالص و ممكن نص التنك يوصل معاكي 400 أو أقل حاجه بسيطه ( عن تجربه برده )
لو كان النسب دي عندك مش كده , يبقي في مشكله في الكنترول يونيت أو أحد الحساسات و ساعتها لازم نحط العربيه علي الهاي سكان في التوكيل ..
تحياتي لكي أختي الكريمة
لازم تعملى حساب ان عربيتك اوتوماتك واستهلاك الاوتوماتيك بيكون اعلى شوية من المانويل
ممكن سؤال
سعة تنك الماتركس أد إيه؟
وسؤال كمان أحسب على Trip A ولا Trip B؟
وإيه الفرق بينهم ولا مفيش فرق؟
معلش أخواتى وبتقل عليكم
سعة تنك الماتريكس 55 لتر و مافيش فرق بين trip a or b
زى ماقال مصطفى التنك السعة بتاعتة 50 لتر +5لتر الاحتياطى =55
ومافيش فرق بين trip a ,trip b الاتنين بيحاسبوا المسافة ويمكن يتصفروا
اسعار قطع الغيار الية اتغيرت فى صيانة 30000 الف
1- فلتر هواء =55
2- فلتر بنزين = 115
3- بوجيهات هيونداى =14 سعر الواحد 14* 4 = 56
والمعاملة كانت كويسة جدا عكس الية منتشر فى المنتدى الفترة دية بس العيب الوحيد انهم بيتاخروا اوى
السلام عليكم أخ أحمد
لك جزيل الشكر. هذه إجابه لسؤال كنت سأطرحه على سعادتك. أنا جريت على المحطه بمجرد رؤية اللمبه.
احمد انا ظبطت زوايا فى التوكيل والراجل ظبط قدام وى وراء هى العربية فيها جلب وراء
السلام عليكم جميعا
دى اول مشاركة لية فى الموضوع دةو انا عندى استفسارين
الاول انا رحت التوكيل عشان اظبط زوايا و بعد ما استلمت العربية كانت زو ماهي بتحدف يمين هل ممكن تكون العربية ماتظبطتيش كويس؟؟؟؟؟؟
ثانيا بعد التليين (2000 كلم) حاسس ان العربية تقيلة و مش بتسحب كويس عكس قبل التليين خصوصا فى المطالع يعنى التجميع مش سريع فهل انا بدوس جامد على البنزين عشان كدة مش بتسحبز لانى حاولت اجرب موضوع من صفر لمائة بس حسيت ان الموتور مكتوم ز ياريت حد يفيدنى و شكرا ليكوا
أخي الكريم أهلا بيك .. أكيد الزوايا مش مضبوطه كويس و كنت رجعتلهم تاني بس دي نادرا ما بتحصل عندهم انهم مايضبطوهاش كويس ..
بالنسبه لموضوع ان الموتور مكتوم ..
طبيعي ان العربيه تسحب أحسن بعد التليين مش العكس
أول حاجه ممكن تكون جودة البنزين مش كويسه , و أقصد الجوده مش العدد الأوكتيني , لان العدد الأوكتيني احنا متفقين عليه مش أقل من 92 , أقصد الجوده لان مش ال 92 زي بعضه في أي حته , المركبات بتختلف .. فا التعاون و مصر للبترول مش هايبقوا زي شل و امارات مصر و توتال ... حضرتك اتعامل مع شل و امارات مصر و توتال البنزين بتاعهم مركباته بتدي جودة احتراق أفضل من مصر للبترول و التعاون ..
لو حضرتك بتستخدم بنزين بجوده كويسه يبقي هانبتدي نفكر في الحساسات و الكنترول يونيت , هل استهلاك البنزين عالي ؟ هل بتشم ريحة عادم مش حلوه ؟ مكن يكون حساس من الحساسات عايز يتنضف بس و في الحاله دي الهاي سكان هايجيب من الأخر ...
السبب التالت هي الفلاتر و البوجيهات بس حضرتك عامل 3000 كيلو فالكلام ده مستبعد ...
تحياتي لك .
معلش يا استاذ احمد كالعادة واجع دماغك انا كملت الالف كيلو امبارح و قلت اجرب التكييف و لما شغلتوا على السرعة 3 مكنش عامل تاثير و زودة الى 4 بس حاسس انه مش بيسقع كويس تفتكر اخليهم يبصوا علية فى الصيانة انا رايح يوم الثلاثاء
كمان فية سوال الزجاج الكهرباء اللى جنب السواق مش المفروض يفتح بالكامل من دوسه واحده ولا لا .....معلش طولت عليك
شكرا جدا ليك :)
ممكن لو حد جرب وكيل الصيانة المعتمد فى المعادى يقولى اية الاخبار و كويس ولا لاء
يا باشا ولا يهمك كلنا اخوات ...
بالنسبه للتكيف لو الهوا مش بيطلع ساقع ممكن تقول لهم في الصيانه و هما يكشفولك علي الفريون ممكن يكون ناقص ... هو المفروض ان سعة تكيف الماتريكس للفريون 570 جرام لكن لو زودنا الفريون شويه و خليناه 610 جرام كحد أقصي هايدي فرق جامد في التكيف بس هاياثر تأثير محدود علي السحب , فالو ليك كلام مع فني التكيف أو المهندس اللي هايستقبلك أو تقدر تدخل ليهم جوه يا ريت تخليهم يضبطوه علي 610 جرام أحسن في الجو الحر اللي احنا فيه ده ...
بس فيه نصائح يفضل انك تعملها قبل ماتشغل التكيف عشان يدي معاك أعلي كفاءه ... يعني أول لما تفتح العربيه و تتدورها افتح الشبابيك الأول و امشي بيها و خللي الهوا السخن اللي جوه العربيه يطلع و بعدين شغل التكيف و سيب الشبابيك مفتوحه شويه لحد ما تحس ان الهوا اللي طالع من فتحات التكيف ساقع ساعتها ممكن تقفل الشبابيك , ماتتخيلش الموضوع ده ممكن يفرق معاك أد ايه ...
و علي العموم خليهم برده يبصولك علي الفريون لانها لو مانفعتش مش هاتضر يمكن تطلع فيها نقص برده وللا حاجه ...
تحياتي لك .