الموضوع: مطلوب معلومات عن ماركات فيلتر هواء وفيلتر زيت

بعد ما خلصت الإمتحانات و فوقت شوية للعربية قولت أبدأ عملية الصيانة الدورية و كانت تفاصيلها كالآتي :

زيت موبيل 116 جنيه
فيلتر بنزين زي الأصلي بالظبط الي راكب فابريكة 25 جنيه
فيلتر هواء علبة حمراء 28 جنيه
فيلتر زيت فاك أبو علبة حمراء القصير (بناء على توصيات الأستاذ syd)
شوية تشحيم للبيضات و غسيل موتور عند واحد متخصص تابع للميكانيكي أخدله 10 جنيه

إكتشف الميكانيكي ان دواسة الدبرياج عندي فيها حاجة غلط انها محملة على الإسطوانة فوطاها شوية ...

زبط زوايا عند محطة بنزين موبيل موش فاكر أخد سبعة و أربعين جنيه ترصيص و زوايا عجل ... أكتر حاجة كانت الترصيص مش عارف ليه أخد فلوس كتير بس قولت مرة تفود ولا حد يموت :)

الميكانيكي ربط العفشة و ركب الفلاتر الثلاثة و غير الزيت و عمل تشيك عام على كل حاجة فالموتور و العفشة بعد 10 دقايق محايلة علشان يقولي مصنعيته طلب 20 إديتله 30 لزوم المحبة علشان ساب الي في إيديه و فضل يلف معايا نجيب الفلاتر و الزيت من البنزينة :)

التكلفة الكاملة حوالي 260 جنيه شاملة كوبايتين نسكافيه للميكانيكي علشان لزوم السهرة :d

بعد الصيانة
العربية بقت ناعمة على المطبات لإني كنت ناسيها شهرين و نص بتوع الشتاء منغير تربيط لإنشغالي
فيلتر البنزين كن شبه مسدود رغم اني باستخدم بنزين 92 من اول ما استلمتها ... بعد التغيير اكتشفت ان العربية كانت بتتخنق على سرعة 90+ جربتها النهاردة على الصحراوي قولت أمشي بيها شوية أجرب الفرق لقيتها بتقولي هات بنزين كمان و كمان على سرعة 100 بس ما باحبش أزود السرعة لزوم الأمان بس اتبسطت الحمد لله

بالنسبة لظبط الزوايا كان في عندي مشكلة من بعد آخر تظبيط ليها إن دوران الدريكسيون لليمين كان أكثر من الشمال (واخد من الشمال لصالح اليمين) و اتظبطت ودي كانت بتأثر على زاوية دخول الــيو تيرنات

و أخيرا صوت العربية هدأ بشكل واضح ... هوة ماكانش عالي .. بس هدأ قوي بعد تغيير الزيت

دي كانت التفاصيل علشان لو حد ممكن يستفيد بيها