الحمد لله زى ما الخبر قال انهم بعربية كيا سيراتو سودا.والعربية واقفة عند الاكاديمية على الونش مدشملة.

اللى حصل بقى من كلام ظباط الجيش والسواقين اللى هناك:

كانوا 3 راكبين سيراتو بيجروا ورا الموتسيكل وراح المحصل جارى على مكان تجمع الباصات و السواقين كانوا قاعدين فى باص.الحقونى هيموتونى.مين دول يا جدع انت.3 فى عربية عاوزين يسرقوا الايراد.السواقين نزلوا والعربية طبعا اتضطرت تهدى على المطب.ايه فى ايه يا رجالة .عاوزين حد من هنا.انتوا مالكوا .جايين هنا لمين يعنى وانزلوا من العربية نجيب البوليس نشوف حكايتكوا ايه وطلع واحد فيهم طبنجة ودور الضرب عشوائى واصاب 3 سواقين.الله يرحم واحد فيهم والاتنين التانين فى حالة خطرة.بعد ضرب النار واحد من السواقين لما لقى زمايله بيموتوا كان معاه مسدس صوت.ضرب طلقتين فى الهوا جريوا .والحمد لله كان فى اللحظة ديه ظابط جيش موجود بالصدفة هناك واعتقد انه ساكن قريب من المدرسة لان معظم السواقين عارفينه.جرى وراهم وضرب نار لحد ما وصلوا عند الاكاديمية واتعاملت معاهم العساكر اللى عند الاكاديمية وموتوا واحد فيهم والاتنين التانين اتمسكوا.

مش فاهم بقى ايه كلام مصراوى ده فى اول الخبر : قتل شخص وأصيب اربعة اخرون في معركة بين الاهالي والشرطة والشرطة العسكرية من جانب ومجموعة من البلطجية من جانب اخر بالتجمع الخامس بالقاهرة..

اهالى مين اللى ضربت فى مين؟اخخخخ يا دماغى.

والخلاصة بقى لما اتكلمت مع امناء شرطة هناك بالاتارى بتاعتهم ان الشرطة = 0 . الشرطة نفسيتها تعبانة ومش قادرين يتعاملوا بقسوة يا جماعة عشان خايفين الناس تبهدلهم زى ما حصل فى ظابط المعادى. واهم حاجة ان اول تعليق للامين.شفتوا بقى مش كانت الشرطة الاول احسن لما بتضرب بايد من حديد..طبعا اضطريت ارد عليه رد مش ولابد من 3 حروف.يعنى هو لا كدة لا كدة ولا ايه؟

لنا الله من قبل و من بعد وربنا يسترها علينا جميعا وعلى ما وهبنا اياه الله.