الموضوع: حصريا لنايل موتورز... أول تقرير مصور لبروتون بيرسونا اليجانس 2011

السلام عليكم ورحمة الله...

اعضاء المنتدى الكرام, تحية طيبة وبعد..

بما إني كنت قريت امبارح من عضو معانا في المنتدي (elzamalek) إن البروتون البيرسونا اليجانس نزلت, قلت أروح التوكيل انهارده بما إني بشتغل جمبه في القرية الذكية.

المهم رحت ابص وفعلا لقيت العربية واقفة بره, وطبعا قابلت الأستاذ محسن صالح بما إنه كان بيفرج العربية لزبون, وقال لي إن السعر 89000 للمانيوال, و 95000 للأوتو.

طبعا العربية Medium Line مش High Line كالعادة, بس بتختلف عالبيرسونا القديمة في كام حاجة هبينهالكم في الصور إن شاء الله.

نبدأ مع الصور.

أول اختلاف واضح في الشكل وهو تَغيير الفوانيس و الاكصدام و الشبكة الأمامية عشان تبقى أقرب للجين 2 في الشكل.





صورة للموتور, طبعا غني عن التعريف, كامبرو 110 حصان.



الفوانيس الخلفية الجديدة بعد مابقت ليدات.





السبويلر الخلفي الجديد, مدي شكل حلو قوي بصراحة.





مرايات الجوانب بعد مابقى فيها فوانيس إشارات.



الجنط الجديد, شكله مش عاجبني وشايف إن القديم بتاع البيرسونا أحلى.



التابلوه الجديد, مش عاجبني برده وكنت شايف إن الأول انسيابي أكتر, بس ده زودوا في الكاسيت مدخل AUX و USB. ايضا تم تَغيير لون الجزء السفلي من التابلوه لرمادي.



العدادات الجديدة, شكلها حلو قوي بصراحة ونورها أبيض في أحمر وبينور و يطفي بـ fade.



خامة الفرش بتاع الأبواب بقت أفضل وبقت شبه الشامواه شوية.



فرش الكراسي الجديد, قماش برده عشان Medium Line.



صورة لكابينة السيارة من الخلف.



وأخيرًا صورة لشنطة العربية.




أنا ناسي حاجة مش كده؟ آه مثبت السرعة معلش نسيت أصوره بس ماتقلقوش لأني صورت فيديو للعربية من بره وجوه موضح كل الإختلافات اللي في العربية سواء من بره أو جوه.


رأيي الشخصي في التغييرات, حسيت إن اللون الرمادي الجديد اللي من جوه زاد شكل التابلوه مش مدي فخامة للعربية من جوه زي القديم.

مثبت السرعة والعدادات الجديدة وفرش الأبواب الجديد تغييرات كويسة قوي.

التغييرات الخارجية في الشكل كويسة برده وإن كنت شايف الجنط كان لازم يبقى شكله أحسن من كده.

أسيبكم مع الفيديو.

YouTube - Proton Persona Elegance 2011 -- Egypt

في النهايةاعتذر لو جودة الصور مش قد كده عشان متصورة بموبايل... وإن شاء الله كل اللي حاجز يستلم على خير.

تحياتي.

تم التثبيت بواسطتي
مشرف القسم 1ب

8-4-2011 01:02am

المشاركة الأصلية كتبت بواسطة BlackEagle1985

انا عندي البروشور بتاع العربية اللي باين فيه التالي الهايلاين تمتاز عن الميديم بوجود مثبت السرعة ايرباج تاني غير بتاع السواق و ده خاص بالكرسي اللي جنب السواق بالاضافة الي abs & ebd و اخيرا فتح الشنطة من الريموت
دي الحاجات الموجودة في الهايلاين بس و مش موجودة في الميديم

بس حضرتك كاتب اني فيها مثبت سرعة فماذا عن الايرباج التاني و abs & ebd و الريموت ممكن توضيح

اعتقد انهم ممكن يكونوا نزلوها هايلاين بس وفروا في الفرش لاني فرش الهايلاين مكتوب في البروشور انه جلد انما الميديم و البيزك مش جلد

هو انهارده أستاذ محسن قال لي لسة منزلهاش بروشور ليه!؟

المهم حضرتك هي medium line, الفرق في ال high line بيبقى فرش جلد وعتب وكساحات. ومش عارف ليه مصرين ماينزلوهاش هنا.

المشاركة الأصلية كتبت بواسطة BlackEagle1985

واضح من الفيديو وجود 2 ايرباج و مثبت السرعة ايه اخبار abs & ebd طيب و هل فيه اختلاف في الريموت عن موديل 2010
و بخصوص الالوان المتاحة 5 ام 4 بس لاني اللون الاحمر خاص بالهايلاين بس فقل متوفر ولا غير متوفر

آه يا فندم كل ال options ده موجودة زي البيرسونا اللي قبلها بالضبط, الفروق في ال high line زي ما وضحت فوق, بالنسبة للون الأحمر برده ده مش هينْزل في الغالب عشان تبع ال high line بس.

بالنسبة للريموت مشفتوش للأسف.

المشاركة الأصلية كتبت بواسطة amohsen

شكرا يا كبير على الصور والفيديو بس عايزين تفاصيل كاملة عن المواصفات كلها

هي نفس المواصفات بتاعة 2010 يا باشا بس باستثناء الكام حاجة الجديدة اللي وضحتهم فوق. :)