شعورك ايه بعد احتجاز مبارك ونجليه 15 يوم

**نور القمر** · 13-04-2011 04:44 PM

مشاعري متضاربه
بالظبط زي مشاعري تجاه قاتل محكوم عليه بالاعدام
سعادة لتحقق العدالة مختلطة بحزن على انسان مفكرش ان انتقام ربنا وعدله قادم لا محالة
احنا فعلا مش ملايكة وعندنا اخطاء .. المهم نتعظ
اللهم لا تشمت فينا اعدائنا
اللهم استرنا فوق الارض وتحت الارض ويوم العرض

**تامر.محمد** · 13-04-2011 04:44 PM

احنا شعب طيب يا حاج احمد
:)

بس طيبتنا دي بتركب علينا الظلمة

**kono** · 13-04-2011 04:52 PM

المشاركة الأصلية كتبت بواسطة aif

بصراحة
يمكن انا كنت باتمنى كدة من زمان
وده كان حلم وامنية بأحمد الله اني شفتها في حياتي
لكن
مش عارف ليه عندي شعور بالحزن
مش تعاطف مع مبارك
لكن حزن على المصير اللي وصل اليه
شعور بالكآبة ...... انا مش فرحان زي ما كنت متخيل قبل كدة ... وده شيء انا مستغربه جدا ..... انا كنت متصور اني ح اكون في منتهى السعادة
....
هو كان ظالم وطاغية ومسئول عن هدم آمال شعب كامل .... ده محدش يختلف عليه
لكن انا حزين عليه كإنسان وصل الى كل هذا الكم من الإهانة والشماتة في أرزل عمره
مش لازم السكينة تسرقنا ونفرح و نشمت وخلاص
لازم احنا كمان نعتبر بما حدث له
هو احنا كلنا ملائكة
اكيد كلنا عندنا اخطاء
مين فينا ما ظلمش حد في حياته
...
يا رب
يارب تغفر لنا وترحمنا
يارب استرنا ولا تفضحنا بين خلقك ولا بين يديك
....
يا ريت كلنا نراجع نفسنا و نتوب لله واللي عنده مظالم يردها ويستغفر الله
وانا اولكم
اللهم اغفر لنا وارحمنا ولا تشمت بنا الاعداء

وَمَا ظَلَمْنَاهُـــــمْ وَلَكِنْ كَانُــــوا أَنْفُسَهُـــــمْ يَــظْلِمُــــونَ

**Elegance** · 13-04-2011 05:17 PM

اللهم لا شماته
ولكن
يمهل ولا يهمل

**otefa** · 13-04-2011 05:35 PM

نفس أحساسك اللهم لا شماتة
ألي فرحان فيهم أكثر جمال وعلاء صفوت وفتحي والحكومة الموقرة
وعقبال سوزان
ألي عاصر أول حكم مبارك هايعرف أنه في البداية عمل بنية أساسية وطور الخدمات من كهرباء وتليفونات
ده التليفونات كانت في حالة يرثى لها كان الواحد يطلع عينه جنبها علشان الحرارة تيجي ولو جت تلاقي مكالمتين معاك على الخط
ولا الدولية
المجاري دي بقه كانت مصيبة المصايب كانت بتضرب في معظم مناطق مصر راقية ولا شعبية والمطبات في الشوارع كانت قصة تانية غير الموجود دلوقتي(رغم الحالي مش بالمستوى ألي يليق بمصر برضه ) بس هناك فرق بين السبعينات ومنتصف الثمانينات وأوائل التسعينات
المواصلات كانت غاية في السوء بصراحة
ال10 سنين الأواخر هي أكثر سبب في خراب البلد من ساعة المحروس جمال وعز والعصابة ألي مسكت......وده لايعفيه من المسؤلية
ربنا يقدر لنا الخير في مستقبلنا أنه سميع مجيب الدعاء

**omar-saad** · 13-04-2011 05:50 PM

الله اكبر ولله الحمد
اخيرا الواحد سمع خبر حلو
انا مبسوط لدرجة لا تتخيلوها
بس اللهم لا شماته
كل بنى ادم لو يفكر للحظه ايه اللى ممكن يحصلة لو عصى ربنا
وطغى وعسى فسادا فى الارض
مش ممكن يجرؤ انه يتمادى فى الغلط
(نسوا الله فانساهم انفسهم)
وادى اخر اللى عملوه فينا
يارب خدلنا حقنا منهم كمان وكمان