عندى استفسار عن بعض قطع غيار

**msalah191281** · 13-04-2011 07:24 PM

السلام عليكم
عندى استفسار عن بعض قطع غيار انا اخوية معاة عربية لانسر 2008
و العفشة عندة بتخبط راح كشف فى التوكيل قالولو محتاجة شوية حجات :
تغيير طقم قواعد ماتور / بيض و بارات دركسيون / 2 جلبة مقص امامى / 2 مسمار ميزان
وطبعا لما سئلهم على الحسبة كان هيغم علية قالولو 2750 جنية
فكنت عاوز اسئل اية من الحجات دى الى لازم يجى من التوكيل و اية الى ممكن يجى من برة و ميعملش مشكلة
و الى ممكن يجى من برة يجيبو منين جديد ومنين لو استيراد و لو ممكن سعر الحجات دى لو حد عندو فكرة عن اسعارها جزاكم الله خير
المهم سواء جديد او استيراد يكون نوع كويس علشان يعيش و ما يبوزش حاجة و شكرا ليكم مقدما

**msalah191281** · 14-04-2011 01:15 PM

اية يا شباب هو مفيش حد غير طقم قواعد و بيض و جلب مقصات قبل كدة برة التوكيل ولة اية و فين الناس الجميلة بتعتنا ابو اياد و الناس الحلوة دى

**eldell** · 14-04-2011 01:20 PM

متااابع عشان فى حجات من ديه المفروض اغيرها

**msalah191281** · 17-04-2011 06:50 PM

كل دى مشاهدات و مفيش حد عارف الاجابة اية يا شباب هو المنتدى مالو نايم لية كدة

**محمد فضالي** · 20-04-2011 01:48 AM

بص يا باشا بالنسبة لمسامير الميزان فدول سعرهم مش غالي أوي في التوكيل فممكن تشتريهم منه أنا كنت سألت عليهم لقيتهم عاملين 150 جنية الاثنين + 10% ضريبة مبيعات

بالنسبة لجلب المقصات فدول نصيحة متغيرهمش غير الأصلي لأنهم بره غير مضمونين بالمرة

أما أتياش البارات والبارات فدول ممكن تجيبهم نوع اسمه 555 ياباني بس اتأكد انه ياباني ( محفور عليه Made in Japan) وعلى فكرة دول أغلى حاجة في الحاجات اللي انت سألت عليهم تقريبا ثمنهم 1200 جنية ( غصم واقتدار ) أما النوع 555 الياباني عامل 300 جنية تقريبا والله أعلم ان كان غلي دلوقتي ولا لأ

وقواعد الموتور على حسب ان كانت عربيتك اوتوماتيك ولا عادة فحاول تبين الموضوع ده

أرجو اني أكون أفدتك ان شاء الله

**elbaz18** · 20-04-2011 09:20 AM

بسم الله ارحمن الرحيم
- بالنسبة للتيش والبارات انا كنت عملت موضوع عنهم لافادة الاعضاء ودة اللينك بتاعة
http://www.nilemotors.net/Nile/212465-a.html
- لكن بالنسبة لقواعد الموتور للاسف مافيش قدامك غير الاصلى من التوكيل لان اللى فى السوق واللى بقولو علية تايلاندى او تايوانى مش هيكمل معاك شهر وهيبوظ وبردو قواعد الموتور اللى فى السوق الاستيراد كلها بايظة فماتحولش تلعب لعبة الاستيراد دى فى قواعد الموتور
- بالنسبة لجلب المقصات انا جربت كل حاجة فيها ومانفعش بردو غير الاصلى وثمنهم هتلاقية بحوالى 270 جنية فى التوكيل لكن اللى بيتباعو برة هتلاقى الواحدة تمنها 30 جنية ومش هتكمل معاك شهر وهيبوظو على طول
- بما انك جبت كل حاجة اصلى وصح الصح ماجتش على مسامير الميزان وهما ارخص حاجة هاتهم بردو من التوكيل لان اللى برة دول مالهومش ادنى لازمة
أتمنى من الله ان اكون قدرت افيدك وافيد جميع الاعضاء

**msalah191281** · 20-04-2011 12:20 PM

شكر ليكم على الردو المفيدة هى ال عربية 1600 اوتوماتيك بس خلاص نسمع النصيحة و نجيب القواعد و جلب المقصات و امرنا لله
فى سوال بقى بما اننا اتدبسنا فى التوكيل المفترى
قواعد الموتور متهيئلى مش بيظة اوى علشان الرجة بتاعت الوتور مش جامدة يعنى نص نص كدة هل ممكن ما يغيرهاش دلوقتى يستنى عليها كام شهر كدة ولة لو متغيرتش تبوظ حاجة يعنى فى اى ضرر هيحصل فى العربية غير الرجة ولة لا
هما كتبنلو فى التقرير بيض و بارات دركسيون هل دى هية هية أتياش البارات ولة دى حاجة تانية معلش علشان معلوماتى على ادى شوية و شكرا ليكم مرة تانية

**محمد فضالي** · 20-04-2011 03:43 PM

المشاركة الأصلية كتبت بواسطة msalah191281

شكر ليكم على الردو المفيدة هى ال عربية 1600 اوتوماتيك بس خلاص نسمع النصيحة و نجيب القواعد و جلب المقصات و امرنا لله
فى سوال بقى بما اننا اتدبسنا فى التوكيل المفترى
قواعد الموتور متهيئلى مش بيظة اوى علشان الرجة بتاعت الوتور مش جامدة يعنى نص نص كدة هل ممكن ما يغيرهاش دلوقتى يستنى عليها كام شهر كدة ولة لو متغيرتش تبوظ حاجة يعنى فى اى ضرر هيحصل فى العربية غير الرجة ولة لا
هما كتبنلو فى التقرير بيض و بارات دركسيون هل دى هية هية أتياش البارات ولة دى حاجة تانية معلش علشان معلوماتى على ادى شوية و شكرا ليكم مرة تانية

بالنسبة يا باشا لقواعد الموتور فدي ماتحكمش عليها بالنظر لأن مثلا أنا عندي القاعدة اللي تحت علبة الفيوزات باظت وشكلها كأنها جديدة ولكن القاعدة دي بيبقى فيها زيت من جواها أي قطع بسيط يفضي الزيت اللي جواها وبكدة تكون باظت ورأيي انك تغرم وتغيرهم لأن أكيد أي عيب في العربية بيبقى مضر ليها ومش في مصلحة الموتور

بالنسبة بقى لبيض وبارات الدركسيون هما الاتياش والبارات لأن بيض المقص بيتغير مع المقص كله وكمان ده بيعمر في العربية يعني ما بيتغيرش الا بعد فترة كبيرة

أرجو إني أكون أفدتك إن شاء الله