انسب سيارة فى حدود 135 الف جديد أو مستعمل

**tarekmomo** · 17-04-2011 02:17 PM

باسات 2006
جيتا 2007
هوندا سيفيك
اسكودا اوكتافيا
بى ام دبليو 316 2006

**Sindibad** · 17-04-2011 02:26 PM

طيب لو حد يفيدنى أخبار البى أم 2006 - 316 - مانيوال - عيوبها ايه؟ ومميزاتها

**ASKAFRAWY** · 17-04-2011 02:48 PM

حد سمع حاجة عن الرينو الداستر انا شايف برضه ان امكانياتها كويسة وسعرها 135000 ودى مواصفاتها

Renault Duster's occupants will appreciate the high standard of travelling comfort it provides, whatever the type of road or terrain, thanks to its high ride-height (205mm in 4x2 version and 210mm in 4x4 version) and specific work on its suspension (damper travel, springs and calibration). Comfort is further enhanced by Duster's long wheelbase (2.67m) and big 16-inch wheels.

Renault Duster can be ordered with a 1.6 16V 105 petrol engine or a dCi 85 diesel engines, both of which have already showcased their qualities under the bonnet of numerous other Renault models.

Both boast particularly thrifty fuel consumption:

The combined cycle fuel consumption of the 4x2 and 4x4 versions of Renault Duster dCi 85 is just 5.1 and 5.3 litres/100km respectively.
The combines cycle fuel consumption of the 4x2 and 4x4 versions of Renault Duster 1.6 16V 105 is 7.5 and 7.9 litres/100km respectively.

No compromise on safety

Renault Duster benefits from Renault’s acclaimed expertise in the area of safety.

On the active safety front, Renault Duster features, depending on versions, Bosch 8.1 ABS, as well as EBV electronic brakeforce distribution and EBA emergency brake assist.

On the passive safety front, Renault Duster is fitted, as standard, with two front airbags (depending on market) and three-point seat belts with load limiters for the front seats, to which pyrotechnic pretensioners can be added. Depending on the version, two lateral head/thorax airbags are fitted in addition to the driver and passenger front airbags.

**Mahmode** · 29-04-2011 12:37 AM

أنا رئيي خليك في الجديد وبلاش وجع دماغ المستعمل. أظن أنسب حاجة لمواصفاتك وحدود سعرك وسن المشتري وطريقة سواقتو الرينو فلوينس والله أعلم

**MazdaFan** · 29-04-2011 07:27 AM

المشاركة الأصلية كتبت بواسطة sindibad

السلام عليكم

الاختيار لواحد صحبى

1- واسعة وعائليه
2-مريحة فى العفشة والكراسى والقعدة
3-الكماليات مهمة وبخاصة السافتى (الأمان)
4-اتوماتيك افضل
5-عاليه عن الأرض
6- صاج قوى
7- توكيل محترم
8- مستعمل او زيرو
9- عمره المشترى 43 سنه ومالوش فى الدريفتات وحاجات الشباب دى وسواقته هاديه لكن بيسافر قليل على الطرق السريعة و كتير داخل البلد يعنى محتاج سيارة موفرة الى حد ما

أرجو الأفاده مع السبب ولكم الشكر

بلاش مستعمل عشان مايعدش يروح بيها كل شوية لميكانيكية واعطال لأنك ماتضمنش المستعمل ايه العيب اللي فيه ، ده غير ان سنه 43 سنة يعني مش عايز وجع دماغ أكيد ، فخليك في الزيرو ( إلا لو عرف يلاقي حاجة نضيفة كسر زيرو مالحقتش تتبهدل ويعرف يكشف عليها عند حد يكون ثقة )

نيجي بقى للاختيار وفقا للطلبات اللي اتقالت ، هانحط جنب كل طلب العربيات اللي بتحقق الطلب ده أكتر من غيرها ، ونصفي في الآخر على العربية اللي جمعت معظم المتطلبات
نبتدي بسم الله :

1- واسعة وعائليه : ( اوكتافيا ، سيفيك ، الانترا ، كارينز ، سيراتو ، تيريوس ، فلونس ، صني ، سوباروا امبريزا ، لانسر)
2-مريحة فى العفشة والكراسى والقعدة : ( اوكتافيا ، سيفيك ، الانترا ، كارينز ، تيريوس ، فلونس ، صني ، امبريزا ، لانسر)
3-الكماليات مهمة وبخاصة السافتى (الأمان) : (معظمهم فيهم نفس وسائل الأمان ، لكن بالأفضلية في وسائل الأمان نقول : امبريزا ، اوكتافيا ، سيفيك ،مازدا 3 ، فلونس ،الانترا ، سيراتو ، ماعنديش فكرة عن الباقي عشان مظلمهمش )
4-اتوماتيك افضل : ( اوكتافيا ، سيفيك ، لانسر ، امبريزا ، مازدا 3 ، سيراتو (6 سرعات) ، الانترا )
5-عاليه عن الأرض : ( تيريوس ، اوكتافيا ، الانترا ، فلونس ، لانسر ، امبريزا، ، صني)
6- صاج قوى : ( اوكتافيا ، معرفش الباقي ممكن يكون قوي نسبيا ولا لأ ، بس مافيش صاج اقوى من اوكتافيا !!! )
7- توكيل محترم :
( الكلام في التوكيل مالوش حدود وكل واحد برأي ، بس الفكرة في انتشار العربية وقطع غيارها ورخصها عشان لو حصل انه احتاج يصلح حاجة بره التوكيل وهنا بقى نقول الآتي:
1- اوكتافيا أرخص قطع غيار هي و الانترا وسيراتو ولا نسر نسبيا مش اوي ، معنديش فكرة عن الباقي اذا كان ممكن يكون رخيص ولا لأ بس أكيد السيفيك و امبريزا و مازدا 3 و فلونس قطع غيارهم غالية وخصوصا امبريزا غالية نار عشان مافيش منها غير ياباني بس )
2- توكيل كيا اسمع انه محترم وكويس ، توكيل اوكتافيا كويس بس اسمع انه زحمة من كتر الضغط عليه ( ممكن ماتكونش مشكلة اصلا ) ، ماعنديش فكرة عن بقية التوكيلات )

9- عمره المشترى 43 سنه ومالوش فى الدريفتات وحاجات الشباب دى وسواقته هاديه لكن بيسافر قليل على الطرق السريعة و كتير داخل البلد يعنى محتاج سيارة موفرة الى حد ما : ( بالنسبة للتوفير : الانترا ، سيفيك ، اوكتافيا ، وماعنديش فكرة عن الباقي عشان مافتيش )

لو جمعت ايه اكتر العربيات اللي اتكرر اسمها في كل طلب من اللي طلبتهم هتلاقي الآتي:

1- اوكتافيا
2- الانترا
3- لانسر
4- سيفيك
5-امبريزا
6- فلونس

تعالى بقى نصفي منهم : هقولك اولا استبعد امبريزا مع انها ممتاااااااااااازة جدا بس للأسف عشان قطع غيارها غالية جدا و توكيلها مش مراعيها ومش مسوقها كويس وسعر اعادة البيع ليها سيء جدا ، لكن من ناحية الأمان هي أحسن مواصفات أمان فيهم كلهم كفاية ان فيها 6 وسائد هوائية و abs و ثااااااااابته جدا اكتر من اي عربية في كل اللي اتقالوا وكل ده ب 140 الف بس ، لكن للأسف عيوبها زي ماقولتلك ( ده غير انها بتستهلك بنزين بزيادة شوية عشان دفع رباعي مستمر 4WD )

انا من رأيي : أوكتافيا وششششششششش ، بس انت طالب انها تكون في حدود 135 ، والأوكتافيا ال 2011 اوتوماتيك ب 170 ويمكن تعرف تلاقيها ب 165 ، فكده عدت اوي ، فللأسف هانستبعدها ( إلا لو دور وعرف يجيبها كسر زيرو 2010 واستعمال نضيف ومحترم ممكن سعرها ينزل شوية ) اوكتافيا تحفففففففة وصالون واسع وشيك جدا وبرستيييييييج جداااااااا وفيها وسائل أمان 2 وسائد هوائية و ABS و ESP وثابتة جدااااااا على الطريق

كده فاضل سيفيك و لانسر و الانترا و فلونس

ابعد عن السيفيك عشان هايتخنق منها في المطبااااااااااات ده غير انها جديدة وفاضية ب 156 الف ( الا لو مستعمل )

فضل لانسر و فلونس و الانترا ، وهنا اقولك انا عن نفسي اختار الانترا عشان قطع غيار ارخص بكتيرررررررررر من الفلونس و لانسر ، ومنتشرة جدا وناس كتير بتفهم في تصليحها بره التوكيل لو عطلت( الانسر كده برضه) ، وعائلية وواسعة (أوسع من لانسر) وزي الفل فيها كل حاجة وفيها 2 وسائد هوائية و abs و محرك ب cvvt( موتورها بيستجيب أحسن من لانسر وأوفر في استهلاك البنزين عن الانسر) وعفشتها ناعمة جدا جداااا
وكل ده ممكن تجيبها ب 129 الف هاي لاين كل الأوبشنز ، لكن الفلونس بتبتدي من 130 الف ومش منتشرة زي الانترا و الله اعلم مشاكلها ايه وهتلاقي حد يعرف يصلحهالك بره التوكيل ولا لأ وقطع غيار اغلى وسعر إعادة بيع مش زي الانترا ...

ملاحظة أخيرة : انا ماحبتش ادخل عربيات زي بي ام و باسات وجيتا في المقارنة عشان دي مش هاتيجي غير مستعملة وعشان سعرها يكون في حدود 135 او 140 يبقى هتكون قديمة ومستعملة اوي اوي اوي ، يعني في احتمال كبير تتعبه وكل شوية يرووح بيها على الميكانيكية وهو لسه جايبها ويتكدر منها !!! وعلى ايه وجع الدماغ ؟؟ مش فارقه في الآخر

ده اجتهادي في التفكير ، ومع ذلك ممكن تلاقي ناس ليها رأي تاني ، وربنا يوفقه للي فيه الخير ليه ان شاء الله ويباركله في عربيته اللي هايشتريها بإذن الله ايا كانت نوعها ايه

**ahmzd** · 01-05-2011 01:26 AM

أنا رأيي اختيار من اثنين لا ثالث لهما إلانترا وفلوينس
الفلوينس للوسع والشياكة والفخامة والهيبة والحداثة والكماليات ووسائل الأمان والوكيل المحترم كما أسمع ( لم أتعامل معه )
الإلنترا للانتشار والعملية وسهولة الصيانة وتوافر قطع الغيار داخل وخارج التوكيل وإعادة سعر البيع الجيد ( وإن كان الشكل الجديد على نزول )
وعموما أنا أميل للفلوينس وأحبها ( لله في لله )