الموضوع: :::::الصيادلة يـــــــريــــــــــــدون :::::

المشاركة الأصلية كتبت بواسطة wassim_nasser

علااااوى .. ازيك يا برنجى أفتقدك بشدة ! بص هو كلامك معقول بس انا مش فاهم ليه كل الدهشة دي؟ ماحنا بقالنا عشرين .. خمسة وسبعين سنة فى الشغلانة دي والمشكلة مش جديده : مادة فعالة تنزل بخمسين اسم > كل دكتور يصمم علي اسم > الاجزخانة تتزحم ع الفاضى > يطلع عندك اكسبايرد .. كل اللي فات ده عادي واتعودنا عليه بس هالفت نظرك لكام حته عشان نبقى قلنا مالنا وما علينا كصيادلة

1 - اكيد فيه دكاترة محترمة (وانا شفت منهم كتير) مش بالاقي الصنف عندي باشوف نمرته ع الروشتة باتصل بيه وباقترح عليه بديل وبيقولى اه اشطا ينفع بس ده طبعا فى حالة ان الصنف اللي كتبه كان ناقص عند معظم الصيدليات

2 - الدكاترة اللي مظبطين الصيدليات مشكلتهم مش مشكلة اسم تجارى ولا مادة فعالة .. مشكلتهم الدناوة وحب الفلوس وبالتالي مفيش أي قانون نقابي هايمنعهم من حاجه ودول حلهم سهل وبسيط (انا عن نفسى باعمله) تمتنع عن صرف الروشتة ومفيش مانع تفهم المريض النصباية عشان تبقى دقيت إسفين وشفيت غليلك وفى الغالب المريض بيكره الدكتور وبيقولك ياعم مش هالف تانى هات اللي عندك

3 - فيه بعض الدكاترة المحترمين (برضه عشان مانظلمش الدكاترة) بيصمم علي صنف معين عشان بيبقى فيه اصناف لها فعالية اكتر من اصناف تانية (اوبتيكال اكتيفتى و ايزومرز ) وده بيفسر وجود اصناف أغلي من غيرها رغم تشابه المادة الفعالة زي اللاكتوديل والدوستينكس ده ب 15 وده ب 65 بس فرق السما م الارض واعتقد ده حق الدكتور انه يوصف للمريض اللي هو شايفه احسن وماتقنعنيش ان الكتافلام بتاع نوفارتس زي ديكلوفيناك فاركو

أخيرا وليس اخرا كبر دماغك وعيش زي مالناس عايشة وماتعديش المواقف دي علي صدرك عشان ماتطقش من جنابك وعلي رأي سيد درويش ماتحط راسك بين الروس لاتقولي ده خيار وده فقوس

انت ياض مستخبي فين بقالك فترة؟؟
بص بالنسبة لفاركو ونوفارتس زي انت قولت....
دي عايزة تعديل النظام
يعني طالما دلوقتي مصر فيها ناس بتسمع...وناس عاوزه البلد تتغير
يبقا مفيش دوا ينزل من غير ماتكون المادة الفعالة بتاعته..محترمة وبنت ناس
وغير كده ياسوما
الدكاترة بتصمم على أنواع فروقهم مش بعيدة..يعني الايموكس والابياموكس..ياحلاوتهم الاتنين
بس الدكتور يكتبلك الابياموكس..ويقولك لااااااااا الايموكس ماينفعش
أنا مش بتكلم ع الشركات الضخمة ..والاصناف المستورة
أنا بتكلم غالبا ع الاصناف المصرية

يعني ننضف بقا ونظبط حالنا
موضوع الاكسباير .. وقصة كل يوم بتاعت انك تفهم الناس ان النوع ده زي النوع ده بالظبط.....قرفت منها ياراجل
أنا بفكر أسجل بصوتي شرح لفكرة النوع البديل..وكل زبون يدخل أشغلهاله علشان بقي وجعني