الموضوع: تجربتى مع اللوجان و سؤال عايز الوحوش يجاوبونى عليه

مساء الخير علي وحوش اللوجان .. انا مبسوط جدا لأن دي أول مشاركة ليا بعد استلام اللوجان وعايز احكى ف القصة دي :

1 - مبدئيا العربية جميلة جدا كشكل و كصالون و اللون البترولي شيك جدا .. علي الطريق سحب ممتاز .. ثبات واتزان وانا كنت فاكر نفسى ماشى 70 فوجئت انى 110 .. جوة البلد ناعمه وماتحسش بالمطبات

2 - تعديل ارتفاع كرسى السواق و ارتفاع الدركسيون ميزتين جامدين جدا يخلوك قادر تحس بأبعاد العربية و هاتاخد عليها بعد عشر دقايق سواقة .. المرايات الكهربا من أجمل الحاجات فى العربية ده غير ان المرايات نفسها واسعة وموضحة ابعاد العربية ومع ان الناس بتشتكى من صعوبة الركن الا انى حسيت الموضوع سهل جدا

3 - كاسيت سى دي تحفه وساوند سيستم محترم ومع انى هاضطر احرق عشرين سى دي عشان يكفوا الاغانى بس بجد الكاسيت جميل وعجبنى

4 - تكيف تحفة و قايم بالواجب وزيادة .. فى الاول ماكنتش حاسس بيه بس بعد ماظبطت قوة التكيف علي فتحات التابلوه فقط حسيت بقوته لدرجة انى بردت وطفيته مع انى كنت الجمعة الساعه 12 الضهر في عز النار

تحذير هام لكل اللي هايستلم لوجان ياجماعه من فضلكم اول حاجه تعملوها بعد الاستلام تظبطوا ضغط الكاوتش .. انا طنشت الحكاية دي اول 3 تيام بعد الاستلام وعمال اسأل نفسى العربية ناشفة ليه ؟ رحت اظبط ضغط الكاوتشات فوجئت ان العربية طالعة من التوكيل بضغط عجل 40 قدام 38 ورا !!!!!

أخر حاجة سؤال مش عارف اجابته : مع العربية استلمت كوريك ومفتاح العجل و خطاف قطر بس مش عارف فين المفتاح اللي بيفك الطاسات .. هل بيجى معاها مفتاح فك طاسات ولا افكها بإيدي؟ وان كان بيجى معاها طب هو فين؟ وازاي أفك الغطا بتاع فتحة الخطاف اللي ف الاكصدام؟