سلام عليكم,

أنا بصراحة حاسس إني مش قادر اكتم جواية أكتر من كده عشان في تساؤلات كتير جدا جوايا من ساعة ماعربيتي السيراتو اتسرقت من شهر تقريبا من تحت البيت وانا كنت في مدينة نصر مش في التجمع اليوم ده .

طبعا أنا عملت كل المحاضر في كل حتة اعرفها وفي الشرطة العسكرية وبروح أسأل بس للأسف مفيش أي جديد. أنا عاوز بس نفكر سوا ليه العربية ده سرقتها كتير كده. أكيد في أكتر من سبب فأنا بس حقولكم إيه اللي في دماغي ونفكر مع بعض يمكن نعرف نوصل لجواب يريحني أنا وكل ملاك العربية ده.

أولا الأسباب

  1. انتشار العربية الرهيب
  2. قطع الغير المطلوبة
  3. سهولة السرقة


نتكلم كده عليهم حاجة حاجة.

في رأي من الناس بيقول إن العربية ده عشان منتشرة جدا فهيا من أكتر العربية اللي ملاحظ سرقتها يعني بطريقة أخرى لو قلنا إن السيراتو تمثل 60 % من العربية اللي في السوق وده مثل مش أكتر فلما نسبة السرقة بتزيد فطبيعي إن تكون نسبة السرقة واضحة في أكتر عربية منتشرة. ده كلام منطقي بصراحة وانا مقتنع به نسبيا لكن ماظنش إن ده هو السبب.

نيجي للنقطة التانية وهيا إن قطاع الغير مطلوبة وده طبعا نتيجة للنقطة الاولانية وهيا الإنتشار, في ناس بتقول إنها بتتسرق عشان تتبع قطع غير وهيا تقريبا مضمون بيعها وده برده كلام منطقي بس أنا ماعتقدش إن ده السبب الاساسي.

نيجي بقى للسبب الثالت والاخر في وجهة نظري وهوا سهولة السرقه. نتكلم شوية أكتر عن الموضوع ده بقى:

أنا شايف إن أول نقطة إن الفئات المنتشره من العربية ده مفيهاش immobilizer وده طبعا كارثة في زماننا ده عشان ده بتخلي موضوع تدوير العربية بغير مفتاحها الأصلي شيء سهل جدا لواحد متحترف (يعني فني ).
الحاجه التانية بقى أنا شايف إن أكيد في معلومة فنية تم تسريبها من أحد الجهات الفنية التي تتعامل مع العربيه ده عشان مش معقول في اقل من شهرين في حوالي 60-70 عربية مسروقة وكلهم من نفس النوع علما بأن النسبة ده عليَّ جدا مقارنة بباقي السيارات (طبعا ممكن حد يقول عشان الانتشار بس أنا شايف إن الموضوع أكتر من كده)

أنا عن نفسي مقتنع إني آخر سبب ده هو أقرب واحد للصح ومع ذلك مش قادر أعمل حاجة عشان كده قلت افضفض معاكم شوية يمكن حد عنده معلومة تفدني وتفيد كل ملاك العربية ده.

أنا ليَّ بس طلب بعد اذنكم إن كل واحد عربيته اتسرقت يبعتلي ونشوف كده إيه ظروف السرقة وممكن نحاول نوصل لاي جواب وانا أأسف إني طولت عليكم

سلام عليكم