السلام عليكم

انا مش مصدق نفسي بصراحة اني بفتح موضوع في قسم المقارنات بس الحمد الله اتيحت لية فرصة اني اشتري عربية بالتقسيط و طبعا لما عرفت اني الحد الاقصى للتمويل حيكون 120 -125 الف .. قلت ياسلام ! دي بقى مش زي سنة 2006 لما كان اخري 70 و مش عارف اشتري حاجة ! دي الفئة السعرية الي مليلانة عربيات جميلة و بمنهى السهولة حشتري .....

ايه ده !

دي بيبقولوا عليها قطع غيارها غالية جداد !
ايه دي غليت !
ايه ده دي توكيلها اي كلام !
ايه ده دي عفشتها ناشفة جدا !
ايه ده ايه ده دي ضيقة جدا !


المحصلة النهائية .. نفس الحيرة :) وان كان الناتج افضل في الاخر باذن الله ... بس كنت فاكر اني حقرر نوع السيارة في وقت اقل من وقت حلاقة الذقن !

بس طلعت غلطان!
كقاية رغي :)

التفاصيل :

عايز سيارة فيها الامكانيات الاتية ( اي حاجة زيادة يبقى فل و 100% تعظيم سلام ) :

- 90 حصان ( ان شاءالله لو 1000 سي سي .. بس تطلع 90 حصان )
- اوتوماتيك اوتوماتيك اوتوماتيك اوتوماتيك اوتوماتيك ( اي نوع ... اوتوماتيك عادي - زوزو ماتيك - سوسو ماتيك ... اي ماتيك )

- عشفة متوسطة ( حاجة تجمع بين ثبات السيارة الجيد مش رياضي يعني و راحة داخلية )

- صوت محرك واطي ( انا بعيط من كتر ما بسمع صريخ محرك سيارتي الحالية )

- ضمان محترم ( 3 سنين على الاقل ) ( ببصلكوا تاني يا اوماترا ها !! )

- للاسف كنت بفضل انها تبقى هاتشباك بس كدة حقلل الاختيارات جدا ... فاي حاجة تمشي بس لو هاتشباك ححبكم اكتر :)

- الكماليات الاساسية بالنسبة لي : زجاج كهرباء " امامي و خلفي " ( ايوا ببصلك يا اوماترا و بقولها بصوت عالي )
ABS-EBD اساسي ! ( غبور باشا ؟ عامل ايه :) )
ِAirbag واحدة على الاقل ( المهم السواق سيبك من الي حواليه )
كاسيت بيه USB او AUX او يفضل IPOD
ريموت اصلي ( مفتاح )

بس كدة مش محتاج اكتر من كدة بس لو سيدان يبقى ياسلام لو في PARKING SENSORS علشان اخوكم بيركن الهاتشباك الحالية عن طريق الزجاج الخلفي ... لما الاقيه كبس على السيارة الي وراه يبقى كدة 100% واقف LOL

----------------------

تكمن المشكلة بقى في اني شخصيا ... مش فارق معايا ماركة العربية ... يعني هيونداي ولا حتى فولكسفاجن ! انا عايز عربية على اد فلوسي و امكانياتي و متقرفنيش و انبسط برده و ابقى مبسوط و الحمد الله اني اشتريت حاجة محترمة ..

انا مش من الناس الي بتمشي ورا الماركات وخلاص و مخي متفتح تماما لاي ماركة ...

انا موضوعي جدا ! و بحب الاراء المخالفة ( طبعا لانها كلها غلط وراي انا الصح ) فحسهل عليكم المهمة و حستبعد العربيات الي انا كارهها ( وجها لله ... لسبب وجيه ... غتاتة .... سموا الي تسموه )

القائمة السوداء ( سيارات لا يعيبها عامة حاجة جوهرية ولكني لن اشتريها ) :
- نيسان صني يجميع انواعها ! (كدة ! من غير ليه )
-هيونداي الانترا ( الشكل الحالي - شكلها عك و في شكل جديد نازل جميل )
- هيونداي نيو اكسنت ( مش ال RB ... الي قبلها - في شكل جديد نزل )
- لانسر ... ( ولا مكوة ولا بوما ولا قرش و لا قرد - كدة ! من غير ليه )
- اوبترا ( كدة ... مش عارف ... كدة وخلاص ! )
- اي سيارة فرنسية ( رينو - ستروين - بيجو ) ( هما عارفين ليه ! )
- اي سيارة صينية ( مش لسبب معين بس طلاما في امكانية لسيارة اغلى يبقى مش ححتاج حاجة صيني )

نرجع تاني ... انا معنديش عقد من احجام العربيات ... مش لازم اركب اوتبيس نهري علشان احس اني جبت عربية بتمنها ولا حاجة ! بالعكس تماما ! اركب عربية على حجمي و حجمي عائلتي و احتياجاتي انسب الف مرة ماركب فيل ب 4 عجلات و اصرف اد كدة على الفاضي و كلها 5 سنين و شكلها يقدم و تترمي !

فالمقارنة مش حتبقى عادلة من ناحية الفئة ... انا ححط الاختيارات المتاحة و المحببة بالنسبي لي في صورة شبه نهائية و انتم احبائي ... توصولني شوية شوية للاختيار النهائي !

وطبعا كل واحد وافق على العربية النهائية ليه عندي حلاوة !
:الي انا اختارتهم في النهاية في فروقات جوهرية بينهم و فيه واحدة اي حد حيشوف الموضوع حيشاور عليها على طول !!! و يقولي ازاي ياراجل تحط دي مع دي ! و طبعا ليه وجهة نظر ... بس الاختيرا السهل ده ... اكتر واحد مكلف سعرا و كمان في قطع الغيار على مدى تقسيط مدته 5 سنين ... فهل ممكن تحسبها تاني ؟ هل تستحق ؟

اختيارتي الاخيرة هي :

- هيونداي اكسنت RB HIGHLINE GLS
دي غير الHIGHLINE العادية و فيها الاتي :
1600 اوتو - زجاج - مرايات - FogLights - ريموت - سنتر - باور
2 ايرباج - ABS/EBD - Keyless Entry - Start/Stop Engine
Bluetooth - Multi-function - كراسي جلد - MP3/USB/CD/AUX
Parking Sensor + Camera - تكييف ديجيتال
جنوط 16 سبور !

طبعا كمية كماليات عمرنا مشفناها في سيارة هيونداي في مصر .. لكن كل الكماليات دي ب 116 الف جنيه ! مبلغ مش هين خالص يعني !

مزايا : شكلها بصراحة بالنسبة لي مبهر جدا ! جدا ! جدا ! كماليات مش موجودة في عربيات اوروبي اكبر و اغلى !

جودة واعتمادية هيونداي ارتفعت كثيرة في السنين الماضية

عيوب : تمنها ... اي نعم مازالت ارخص من كل منافستها الاوروبية و اليابانية .. ولكن مازالت برده مش رخيصة , و طبعا جديدة لسة مجربتش اوي .


KIA CERATO EX
معرفش كمالياتها كاملة بس متاكد انها اقل من الاكسنت الي فوقيها بس طبعا اكبر مساحة في الوسع و العرض و كل حاجة و نفس المحرك بس بفتيس 6 سرعات
سعرها 117.900 ( توكيل .. مش بحب الخليجي )

مزايا : اوسع و اكبر من الاكسنت اكيد .. ضمان ممتاز و توكيل جيد و شكلها جميل برده حتى لو انتشرت اوي :) كماليات لا باس بها.

عيوب : مفيهاش ABS ودي مشكلة .. مسمعتش حد معاه العربية بيتشكي من حاجة .. غير العفشة .. يعني كله بيقولي عربية ممتازة و جميلة او حتى جيدة و متوسطة .. بس تيجي موضوع العفشة والاقي كله بيتفق انها متعبة جدا !


Mazda 3 F/O Auto
دي العربية الي قلت انكم كلكم حتاشروا وتقوليلي هي دي هي دي ! ازاي اقارن سيراتو و اكسنت بمازدا ياباني ! طبعا كلها وجهات نظر سليمة 100% و انا معاكم ..بس ممكن نبص على المازدا 3 الي قبلها ؟

غبور عامل على دي عرض الاوتوماتيك موديل 2010 بس ب 128.900
دي مواصفاتها ايه ياعم ؟

1600 اوتو - زجاج - مرايات - باور - سنتر - ِABS/EBD - foglights
USB/Mp3 CD - 1 Airbag

طبعا كماليات متواضعة الى حد ما بس بسعر و عربية ممتازة الى حد كبير .. بس دي كدة اصلا برة السعر المقترح و ممكن اتبهدل شوية واجيبها ..

بس لو حاخد الموديل الي قبله كمقياس ... انا شفت ناس بتحاول تركب قطع غيار عربيات تانية علشان مش لاقي قطه غيار لعربيته !
شفت ناس بتحاول تخلص منها (الخليجي بالذات ) باسعار هلامية ! يعني ال AERO الي كانت اعلى فئة ب 140 الف ولا 150 .. شفتها بتتباع ب 90 ! و هي عاملة مثلا 30 الف !
ليه ؟ الله اعلم ..

مسالتش على قطع الغيار بس غبور هو وكيلها بدره .. و بصراحة متوقع جدا انها تبقى ارقام فلكية ! و انا حبقى بقسط لمدة 5 سنين و مش حقدر ادفع المبالغ دي في الصيانة مثلا .. و مش عايز اهمل العربية او اطلعها برة التوكيل !

------------

الاختيار الاخير :
Elantra 2012
انتظار نزول الانترا الجديدة .. لو اني مش متفائل نهائيا ... اذا كان الاكسنت الكاملة ب 116 الف .... اعتقد بدون مبالغة الانترا الكاملة او الشبه كاملة حتى مش حتقل عن 130- 135 كمان .. بس ممكن نشوفها برده ساعتها ونحكم .

-------------


ايه رايكم , رغيت كتير اوي انا اسف ...
بس في عربيات استبعدت من الموضوع مع انها ممتازة ...مثل مثلا : السيات ابيزا .. العربية تحفة فنية فعلا .. بس حرام ادفع 126 الف جنيه في عربية و تابلوها مش ظريف خالص و نازلة بطاسات ! يبقى المازدا 3 اولى !

فيات بونتو ايفو .. والله اشيك عربية في دول من راي ... بس 77 حصان ب 121 الف جنيه ؟ من امواطرة ؟ لا شكر ا !

سكودا فابيا اوتو مش سبورت - 124 الف .. سالت على قطع غيارها ... ومشيت من غير مارد السلام حتى :)

فورد فيستا كانت معشوقتي .. قبل ماتبقى ب 135 الف جنيه

شيفورليه كروز ... اول فئة اوتوماتيك ب 131 الف و فاضية و من توكيل اي كلام !