الموضوع: حد يعرف عن تنشيف المساعدين؟؟؟؟

يا سلااااااااام... من زمان والله الواحد مشفش كمية العجن و الفتى دى فى مكان واحد

اول مرة فى التاريخ اسمع عن حوار تنشيف المساعدين دة... انا كنت فاكر حد مساعدينة مبلولة و عايز ينشفها بفوطة بس طلعت غلطان

مين اللى اخترع القصة دى و بيعملها ازاى و على اى اساس؟

طيب لو اللى بتكلم مجنون يبقى المستمع المفروض عاقل و ميسبش حياتة فى ايد واد كفتجى يفضى مساعدين و يملا و يخرم و يلحم... انتوا بايعين نفسكم ولا حاجة؟؟؟؟

محدش يعمل كدة خالص لان باختصار شديد دى @#$%^ ... مهو مينفعش اقول الكلمة و الا ابقى بخرق قواعد المنتدى... و انتوا بتخرقوا قواعد العقل و التفكير السليم

بالعقل كدة لما القصة دى حاجة ظريفة طيب ليه شركات المساعدين منزلتش مساعدين بطبب و درجات زيوت مختلفة عشان الزيت الخفيف للراحة و العادى للقيادة المعتدلة و زيت فتيس للفيادة الرياضية و زيت تموين للى مبيعرفش يسوق و كدة؟؟

و يبقى العملية سهلة و ممكن انت تعملها بنفسك قبل ما تسوق العربية تقوم تحط درجة الزيت اللى تناسب المشوار لو شد و جرى او سهرة فى كازينو او حتفقلك ساعتين فى اشارة ميدان التحرير؟؟

يا جدعان حرام عليكم انتم ناس متعلمة ازاى تسيبوا شوية كفتجية يدحكوا عليكم؟؟ حتى لو واحد عمل كدة و العربية بقت ناشفة... هل معنى كدة ان النشفان دة مش حياثر على حاجة تانية؟ هل معنى كدة ان العربية حتعيش بالمنظر دة مدة طويلة؟ هل اساسا المساعد حيستحمل الضغوط الاعلى من الطبيعى اللى بقت جواة من الزيت التقيل؟ و الاهم من دة كلة... هل العربية بقت كدة امان؟؟؟

هل انا و اصحابى عجزة مثلا و منعرفش نعمل الحوارة دة؟ نعرف و نص و تلات تربع كمان بس الموضوع مش عفية و فتحة صدر و خلاص.. املا المساعد زيت تقيل و خلاص...طبعا لا دى حاجات محسوبة و متصنعة مخصوص و بتفرق من عربية لعربية يبقى بالعقل كدة القصة دى متنفعش خاااااااااالص

اللى عايز عفشة رياضية يدور على عفشة لعربيتة عاملاها شركة محترمة و اذا ملقاش يبقى يشوف عفشة رياضية لعربية عفشتها نفس عفشه عربيتك (لانوس و اوبل استرا 92 مثلا) واذا ملقاش يجيب مساعدين انشف شوية من الاصلين اللى فيها ززز مونرو مثلا و دة اضعف الايمان... حوارات ملى المساعدين و قص و لحام السوست دة غلط

اللهم بلغت... اللهم فاشهد

MMamdouh

بلاش ندى ودانا لناس بتالف و فهلوية همهم يضحكوا عليكم و ياخدوا فلوسكم... الكلام دة كلة فتى و هجس و انتوا بتموتوا نفسكم

المشاركة الأصلية كتبت بواسطة azab

ممكن تعمل فكرة حلوة وتأدي الغرض ورأي انها اقل الاضرار في حالت التجارب دي!!!!!!
هتفك الاربع سوست وتضم اخر حلقة وحلقتين علي بعض علي حسب العلو اللي انت عايزه وتلحمهم في بعض سواء كهربة او قصدير مع قفيز حديد صغير يساعد علي ضمهم مع بعض ويستحسن انهم يكونوا اخر السوستة من الناحية السفلية (من الكاوتش ) علشان يكون الجزء الملامس لجسم العربية مرتاح
النتيجة ان علو العربية هيكون اقل وطبعا ثبات اكتر لان طول السوست قصر وطبعا هتحس باداء رياضي اكتر ونتيجة كويسة + انك لو زهقت منهم هتفك الحام وترجع السوستة لوضعها الطبيعي ونفس مشوارها القديم في الارتداد وحركة المساعد الطبيعية وكأن شياّ لم يكون بس لازم تكون مظبط العفشة
كلها بالمرة علشان تحس بالشكل الكامل

فكرة هايلة يا معلم بس فيه كام سؤال كدة مزنوق فيهم...

1- حتعرف منين كمية اللحام اللازم لضمان عدم انكسار اللحام مع حركة العفشة؟ و تضمن منين ان القفيز متين كفاية انه يمسك السوستة و مينكسرش تحت الحمل؟

2- حتحل ازاى مشكلة الاجهاد الحرارى اللى حتتعرضلة السوستة اثناء اللحام (و الفك اذا كنت لسة عايش) لان الاجهاد دة حيفقد المعدن مرونتة و السوستة حتنشف لوحدها؟

3- لو السوستة من نوع الprogressive springs حتلحمها من فوق ولا من تحت ولامؤاخذة؟

4- لو لفات السوستة اصلا مش كلهم قطر واحد... حتعمل الحوار دة ازاى؟ ولا حتعملة فى نص و نص لا؟؟

5- لما اللحام يتفك و الكولية يتكسر... الحياه حتبقى شكلها ايه و انت سايق على سرعة؟؟

ابوس ايديكم بلاش فتى... لو مش فارقة معاكم حياتكم... اكيد ليكم اهل قلبهم حيتقطع عليكم لو جرالكم حاجة لا قدر الله

MMamdouh

المشاركة الأصلية كتبت بواسطة azab

الله الله الله ايه الدخلة دي يعم ممدوح
اهدا علينا شوية يا عم الموضوع كله من الاول كان افكار وتجارب وتأليف هو انت شايف حد راح نفذ
وبعدين محدش هيعمل حاجة ويدفع فلوس الا لو كان مقتنع

انا كاتب كدة عشان خايف هليكوا والله

الفكرة ان ممكن اوى واحد يقنعك بالفكرة و يعملك البحر طحينة و يقولك دا انا عملتها لفلان و علان و ترتان و الدنا بقت وردى و كدة فا تقتنع بية و تعمل حاجة ممكن تكون خطر عليك... هو مش حيفرق معاه سلامتك لكن انا تفرق معايا سلامتك

وبعدين برضه انت هتفضل المرجع بتاعنا في حالة التنيفذ علشان تبقي شريك اصلي في الجريمة
وفي حاجة اسمها تبادل الافكار والخبرات وده الهدف الاساسي من المنتدي

يا سيدى ربنا يخليك بس انا مش عايز اكون طرف فى اى حاجة ممكن تسسب مشاكل لحد... دا انا لما كنت بعمل تعديل الفرامل فى عربيتى و الناس بتسال عملت ايه و سويت ايه كنت بقول استوا لما اجرب و ابقى متطمن تمام ان التعديل مشش حيسبب اى مشكلة... كان سهل اقول انا ناوى اعمل كذا و كذا و حد يسبقنى و يعمل اللى قولتة و تحصلة مشكلة لا قدر الله و يبقى ذنبةفى رقبتى...

حتى بعد مل عدلت فرامل عربيتى و مكنش فيها جرام تاليف كتبت بالبنط العريض ان اللى عايز يعمل كدة يعمل على مسؤليتة الشخصية... انا مش عايز اشيل ذنب حد بالرغم من انى مجرب الموضوع و حسام حسن كمان جربة و بسوط جدا... انا مش عايز احس بالذنب تجاه حد

والخبرات بتيجي من التجربة سواء ان كانت صح او غلط او جابت نتيجة او لا يعني ممكن حد فينا يقول فكرة والتاني يكمل عليها او يستغلها في حاجة تاني
فمتخدش الموضوع علي اعصابك كده

ما هى دى المشكلة... فيه حاجات لو جربتها بتبقى مخاطرة بحياتك.. يعنى لو جربت فلتر هوا ولا هدر مش قضية.. لكن تجارب فى فرامل و عفشة دى مصيبة خصوصا ان اللى بيعملك التعديل مش راجل دارس او حتى قراء عن الموضوع

ومعني ان في نوع من انواع التعديلات بتحصل ومحدش بيعملها فده مش نوع من انواع العجز عن تنفيذها ولكن كل تجربة ممكن تنجح او تفشل وانت سيد العارفين
فلو في معلومة مغلوطة او انت شايف كده ممكن يكون رفضك عن طريق التحليل وليس عن طريق النهي و افتراض السوء فقط

مهو انا حطيت التحليل فى ردى برضة عشان الناس تفهم... عارف اسواء حاجة ايه؟... ان واحد يقولك على حاجة انها متنفعش وخلاص... لان انت انسان و عندك عقل و بتفكر زيك زى اللى قالك لا و محتاج اجابة وافية عشان تعرف لا دى جت منين و لا مش حتبقى مقتنع باللى بيتقالك

حصلت معايا لما قلت للميكانيكى انا عايز افك الرشاشات و انضفها ب WD40 وقالى الرشاشات مبتنضفش... قولتلة ليه قاللى هى كدة

طبعا فى اول اجازة فكيت انا الرشاشات بنفسى و لقيت ان الفونية اساسا مش باينة من طرف الرشاش و اللى ظاهر فقط هو الشبكة اللى بترش البنزين و بالتالى مستحيل تنضف الرشاش بشكل يدوى... شوفت اللفة اللى لفتها عشان اعرف "هى كدة" اللى قالها الميكانيكى جت منين؟

انا اخرى ضيعتلى ساعتين تلاتة عشان اعرف الاجابة و متكلفتش حاجة... التكلفة فى مساعدين و عفشة و فرامل اكبر بكتير... و قدر اهمية التكلفة بيبقى رد الفعل

عارف حسستني انك شوفت ولاد اختك بيلعبو في الطين وانت بتقولهم لا كده هدمكوا هتتوسخ وممتكو هاتضربكوا علشان هي بتخاف عليكوا ( نيههههههههههههههههههههههه هههههههههههههههههه

مش قصدى والله بس انا بحس ان الناس هنا كلهم اخواتى... انت لو شفت اخوك بيحاول يعمل حاجة غلط حتحذرة لانك خايف علية... و انا خايف عليكوا

الناس اللي هنا وعين ومقدرين يا ممدوح وسنهم بالكافي انهم يقدروا يميزوا بين الشغل الصح والعك والتأليف

عشان كدة انا مردتش الرد دة اول ما شفت الموضوع و سبت الناس تقول رايها بس خفت لما لقيت الناس بداء الموضوع يشدها و حسيت ان فيه ناس ممكن تجرب بالفعل

رجاء اخير اوعي تزعل من اي كلمة ده ولا هو عتاب وولا لوم ولا اي حاجة من الكلام ده

هو فيه حد بيزعل من اخوة؟؟؟

انا طبعا مش زعلان منك او من اى حد هنا بس انا بخاف حد دماغة تلعب من فكرة زى كدة و يعملها... اصل الكلام برضة منطقى انك لما تحط زيت تقيل المساعد فعلا حيبقى انشف من الطبيعى... بس الفكرة فى
اللى حيحصل بعد كدة... ممكن النتيجة تبقى وحشة اوى لا قدر الله

بس انت شخص انا عن نفسي ديما بقولك انك استاذ فعلا لانك علي القدر الكافي من الخبرة السليمة والتجارب اللي ممكن الواحد يرجعلها

يا باشا ربنا يخليك و يسلملك طريقك

MMamdouh