تجربتى مع زيادة الحرارة فى المحرك

**mazens** · 20-04-2011 11:35 AM

السلام عليكم
الف تحية لكل الأوبلاوية وعلى الاخص افراد العصابة واشكرهم على الردود

النهاردة عايز احكى عن مشكلتى مع ارتفاع درجة الحرارة فى الموتور وتبدأ الحكاية
1. اول ما اشتريت العربية وده كان اخر الصيف اللى فات وكانت الجو حر جدا لاحظت ان الحرارة مهما حصل ومع تشغيل التكيف لا تزيد عن 90 وكنت فاكر انها كده كتير لحد ما عرفت انه طبيعى فى الاوبل
2. وبعدين من كام يوم كده بدأت الاحظ ان الحرارة بدأت ترتفع بشكل ملحوظ والمروحة بتشتغل بأقصى قوتها ومتبطلش وكانت بتوصل لل 98 وده كان قلقنى جدا
3. شكيت فى انها تكون ثرموستات الحرارة وتكون باظت وقولت اغيرها ولما سألت عن سعرها جديد لقيت البياع بيسألنى ايه هى القطعة اللى فى الثرموستات اللى عايز اشتريها ؟؟ طبعاً فوجئت بالسؤال ولما استعلمت منه عرفت ان الثرموستات عندة مكونه من ثلاث قطع الأولى تمنها 20 جم والثانية 40 جم والثالثة 90 جم
4. بالتأكيد مكنتش عارف ارد علية ااقوله ايه فقالى الأحسن طبعا روح حط العربية على الكمبيوتر وهو هيبان العطل من اى قطعة ، وطبعا انا معرفش اى كمبيوتر خالص ولا هو فين.
بالصدفة من خلال بحثى لقيت المنتدى ده والاجمل انى لقيت قسم خاص للأوبل وناس بسم الله ماشاء الله خبرة
5. قعدت ادور فى كل الموضوعات اللى بتتكلم عن الحرارة بالموتور والحقيقة انها كانت كتيير وده طمنى انها موش مشكلتى لوحدى وانه طبيعى بيحصل.
6. المهم بعد بحث لقيت فكرة عن تنظيف دورة التبريد بمعاونة الخل الازازة اياها ام 2.25 جم ، وبعدين نفذت الفكرة
بصراحة لقيت بلاوى نازلة من العربية وفضلت تنزل تنزل تنزل لحد ما المية بقت نضيفة زى الفل
7. قفلت وتابعت الحرارة اليوم اللى بعدها لقيت كبيرها 92 درجة وده برضة موش حلو
8. رحت رايح شارى سائل تبريد الجركن ابو 18 جم 4 لتر صنع فى السعودية لانى ملقيتش الجركن ابو 51 جم
9. وكانت النتيجة ان درجة الحرارة فى اسوأ الظروف 88 درجة.

وهذه نهاية الحكاية Le fine

**N.a.j.d** · 20-04-2011 11:41 AM

شغل حلو ياباشا وان شاء الله انها ماتتكررش تاني وربنا يعوض علينا وعليك
بس حكايه الحراره دى ف الاوبل مسمعتهاش ف الاوبل الا ف مصر ....

**فادى محمد** · 20-04-2011 11:47 AM

اهلا بيك ياباشا..

**mazens** · 20-04-2011 12:09 PM

المشاركة الأصلية كتبت بواسطة hellboy

اهلا بيك ياباشا..

يا هلا وغلا بيك

موضوعاتك ممتازة واستفدت منها

بس فيه موضوعين الصور موش موجودة وهى مهمة لواحد زى موش عارف حاجه
الموضوع الاول بتاع الايديال كنترول
والتانى بتاع اويل سيل الاسبراتير

وربنا يخليك لينا

**N.a.j.d** · 20-04-2011 12:17 PM

الله اعلم بس هنا برده مفيش مشكله مع انه نفس طبيعيه جو مصر

**caboo_1** · 20-04-2011 01:04 PM

الجزء اللى بيتشال هو ثرموستات الكوعة بس منصحكش انك تشيله لو برده فوائد كتير هبقى اشرحهالك بعديننظرا لظروفى

لو لحظت كمان ان المراوح مبتشتغلش خالص قبل 90 درجة وليها فوائد وعيوب وبرده هشرحهالك انشاء الله
ان شاء الله هعمل موضوع حلو عن الحرارة وهنطبقة كلنا

**kar!m** · 20-04-2011 01:34 PM

100 100 .. ربنا يبارك لك .. اسمها Le Fin بس من غير e.
اللى ب ال e دى كلينكس

**waoola_78** · 20-04-2011 01:36 PM

انا برده كان عندى نفس المشكلة من يومين ( ايام الموجة الحارة جدا ) بس كانت بسيطة الحمد لله
الترموستات ساح
كتاوت المروحة ساحت

موضوع بسيط جدا

روحت للكهربائى بتاعى الله يباركله وعمل الاتى :

غيرنا الترموستات . غيرنا الكتاوت . نضفنا الرادياتير . حطينا مية خضراء

التكلفة :
ترموستات اسبانى 30 جنية بيشتغل عند درجة حرارة 85 على السرعة العالية
جركن مية خضرا 20 جنية سعودى
كتاوت مروحة دايو 20 جنية
الاجمالى 70 جنية من غير المصنعية

الملاحظات :
النهاردة الصبح وانا رايح الشغل تعمدت اشغل التكييف عشان اعرف اخبار الحرارة اية . مشوارى من حلوان الى المهندسين وتعمدت امشى فى الزحمة . اتأخر مش مهم

لاحظت ان درجة الحرارة مش عايزة تعدى ال 80 . يمين شمال ابدا

والحمد لله على كل حال

**N.a.j.d** · 20-04-2011 03:38 PM

بس لو نزلت درجه حراره كدا بيثر ع مصروف البنزين ولا ايه ؟؟

-

الموضوع: تجربتى مع زيادة الحرارة فى المحرك

LinkBack

أدوات الموضوع

عرض

تجربتى مع زيادة الحرارة فى المحرك - انشر الموضوع فى :

-

-

-

-

-

-

-

-

المواضيع المتشابهه

مشكلة زيادة زيت المحرك --نيسان صني 2012

زيادة زيت المحرك

زيادة عزل المحرك.

زيادة الحرارة فى كورسا 94-1200

زيادة عزل المحرك..

الكلمات الدلالية لهذا الموضوع

المفضلات

المفضلات

ضوابط المشاركة