الموضوع: 128 وشكله في المطالع

زي ما حضرتك قولت أنك كنت طالع مطلع المقطم .. وده مش مطلع سهل .. وأنك نقلت غيار الرابع على سرعة 60 (وده العادي لو ماشي على طريق مفيهوش منحدرات) .. ورأيي يتلخص في الآتي :
1) كان المفروض تحرق على الغيار شوية (لحد 70 أو 80) وبعد كدة تنقل الرابع علشان العربية تكون مريحة في المطلع .
2) ممكن ميكونش طقم دبرياج .. ممكن تكون الكهربا مش مظبوطة قوي أو الموتور كابسه ضعيف "شوية" .. يفضل في 128 بصفة عامة أن الكهربا تكون زيادة "حاجة بسيطة " علشان السحب يكون كويس وللمواقف اللي زي مطلع المقطم والكباري .
3) منصحكش بموضوع طقم الدبرياج الاستيراد وملئ الأسطوانة .. لأنها كلها حوارات ملهاش لازمة (مع كامل احترامي لأصحاب الرأي اللي قالوها) لأنها عديمة الجدوى ومبتقعدش كتير وبتكون عرضة للتلف سريعاً .. وفي الحالة دي حتضطر تغير لجديد وحتكون خسرت المصنعية مرتين .
وعلى العموم دي بتبقى بدايات أعراض تلف طقم الدبرياج .. ومش معنى كدة أنك لالالالالالالالالاززززززز زززم تغيرها في الحال .. هي ممكن تقعد شوية لحد القدر اللي تحس أنها ممكن تقل بأصلها معاك وفي الحالة دي تغيرها في أقرب فرصة .

المشاركة الأصلية كتبت بواسطة mrastra

يا اخى اقسملك بالله جبت دسك واسطوانة وبلية جداد ماركة محترمة وركبتهم فى ريجاتا
اقل من 5000 كيلو الاسطوانة والدسك باظو
رحت جبت دسك واسطوانة استيراد راكبين لغاية النهردة
وخسرت المصنعية مرتين فك وتركيب الفتيس
الموضوع يا جماعة ان قطع غيار الفيات معظمها مضروب على عكس اليابانى او الالمانى
فا ملوش لزوم حد يقول حوارات ملهاش لزمة

إذا كان حضرتك موجه الكلام ليا زي ما فهمت .. فأرجو تخفيف لهجة الحوار فنحن لسنا في ساحة للخلاف والحدة في الرد .. فكلنا هنا أخوة قبل أي شيء وبنفيد ونستفيد .. وأرجو أن تتفق معايا في النقطة دي .. ويكون الحوار هاديء وبدون أي انفعالات لمجرد الخلاف في الرأي .. وأعتبرني زي أخوك الكبير أو الصغير .... هههههههههه


متفق معاك تماماً أن 90% من قطع غيار الفيات بتكون مضروبة .. بتكون صيني فرز تالت كمان ومدموغة أنها مصنوعة في أيطاليا وتركيا .. علشان كدة لازم نشتري الحاجة من محل موثوق فيه أو على الأقل عارفين أن سمعته كويسة في عدم الغش .
وحديك مثال على ذلك كنت بشتري كبالن من حوالي سنة أو سنة ونص .. وكنت عاوز أجيب الأصلية .. ورحت للمحل وقلت ليه عاوز حاجة إيطالي أو تركي نضيفة .. قالي عندي وتمنهم كذا (مش فاكر) .. وتابع كلامه وقال بس منصحكش بيهم لأنهم مضروبين .. وخد الكبالن الصيني وعلى ضمانتي (أنا أثق فيه) وكان سعرهم أقل من نص التانيين اللي المفروض أنهم أصلي والحمد لله شغالين لغاية دلوقتي .. أنا بقول الكلام ده علشان اوضح أن الجديد دايماً بيكون أحسن بس بعد التأكد من أن نوعه كويس بغض النظر عن الماركة .

وفي النهاية تقبل تحياتي .

المشاركة الأصلية كتبت بواسطة elmkaneeki

انا بس بقول بلاش مستعمل
عشان قطع الغيار الخلع الى ممكن حد يدبسك فيها
وكمان انا فلا رأيى ان الديسك والاسطوانة من الحاجات الى لازم تيجى جديدة
دة اقتناع شخصى

+111111111

فيه حاجات ممكن تيجي استيراد .. زي المقص والدينامو على سبيل المثال وبيكونوا أحسن من الجديد لاختلاف الخامة .. وفيه حاجات يفضل أنها تيجي جديدة زي طقم الدبرياج وتيل الفرامل والمساعدين

الأخ العزيز / mrastra

أولاً مفيش اعتذار ولا أسف .. وأنا اعتز بكلمة أخي اللي لقبتني بها .. بس أنا كنت خايف الحوار ياخد سكة تانية في خلافات وشد وجذب لأني في الأساس لا أقصد التقليل من رأيك اللي كان مبني على تجربة فاشلة في طقم دبرياج جديد .. ولكن أصلك وأخلاقك الكريمة بانت في رد حضرتك .

والرأي اللي أنت أبديته في مشاركتك الأخيرة هو عين الصواب ونعم الرأي .. ولكن أنت اللي حظك كان وحش في الطقم المضروب ده .. وعلى فكرة فيه حاجات صيني في السوق جودتها كويسة جداً جداً بس المشكلة مين التاجر اللي يدلك عليها .. والناس بصفة عامة بتكون قلقانة من كلمة صنع في الصين .

وربنا يسهل إن شاء الله وتتطبق مواصفات الجودة في استيراد وتصنيع قطع الغيار للسوق المصري .. علشان الواحد يبقى مشتري وهو مطمن بعد كدة .. وتحياتي وتقديري ليك يا باشا .