الموضوع: للسادة ملاك الهوندا سيتي ... أخبار العربية معاكوا أيه ؟؟

متشكر جدا لحضراتكم علي الردود القيمة دي

كان فيه أستفسار تاني مهم ..
هل فعلا تانك البنزين تحت الكرسي الامامي اليمين , و هل ده مش بيؤثر في حركة الكرسي ؟

الأخوة الأعضاء الكرام ..

أولا أنا متشكر جدا لردودكم و أهتمامكم ...

النهاردة قمت بزيارة الي توكيل هوندا بالتجمع الخامس لأنه قريب مني و سألت علي العربية ووجدت العربية الفئة الأولي و قمت بتجربتها و ده انطباعي الاول عنها و عن التوكيل :

أولا.. أنطباعي عن الهوندا سيتي:

1- شكل العربية أخاذ و أنسيابي بشكل غير عادي و خصوصا شكلها الجانبي الأنيق ذو التصميم الايروديناميكي العالي و علي فكرة ده بيزيد من ثبات العربية بشكل كبير علي الطريق في السرعات العالية

2- شنطة العربية واسعة جدا , لم أكن أتخيل أنها بهذا الاتساع رغم أن شكلها الخارجي لايوحي بذلك

3- مساحة حوض المحرك كبيرة و مرتبة و منسقة بشكل جيد يعطي فراغات كبيرة يتيح مرور أسهل للهواء حول المحرك للمساعدة في تبريده بالاضافة الي سهولة الكشف و الصيانات
المحرك يتميز بتكنولوجيا متقدمة تتيح خرجا قدره 118 حصان علي 6600 لفة/دقيقة و عزم 145 نيوتن متر علي 4800 لفة/دقيقة و هو سعة 1500 سي سي , 16 صباب كامة واحدة علوية

4- شكل العربية من الداخل يوحي بالاناقة و الفخامة و خاصة التابلوه و العدادات التي تعطي أحساسا بالتكنولوجيا الراقية

5- الكراسي مريحة وواسعة و لكن يعيب كرسي السائق في هذه الفئة فقط أنه لايمكن التحكم في أرتفاعه و لكن الجالس فيه يشعر أنه يري الطريق بشكل جيد (معلش أصلي واخد لسه علي قاعدة الياريس المرتفعة)

6- المرايات جيدة جدا و خاصة الجانبية تعطي رؤية جيدة للطريق و لكني علقت علي المراية الوسطي أنها خفيفة بالاضافة الي ان شكل الزجاج الخلفي (شبه المنحرف) يعيق الرؤية قليلا و كان من الافضل هنا زيادة عرض المرايات الجانبية قليلا

7- مساحات التخزين داخل السيارة جيدة جدا و أن كان يعيبها الدرج الامامي الصغير في الحجم و لكن وجود تانك البنزين بمنتصف السيارة تحت الكراسي الامامية جعل هناك مساحة تخزين جيدة جدا تحت الكنبة الخلفية

8- نيجي بقي للأداء .. بداية عند أدارة المحرك يصدر منه صوت عالي قليلا مقارنة بسيارات تويوتا مثلا و لكن مع دورانه تشعر أن السيارة جاهزة للأنطلاق و تطلب منك أن ترفع قدمك من علي الفرامل لتنطلق كالحصان الجامح بكل ثبات و هدوء و عند تجربة الكيك داون وجدت منها استجابة عالية و سريعة اما الفرامل فهي ممتازة و تشعر أنها تسعفك وقت أن تحتاجها

9- مميزات الفئة الاعلي :
- الجنوط سبور مقاس 16 و ليست 15
- يوجد مسند اوسط بين الكراسي الامامية به مساحة تخزين
- الكراسي الخلفية يمكن طيها مع التحكم في أرتفاع مساند الرأس
- الطارة بها تحكم في الصوت
- بها فوج لايت (3000 جنيه فرق)
- المفتاح بريموت كنترول (2000 جنيه فرق)


ثانيا.. أنطباعي عن التوكيل:

بداية تشعر و كأنك في مركز تجاري فخم جدا و كل الامور تسير بهدوء و نظام , اما المعاملة فهي ممتازة فقد قابلني أحد مسئولي المبيعات و شرح لي كل شئ عن السيارة و أجاب عن كل أستفساراتي بالاضافة الي أنه عرض علي تجربة قيادة السيارة

بأختصار السيارة جيدة جدا و التوكيل بشكل مبدئي جيد و فعليا بدأت أميل في القرار لصالح السيتي و لكن الفئة الاعلي التي من المتوقع وصولها الاسبوع القادم بسعر 138000 جنيه بينما الفئة العادية 126000 جنيه

مع خالص تحياتي
م/ سمير الشهاوي

المشاركة الأصلية كتبت بواسطة shero379

شكرا جزيلا للمعلومات القيمة ولكنى كنت اريد ان استفسر اولا عن المميزات و العيوب التى لاحظتها حضرتك بينها و بين الياريس ؟؟
ثانيا ممكن اعرف ايه التعليمات اللى اخد بالى منها و انا بستلم العربية؟؟

شكرا لمرور حضرتك علي الموضوع ..

بالنسبة للفرق بين السيتي و الياريس ..

1- السيتي أعلي من الياريس حوالي 10 مم (اي 1 سم) و ده طبعا مش فرق كبير علشان كده لم أشعر بأرتفاع العربية عن الارض زي الياريس

2- الرؤية في الياريس اكثر وضوحا و خاصة المرايات الجانبية عن السيتي لكن يمكن دي مسالة وقت و تعود

3- السيتي شنطتها الخلفية اكبر من الياريس (السيتي 506 لتر و الياريس 339 لتر)

4- تابلوه السيتي اكثر فخامة و أحساسا بالعصرية و لكن تابلوه الياريس مع أنه كلاسيكي لكن خاماته جيدة جدا و عملية

5- شكل الهوندا الخارجي طبعا أحلي من الياريس و خاصة التصميم الايروديناميكي الذي يقلل من مقاومة الهوا و يساعد علي ثبات السيارة في السرعات العالية عكس شكل الياريس المرتفع نسبيا

6- التسارع في السيتي طبعا أعلي من الياريس و خاصة الاستجابة العالية في الكيك داون و ده بحكم التفوق في القوة الحصانية (السيتي : 118 حصان عند 6600 لفة/دقيقة - العزم 145 ن.متر عند 4800 لفة/دقيقة) - (الياريس : علي ما أذكر 95 حصان و هي 1300 سي سي)

7- تقريبا باقي النقاط متشابهة و علي فكرة المقارنة الصحيحة يجب أن تكون بين السيتي و الياريس 1500 علشان نقدر نحكم صح

أما بالنسبة للحاجات اللي تأخد بالك منها أثناء الاستلام و ده عن خبرة و تجارب سابقة :
1- تفحص صاج العربية و تتاكد من عدم وجود تجريحات او خدوش أو نقر
2- فحص الاطارات و التأكد من سلامتها و انها جديدة
3- ألقاء نظرة علي المحرك و ملحقاته
4- فحص الشنطة الخلفية و التأكد من محتوياتها (الاستبن - العدة - الكوريك)
5- ياريت لو تقدر ترفع العربية أو تنزل تحتها و تفحصها من الاسفل علشان تتأكد من عدم وجود أحتكاكات بمطبات و تجريح بأسفل العربية و خاصة منطقة المقصات الامامية و عدم وجود ترحيل بها
6- فحص الصالون من الداخل و التأكد من نظافته
7- تشغيل المحرك و سماع صوته و ملاحظة كل المؤشرات و العدادات
8- تشغيل التكييف و التاكد من سلامته و كفائة الهوايات عند تشغيل المروحة علي أعلي سرعة
9- تشغيل الكاسيت / الراديو / السي دي و التأكد من حالة السماعات كل علي حدة
10- تشغيل مساحات الزجاج و التأكد من عملها و عمل بخاخات غسيل الزجاج الامامي
11- ظبط المرايات و التأكد من تشغيلها
12- ظبط وضع الكرسي و التاكد من باقي الكراسي و كذلك أحزمة الامان
13- تشغيل انوار السيارة و التاكد من عملها جميعا
14- التاكد من وجود كتيب التعليمات و الضمان مختوم من الوكيل أو الموزع
15- مطابقة رقم الموتور و الشاسيه لما هو مكتوب في أوراق السيارة

يعني كده حاجة علي السريع علي قد ما أفتكرت

مع خالص تحياتي
م/ سمير الشهاوي