كان لى تجربة سيئة مع محطة موبيل شارع الهرم فى منطقة الطالبية و التى اقصدها تلك المحطة الكائنة فى الطريق المؤدى من الاهرامات الى ميدان الجيزة و التى تقع قبل شركة سيد للادوية مباشرة و انت جاى من الهرم فى منطقة الطالبية
المحطة بها خدمة تموين السيارات و خدمة غسيل السيارات من الداخل و الخارج و شمع و خلافه و خدمة الغسيل تحديدا عليها يافطة كبيرة جدا تجذب الجميع لتجربتها من ناحية السعر المعلن و هو 20 جنيه للغسيل الشامل و 7 جنيه لغسيل الكمبيوتر (الذى يتم عن طريق الكابينة المفتوحة من الجانبين )
طبعا بمجرد استفسارى عن خدمة الغسيل الشامل (20 جنيه ) من المشرف وجدت انها لا تشمل غسيل الموتور و فى حالة طلب ذلك يضاف 15 جنيه الى العشرون جنيها اى ان الاجمالى هو 35 جنيه ، اما خدمة البولش و الشمع فديه تكلفتها 200 جنيه ، فقولت مش مشكلة و مبلغ خمسة و ثلاثون جنيها مناسب للخدمة و ان كان فيه شبه غش عن الاعلان الخارجى بس انا تقبلت ذلك و شرعت فى ذلك و بمجرد دخولى للدورة من بدايتها وجدت ان المسالة مقسمة لمراحل كثيرة حوالى 5 مراحل
( تنظيف الصالون بالهوفر و تلميع التابلوه ، غسيل السيارة من الاسفل بضغط المياة و غسيل الموتور بالفوم ، غسيل السيارة بالفوم من الخارج مع ضغط المياة لازالة الفوم ، غسيل السيارة فى كابينة بنظام الريشة الدوارة المتعارف عليها ، ثم تجفيف السيارة من الخارج يدويا ) و كل ذلك جميل جدا
ما وجدته فعليا انى مطالب بدفع بقشيش لكل مجموعة عمال قائمين على كل مرحلة و عندما رفضت سمعت احد العمال يقول ( مش عايز يدفع اما راجل معندوش دم ) و عندما طلبت اقابل مدير المحطة للشكوى من ما هذا اللفظ الذى يعتبر خطأ فى حقى تحول العمال الى ما يشبه العصابة فى مواجهتى و كل مجموعة تقولى يا عم كبر دماغك و مجموعة اخرى تقولى عديها ده راجل كبير و واحد تانى يقولى انا المدير عايز اه طب خد العربية بتاعتك و اتكل على الله ، و بقى الموضوغ غريب جدا لا و كمان لقيت عامل تانى عايز يتشابك معايا بالايدى و الناس بتحوشوه و انا طبعا مش حديله فرصه لانى لو اتخانقت معاه تحول الموضوع من شكوى من عامل يتطاول و يشتم الزبون علشان البقشيش الاجبارى الى موضوع اخر هو خناقة بين طرفين و كمان حتكون خناقة مع ييجى 15 واحد عمال مراحل الغسيل ، و فى النهاية وجدت المدير الذى ظهر فى اخر الفيلم راجل محترم لابس بدلة قالى احنا اسفين اعملولوه اللى هو عايزه يا جماعة !!! . و اصلا كدة كدة مراحل التنظيف كانت ماشية عادى كانت لا تحتاج توجيه منه
واضح ان مسألة البقشيش حتفضل زى ما هى فى مصر لكن حاليا زاد عليها البجاحة و البلطجة فى طلبها ( فى الوقت اللى فيه يوجد عمال كثيرون محترمون ) لكن زمان الخوف من المحاسبة كان بيحجم النوعية السيئة ديه من العمال لكن حاليا مفيش خوف مع وجود بطلجة ( النظام الجديد اللى فاهمينه غلط ) و حتلاقى حتى مدير المحطة عاملهم الف حساب و ميقدرش يحاسب حد فيهم طبقا للوضع اللى انا شفته
الجميل بقى ان اكتشفت ان اكثر من شخص تعامل مع نفس المحطة و انجذب لليفطة البراقة الموجودة و ووجد نفسه مضطر يدفع بقشيشات لكل العمال بمراحلهم المختلفة و اكتشف انه دفع ما يوازى 80 فى المائة من ثمن الغسيل نفسه لكن الظاهر ان الوحيد اللى رفضت الاستغلال و الذى تحول الى بلطجة فى النهاية
وجب التحذير علشان الاعضاء ياخدوا بالهم لكى لا يتعرضوا لما تعرضت اليه او على الاقل الناس تبقى عارفة المسالة ماشية ازاى
فى الوقت اللى منطقة الهرم مليانة اماكن كثيرة جدا لغسيل السيارات غسيل شامل بمعدات حديثة لا تتعدى
15 جنيه و قول حندى الراجل 5 جنيه يبقى الاجمالى 20 جنيه و الراجل حيزقطط و حيبقى فرحان و انا حمشى مستريح للخدمة اللى اخدتها و لانى كمان راضيت الراجل بتاع المغسلة و هذا ما سوف افعله بعد كدة
مع احترامى للاخ العزيز / كريم اسف على التعديل هذه ليست محطة موبيل هذه محطة مصر للبترول وتقع فى الطالبية هرم امام عمارات متنصر اما محطة موبيل فهمى تقع قبل كايرو مول وقبل مفكو حلوان للاثاث الخشبى علشان بس لا يحصل خطأ
المفضلات